ပုံတူရုပ်တုအား ကြည့်ရှုနေသည့် ဗိုလ်ချုပ်မှူးကြီးမင်းအောင်လှိုင်အား တွေ့ရစဉ် (ဓာတ်ပုံ-တပ်မတော်ကာကွယ်ရေးဦးစီးချုပ်ရုံး)
ငြိမ်းချမ်းရေးလုပ်ငန်းစဉ်နှင့် ပတ်သက်၍ တိုင်းရင်းသားလူမျိုးများမှာ ရိုးသားမှုရှိသော်လည်း အချို့ပယောဂများကြောင့် ပြဿနာများဖြေရှင်းရာတွင် အခက်အခဲအချို့ရှိကြောင်း တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်က ပြောကြားသည်။
တပ်မတော်စစ်သမိုင်းပြတိုက်၌ မတ် ၂၆ ရက် နံနက်ပိုင်းက (၇၃) နှစ်မြောက်တပ်မတော်နေ့ကို ဂုဏ်ပြုကြိုဆိုသောအားဖြင့် တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်၏ ပုံတူပန်းပုရုပ်တုအား ပေးအပ်လှူဒါန်းခြင်း အခမ်းအနားတွင် တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်က ထိုသို့ပြောကြားခြင်းဖြစ်ကြောင်း တပ်မတော်ကာကွယ်ရေးဦးစီးချုပ်ရုံး၏ ထုတ်ပြန်ချက်အရ သိရသည်။
ယခင်အစိုးရအဆက်ဆက် ငြိမ်းချမ်းရေးရရှိအောင် ဆောင်ရွက်ခဲ့သော်လည်း တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်တာဝန်ထမ်းဆောင်ချိန်တွင် မိမိတို့ကရင်ပြည်နယ်ဒေသအတွင်းမှ တိုင်းရင်းသားလက်နက်ကိုင် အဖွဲ့အစည်းများ အနေဖြင့် ငြိမ်းချမ်းရေးဆွေးနွေးပွဲများ၊ NCA လက်မှတ်ရေးထိုးပွဲများ ပြုလုပ်နိုင်ခဲ့မှုများကြောင့် ငြိမ်းချမ်းရေးလမ်းကြောင်းပေါ်သို့ ရောက်ရှိလာခဲ့ပြီး ဒေသဖွံ့ဖြိုးရေး၊ လူမှုရေး၊ ကျန်းမာရေးကဏ္ဍများတွင် တိုးတက်ကောင်းမွန်လာကြောင်း၊ ဗိုလ်ချုပ်မှူးကြီးမင်းအောင် လှိုင်၏ လက်တွဲခေါ်ယူမှုဖြင့် ငြိမ်းချမ်းရေး လမ်းကြောင်းပေါ်သို့ ရောက်ရှိလာခဲ့ပြီး ကရင်ပြည်နယ် အတွင်းရှိပြည်သူလူထုများအနေဖြင့် စီးပွားရေးလုပ်ငန်းများနှင့် ဒေသဖွံ့ဖြိုးရေး လုပ်ငန်းများကို အေးချမ်းသာယာစွာဖြင့် ဆောင်ရွက်လာနိုင်ခဲ့ကြောင်း၊ ထို့ကြောင့်မိမိတို့၏ ကျေးဇူးတင်မှုကိုဖော်ပြရန်အတွက် ပိတောက်ကျီးပေါင်းသားဖြင့် ထုလုပ်ထားသည့် တပ်မတော်ကာကွယ်ရေးဦးစီးချုပ်၏ ပုံတူရုပ်တုအား လာရောက်ပေးအပ်လှူဒါန်း ခြင်းဖြစ်ကြောင်း လှူဒါန်းမှုနှင့်ပတ်သက်၍ အလှူရှင်များကိုယ်စား ဦးကျော်ကျော်က ဦးစွာ ရှင်းလင်းပြောကြားသည်။
