မြန်မာနိုင်ငံသား ရင်းနှီးမြှုပ်နှံမှုဖြင့်ဆောင်ရွက်နေသော ရေထွက်ပစ္စည်း ပြုပြင်ထုတ်လုပ်သည့်စက်ရုံ လုပ်ငန်းခွင်အား တွေ့ရစဉ်

၂၀၁၇-၂၀၁၈ ဘဏ္ဍာနှစ် ဖေဖော်ဝါရီလကုန်အထိ ပြည်နယ်နှင့် တိုင်းဒေသကြီးများတွင် မြန်မာနိုင်ငံများ၏ စုစုပေါင်းရင်းနှီးမြှုပ်နှံမှု ပမာဏ ဒေါ်လာတစ်ဘီလျံကျော် အပါအဝင် ကျပ်၃၅၃၂ဘီလျံကျော်အထိ မြှုပ်နှံထားကြောင်း မြန်မာနိုင်ငံရင်းနှီးမြှုပ်နှံမှု ကော်မရှင် သတင်းထုတ်ပြန်ချက်အမှတ်စဉ် (၃/၂၀၁၈)အရ သိရသည်။

၂၀၁၇-၂၀၁၈ ဘဏ္ဍာနှစ်အတွင်း မြန်မာနိုင်ငံသား ရင်းနှီးမြှုပ်နှံမှုခွင့်ပြုပေးခဲ့မှုမှာ ၂၀၁၈ ခုနှစ် ဖေဖော်ဝါရီလအထိ မြန်မာနိုင်ငံသား ရင်းနှီးမြှုပ်နှံမှုလုပ်ငန်း ၁၀၁ ခု၊ ဒေါ်လာ ၉၆၀ ဒသမ ၅၉၄ သန်းအပါအဝင် ကျပ် ၃၂၆၂ ဘီလျံကျော်ဖြစ်ကြောင်း၊ ရင်းနှီးမြှုပ် နှံမှုတိုးမြှင့်ခြင်းအပါအဝင် စုစုပေါင်း ရင်းနှီး မြှုပ်နှံမှုပမာဏ ဒေါ်လာ ၁၀၈၇ ဒသမ ၅၀၁ သန်း အပါအဝင် ကျပ်၃၆၃၂၂၄၁ ဒသမ ၆၀၈ သန်းခွင့်ပြုပြီးဖြစ်ကြောင်း သိရသည်။

မြန်မာနိုင်ငံရင်းနှီးမြှုပ်နှံမှုကော်မရှင်၏ အစည်းအဝေး အမှတ်စဉ် (၃/၂၀၁၈) ကို ၂၀၁၈ ခုနှစ် ဖေဖော်ဝါရီ ၂၇ ရက်က ရန်ကုန်မြို့ရှိ ရင်းနှီးမြှုပ်နှံမှုနှင့်ကုမ္ပဏီများညွှန်ကြားမှု ဦးစီးဌာနတွင် ကျင်းပခဲ့သည်။

အဆိုပါအစည်းအဝေးအမှတ်စဉ် (၃/ ၂၀၁၈) တွင် မြန်မာနိုင်ငံသား ရင်းနှီးမြှုပ်နှံမှု လုပ်ငန်းနှစ်ခုခွင့်ပြုခဲ့ပြီး ခွင့်ပြုခဲ့ပြီးလုပ်ငန်းတစ်ခုကို အတည်ပြုခဲ့သည်။ စစ်ကိုင်းတိုင်းဒေသကြီး ရင်းနှီးမြှုပ်နှံမှုကော်မတီက အတည်ပြုပေးခဲ့သည့်လုပ်ငန်းနှစ်ခုနှင့် တနင်္သာရီတိုင်းဒေသကြီး ရင်းနှီးမြှုပ်နှံမှုကော်မတီက အတည်ပြုပေးခဲ့သည့် လုပ်ငန်းတစ်ခုရှိသဖြင့် စုစုပေါင်းလုပ်ငန်း ခြောက်ခုမှ ရင်းနှီးမြှုပ်နှံမှုပမာဏ ဒေါ်လာ ၈၈ ဒသမ ၆၀၅ သန်း အပါအဝင် ကျပ် ၁၈၇၀၀၅ ဒသမ ၆၆၁ သန်း ခွင့်ပြု/အတည်ပြုပေးခဲ့ကြောင်း မြန်မာနိုင်ငံရင်း နှီးမြှုပ်နှံမှုကော်မရှင်က သတင်းထုတ်ပြန်ထားသည်။

