မြန်မာနိုင်ငံ၏ စီးပွားရေးကာလတိုအားဖြင့် ၇ ဒသမ ၅ ရာခိုင်နှုန်းအထိ တိုးတက်ဖွယ်ရှိသည်ဟု အပြည်ပြည်ဆိုင်ရာ ငွေကြေးရန်ပုံငွေအဖွဲ့ (IMF) က ခန့်မှန်းသော်လည်း ဘဏ်လုပ်ငန်းများ စည်းမျဉ်းသစ်များ လိုက်နာနိုင်မှု၊ ရခိုင်အရေးအကြောင့် မြန်မာနိုင်ငံ၏ ဘဏ္ဍာရေးနှင့် ရင်းနှီးမြှုပ်နှံမှုအပေါ် ထိခိုက်နိုင်မှု၊ ကုန်ဈေးနှုန်းမြင့်တက်မှု စသည့်စိန်ခေါ်မှုများရှိနေကြောင်း မတ် ၂၈ ရက်က ထုတ်ပြန်သည့် IMF Article IV Consultation ဆိုင်ရာအစီရင်ခံစာအရ သိရသည်။

NLD အစိုးရသည် ပြီးခဲ့သည့်ဘဏ္ဍာနှစ်အတွင်း ဆောက်လုပ်ရေးစီမံကိန်းများ ယာယီရပ်ဆိုင်းခဲ့ခြင်း၊ လယ်ယာစိုက်ပျိုးရေးထွက် ကုန်လျော့နည်းခဲ့ခြင်း၊ ပို့ကုန်တင်ပို့မှု ကျဆင်းခဲ့ခြင်းတို့ကြောင့် စိန်ခေါ်မှုအများအပြားနှင့် ကြုံတွေ့ခဲ့ကာ ၂၀၁၆-၂၀၁၇ ဘဏ္ဍာနှစ်အတွင်း မျှော်မှန်းထားသည်ထက် လျော့နည်းသည့် စီးပွားရေးတိုးတက်မှုနှုန်း ၅ ဒသမ ၉ ရာခိုင်နှုန်းသာဖြစ်ပေါ်ခဲ့သည်။ အခြားတစ်ဖက်တွင်လည်း ဘဏ္ဍာရေးအသုံးစရိတ်လို ငွေကို ဂျီဒီပီ (ပြည်တွင်းအသားတင် ကုန်ထုတ်လုပ်မှုတန်ဖိုး) ၏ ၂ ဒသမ ၅ ရာခိုင်နှုန်းအထိ လျှော့ချနိုင်ခဲ့ပြီး ပျမ်းမျှငွေကြေးဖောင်းပွနှုန်း ၆ ဒသမ ၈ ရာခိုင်နှုန်းသာဖြစ်ပေါ်ခဲ့သည်။ ထို့ပြင် နိုင်ငံခြားစာရင်းရှင်ငွေ စာရင်းလိုငွေကိုလည်း ယခင်ဘဏ္ဍာနှစ်က ဂျီဒီပီ၏ ၅ ဒသမ ၁ ရာခိုင်နှုန်းရှိရာမှ ၂၀၁၆-၂၀၁၇ ဘဏ္ဍာနှစ်တွင် ၃ ဒသမ ၉ ရာခိုင်နှုန်းအထိ လျှော့ချနိုင်ခဲ့ပြီး နိုင်ငံခြားအရန်ငွေကိုလည်း သွင်းကုန်တန်ဖိုး၏ ၃ ဒသမ ၂ လစာထိန်းထားနိုင်ခဲ့ကြောင်း သိရသည်။

လာမည့်နှစ်များအတွင်း မြန်မာနိုင်ငံ၏ ကာလလတ် မက်ခရိုစီးပွားရေးအခြေအနေကို IMF က အကောင်းဘက်ဖြစ်လာရေးအတွက် မျှော်မှန်းထားပြီး စိုက်ပျိုးရေးကဏ္ဍနှင့် ပြည်ပပို့ကုန်အား ပြန်ကောင်းလာနိုင်သောကြောင့် ၂၀၁၇-၂၀၁၈ ဘဏ္ဍာနှစ်တွင် ၆ ဒသမ ၇ ရာခိုင်နှုန်းတိုးတက်နိုင်ကြောင်း ခန့်မှန်းထားသည်။