ယခုကဲ့သို့ မိမိ၏ပုံတူရုပ်တုအား ပေးအပ်လှူဒါန်းခြင်းသည် တပ်မတော်၏ ပြည်တွင်း ငြိမ်းချမ်းရေးရရှိအောင် ကြိုးပမ်းမှုအပေါ် ပြည်သူများက လှိုက်လဲှစွာ လက်ခံအသိအမှတ်ပြုခြင်းကို ထင်ဟပ်ပေါ်လွင်စေကြောင်း၊ မိမိတို့နိုင်ငံသည် ပြည်တွင်းလက်နက်ကိုင် ပဋိပက္ခများကြောင့် တိုင်းရင်းသားများဒုက္ခရောက်ရပြီး ဖွံ့ဖြိုးတိုးတက်မှုမှာ အခြားနိုင်ငံများထက် များစွာနောက်ကျခဲ့ရသဖြင့် ငြိမ်းချမ်းရေးရရှိအောင် မဖြစ်မနေလုပ်ဆောင်ကြရမည်ဖြစ်ကြောင်း၊ မိမိစစ်ဆင်ရေးနယ်မြေများ၌ တာဝန်များထမ်းဆောင်ချိန်ကလည်း ဒေသဖွံ့ဖြိုးရေးအတွက် တတ်နိုင်သမျှ လုပ်ဆောင်ပေးခဲ့ပြီး ဒုက္ခရောက်ရှိနေသူများအားလည်း ကယ်ထုတ်ပေးနိုင်ခဲ့သည်များရှိကြောင်း၊ မိမိ တပ်မတော်ကာကွယ်ရေးဦးစီးချုပ် တာဝန် စတင်ထမ်းဆောင်ချိန်တွင် ငြိမ်းချမ်းရေးနှင့်ပတ်သက်၍ ဆောင်ရွက်ရာ၌ ယခင်အစိုးရသက်တမ်း သမ္မတကြီး ဦးသိန်းစိန်နှင့် ငြိမ်းချမ်းရေးရရှိအောင် ဆောင်ရွက်မည်ဟု ဆွေးနွေးခဲ့ပြီး ထိုသို့ဆွေးနွေးရာတွင် မိမိတို့နိုင်ငံသည် ဒီမိုကရေစီစနစ်ကိုကျင့်သုံးလျက်ရှိပြီး ဒို့တာဝန်အရေးသုံးပါးကို မထိခိုက်ရန်နှင့် ပါတီစုံဒီမိုကရေစီလမ်းကြောင်း ကိုမထိခိုက်လျှင် နိုင်ငံရေးဆွေးနွေးမှုများကို တပ်မတော်မှ သဘောတူ ဆောင်ရွက်မည်ဖြစ်ကြောင်း ပြောကြား၍ ငြိမ်းချမ်းရေးရရှိအောင် ဆောင်ရွက်ခဲ့ကြောင်း၊ မိမိတို့တိုင်းရင်းသားလူမျိုးများမှာ ရိုးသားမှုရှိသော်လည်း တချို့ ပယောဂများကြောင့် ပြဿနာများဖြေရှင်းရာ တွင် အခက်အခဲတချို့ရှိကြောင်း၊ ယခုကဲ့သို့ ကရင်ပြည်နယ်အတွင်း ငြိမ်းချမ်းရေး ရရှိ ခြင်းမှာ မိမိတို့တပ်မတော်နှင့် ကရင်ပြည်နယ်အတွင်းရှိ တိုင်းရင်းသားလက်နက်ကိုင်အဖွဲ့များ တစ်ဦးနှင့်တစ်ဦး အပြန်အလှန်ယုံကြည်စွာဖြင့် ဆောင်ရွက်နိုင်ခဲ့ခြင်းကြောင့် ဖြစ် ကြောင်း၊ မည်သည့်အစိုးရ၊ မည်သည့်ပါတီကတိုင်းပြည်ကို ဦးဆောင်သည်ဖြစ်စေ တိုင်းပြည် အေးချမ်း သာယာဖွံ့ဖြိုးတိုးတက်ရေးအတွက် တပ်မတော်ကဆောင်ရွက်သွားမည်ဖြစ်ကြောင်း၊ မိမိတို့ငြိမ်းချမ်းရေးရရှိအောင် ဆောင်ရွက်ရသည့် ရည်ရွယ်ချက်မှာ တိုင်း ပြည်တည်ငြိမ်အေးချမ်းပြီး ဖွံ့ဖြိုးတိုးတက်ရန်၊ ပြည်သူလူထုငြိမ်းချမ်းစွာဖြင့် နေထိုင်လုပ်ကိုင် စားသောက်နိုင်ရန်ဖြစ်ကြောင်း၊ တပ်မတော်မှ ငြိမ်းချမ်းရေးရရှိအောင် ဆောင်ရွက်နေမှုအပေါ် အသိအမှတ်ပြုသည့်အနေဖြင့် မိမိ၏ ပုံတူပန်းပုရုပ်တုအား ထုဆစ်ပြီးပေး အပ်လှူဒါန်းကြသော ပြည်သူပြည်သားများ၏ အစိတ်အပိုင်းတစ်ခုဖြစ်သည့် အလှူရှင်များအား ကျေးဇူးတင်ရှိပါကြောင်း တပ်မတော်ကာကွယ်ရေးဦးစီးချုပ်က ကျေးဇူးတင်စကား ပြန်လည်ပြောကြားသည်။
အဆိုပါတပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်၏ ရုပ်တုအား မြိုင်ကြီးငူဒေသ မြန်မာ-ထိုင်းနှစ်နိုင်ငံ နယ်စပ်အနီး ပေါက်ရောက်လျက်ရှိသည့် နှစ် ၁၀၀ ကျော်သက်တမ်းရှိ ပိတောက်ပင်၏ ကျီးပေါင်းသားဖြင့် ထွင်းထုထားခြင်းဖြစ်ပြီး သစ်အလှူရှင် ဦစောလှအေး လှူဒါန်းသည့် ပိတောက်ပင်၏ ကျီးပေါင်းသားပေါ်တွင် ဦးကျော်ကျော်၏ စီစဉ်မှုဖြင့် ပန်းပုဆရာ ဦးရဲရင့်နောင်လတ်က နှစ်လခန့် အချိန်ယူ ထုဆစ်ခဲ့ရပြီး ရုပ်တုထုလုပ်ပြီးစီးချိန်တွင် ယခုကဲ့သို့ တပ်မတော်ကာကွယ်ရေးဦးစီးချုပ်အား လာ ရောက် ပေးအပ်လှူဒါန်းခဲ့ခြင်းဖြစ်ကာ ရုပ်တုမှာ အလေးချိန်အားဖြင့် တစ်တန်ခန့်ရှိပြီး ကာလတန်ဖိုး ကျပ်သိန်း ၁၀၀၀ ခန့်ရှိကြောင်း တပ်မတော်ကာကွယ်ရေးဦးစီးချုပ်ရုံး၏ ထုတ်ပြန်ချက်တွင် ရေးသားထားသည်။
ယင်းအခမ်းအနားသို့ တပ်မတော်ကာကွယ်ရေးဦးစီးချုပ်နှင့်အတူ ဇနီး ဒေါ်ကြူကြူလှ၊ ဒုတိယတပ်မတော် ကာကွယ်ရေးဦးစီးချုပ် ကာကွယ်ရေးဦးစီးချုပ် (ကြည်း) ဒုတိယဗိုလ်ချုပ်မှူးကြီး စိုးဝင်းနှင့်ဇနီး ဒေါ်သန်းသန်းနွယ်၊ ညှိနှိုင်းကွပ်ကဲရေးမှူး (ကြည်း၊ ရေ၊ လေ) ဗိုလ် ချုပ်ကြီး မြထွန်းဦး၊ ကာကွယ်ရေးဦးစီးချုပ်ရုံးမှ တပ်မတော်အရာရှိကြီးများ၊ နေပြည်တော်တိုင်း စစ်ဌာနချုပ်တိုင်းမှူး၊ အလှူရှင်များဖြစ်ကြသည့် ဦးစောလှအေး၊ ဦးကျော်ကျော်နှင့် ပန်းပုပညာရှင် ဦးရဲရင့်နောင်လတ်တို့ တက်ရောက်ကြကြောင်း တပ်မတော်ကာကွယ် ရေးဦးစီးချုပ်ရုံး၏ ထုတ်ပြန်ချက်အရ သိရသည်။