အဆိုပါလုပ်ငန်းများမှ ပြည်တွင်းလုပ်သားများအတွက် အလုပ်အကိုင်အခွင့်အလမ်းပေါင်း ၆၅၁ ခုကို ဖန်တီးပေးမည်ဖြစ်ကြောင်း၊ ခွင့်ပြု/အတည်ပြုလုပ်ငန်းခြောက်ခုမှာ ပို့ဆောင်ရေးနှင့် ဆက်သွယ်ရေးကဏ္ဍတစ်ခု၊ အခြားဝန်ဆောင်မှုကဏ္ဍတစ်ခု၊ ဟိုတယ်နှင့် ခရီးသွားကဏ္ဍနှစ်ခုနှင့် စက်မှုကဏ္ဍနှစ်ခုတို့ဖြစ်ကြောင်း သိရသည်။

မြန်မာနိုင်ငံရင်းနှီးမြှုပ်နှံမှုကော်မရှင်အနေဖြင့် ရင်းနှီးမြှုပ်နှံမှုလုပ်ငန်းများကို ခွင့်ပြုပေးရာတွင် လုပ်ငန်း၏ စီးပွားရေးတွက်ခြေကိုက်မှု၊ အလုပ်အကိုင်သစ်များ ဖန်တီးပေးနိုင်မှု၊ အမျိုးသားဝင်ငွေနှင့် အခွန်တိုးတက် ရရှိနိုင်မှု၊ ပြည်တွင်းပြည်ပဈေးကွက်  အခြေအနေ၊ ပြည်တွင်းစားသုံးရန်လိုအပ်ချက်၊  နည်းပညာဆီလျော်မှု၊ တီထွင်ဆန်းသစ်မှု၊ နည်းပညာလွှဲပြောင်းရရှိမှု၊ပတ်ဝန်းကျင် ထိခိုက်မှုနှင့် လူမှုရေးထိခိုက်မှုထိန်းသိမ်းကာကွယ်ရေး ဆောင်ရွက်မှုအစီအမံများ၊ တာဝန်ယူမှုရှိသော ရင်းနှီးမြှုပ်နှံမှုဖြစ်ခြင်းနှင့် တည်ဆဲဥပဒေများကို လိုက်နာခြင်းစသည့် အချက်များကို အခြေခံ၍ စိစစ်ခြင်းဖြစ်ကြောင်း သိရသည်။

ပြည်နယ်နှင့် တိုင်းဒေသကြီးများရှိ ရင်းနှီးမြှုပ်နှံမှုကော်မတီများက ရင်းနှီးမြှုပ်နှံမှု ပမာဏ ဒေါ်လာငါးသန်း သို့မဟုတ် ကျပ် သန်း ၆၀၀၀ အထိရှိသည့် ရင်းနှီးမြှုပ်နှံမှုလုပ်ငန်းများကို ခွင့်ပြုပေးလျက်ရှိကြောင်း၊ လက်ရှိအချိန်၌ ပြည်နယ်နှင့်တိုင်းဒေသကြီးများတွင်လည်း ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှုဦးစီးဌာန (DICA) တစ်နည်းအားဖြင့် မြန်မာနိုင်ငံရင်းနှီးမြှုပ်နှံမှုကော်မရှင် (MIC) ရုံးများကို ဖွင့်လှစ်ထားပြီဖြစ်သည်။

၂၀၁၈ ခုနှစ် ဖေဖော်ဝါရီလကုန်အထိ  နိုင်ငံခြားရင်းနှီးမြှုပ်နှံမှုလုပ်ငန်း ၂၀၆ ခု၊ ရင်းနှီးမြှုပ်နှံမှု ပမာဏဒေါ်လာ ၄၅၀၈ ဒသမ ၄၅၃ သန်းဖြစ်ကြောင်း၊ ရင်းနှီးမြှုပ်နှံမှုတိုးမြှင့်ခြင်း အပါအဝင် စုစုပေါင်းရင်းနှီးမြှုပ်နှံမှု ပမာဏမှာ ဒေါ်လာ ၅၃၀၇ ဒသမ ၂၀၇ သန်း ဖြစ်ကြောင်း၊ အထူးစီးပွားရေးဇုန်ဥပဒေအရ သီလဝါအထူးစီးပွားရေးဇုန်တွင် ရင်းနှီးမြှုပ်နှံမှု ပမာဏ ဒေါ်လာ ၃၆၆ဒသမ ၅၃၀ သန်း ခွင့်ပြုခဲ့သဖြင့် စုစုပေါင်းခွင့်ပြုပြီးရင်းနှီးမြှုပ်နှံမှု ပမာဏ ဒေါ်လာ ၅၆၇၃ ဒသမ ၇၃၇ သန်း ဖြစ်သည်။