မြန်မာနိုင်ငံ၏ စီးပွားရေးတိုးတက်မှုအတွက် အခွန်အခကောက်ခံရရှိမှုနှုန်း များပြားလာခြင်းက အထောက်အကူဖြစ်လာခဲ့သော်လည်း အခြားတစ်ဖက်တွင်လည်း ရခိုင်ပြည်နယ်တွင် ဖြစ်ပေါ်နေသော အရေးကိစ္စများကြောင့် မြန်မာ့စီးပွားရေးကို တိုက်ရိုက်အားဖြင့် ထိခိုက်မှုရှိစေသကဲ့သို့ လူမှုရေးအရ ဆုံးရှုံးမှုများလည်းဖြစ်ပေါ်လျက်ရှိကာ အဆိုပါထိခိုက်ဆုံးရှုံးမှုများ အားလုံးကိုမူ မမြင်တွေ့ရသေးကြောင်း IMF ၏ ထုတ်ပြန်ချက်တွင် ဖော်ပြထားသည်။

မြန်မာနိုင်ငံ၏ စီးပွားရေးအခြေအနေအား စိစစ်သုံးသပ်ချက်များအရ နိုင်ငံခြားတိုက်ရိုက်ရင်းနှီးမြှုပ်နှံမှုများကြောင့်နှင့် အများပြည်သူဆိုင်ရာကဏ္ဍများတွင် ရင်းနှီးမြှုပ်နှံမှုပုံစံ တိုးတက်ကောင်းမွန် ထိရောက်လာခြင်းကြောင့် ကာလတိုအားဖြင့် တိုးတက်မှုနှုန်း ၇ ရာခိုင်နှုန်းမှ ၇ ဒသမ ၅ ရာခိုင်နှုန်းအထိ တိုးတက်ရန်အလားအလာရှိသည်ဟု ခန့်မှန်းထားသည်။

မြန်မာနိုင်ငံစီးပွားရေးကို အကောင်းဘက်သို့ ရှုမြင်ထားသော်လည်း စီးပွားရေးကောင်းမွန်မှု နောက်ဆုတ်သွားနိုင်သည့် စိန်ခေါ်မှုများအဖြစ် အသစ်ချမှတ်ထားသည့် စည်းမျဉ်းစည်းကမ်းသစ်များအတိုင်း ဘဏ်လုပ်ငန်းများ လိုက်နာနိုင်မှု၊ ရခိုင်အရေးကိစ္စကြောင့် နိုင်ငံ့ဘဏ္ဍာရေးနှင့် ရင်းနှီးမြှုပ်နှံမှုအပိုင်းတွင် ဆက်လက်ထိခိုက်မှုများဖြစ်ပေါ်မှု၊ ကုန်ဈေးနှုန်းမြင့်တက်မှု၊ ကမ္ဘာ့ဘဏ္ဍာရေးဈေးကွက် မတည်မငြိမ်ဖြစ်နိုင်ခြေရှိမှု၊ တရုတ်၏ စီးပွားရေးဖိအားသက်ရောက်မှုနှင့် သဘာဝဘေးအန္တရာယ်များရှိနေကြောင်း သုံးသပ်ထားသည်။

ထို့အတူ မြန်မာနိုင်ငံ၏ စီးပွားရေးတိုးတက်မှုနှုန်းကို တွန်းတင်နိုင်ရေးအတွက် နိုင်ငံ၏ မဟာဗျူဟာမြောက် ပြုပြင်ပြောင်းလဲရေးအစီအစဉ်ကို ယခုထက်ပိုမို၍ အသေးစိတ် အကောင်အထည်ဖော် ဆောင်ရန်ရွက်နှင့် အာဆီယံနိုင်ငံများအတွင်း အနိမ့်ကျဆုံးဖြစ်နေသည့် အခြေခံအဆောက်အအုံအရည်အသွေးကို ဆက်လက်မြှင့်တင်သွားရန် လိုအပ်ကြောင်း IMF က အကြံပြုထားကြောင်း သိရသည်။