တရုတ်-မြန်မာ စီးပွားရေးစြင်္ကံလမ်း လျင်မြန်စွာ အကောင်အထည်ဖော်နိုင်ရန် ဆောင်ရွက်လိုသည့် လုပ်ငန်းအဆိုပြုလွှာများကို မြန်မာနိုင်ငံ ရင်းနှီးမြှုပ်နှံမှုကော်မရှင်ထံ တင်ပြစေလိုကြောင်း စီမံကိန်းနှင့် ဘဏ္ဍာရေးဝန်ကြီးဌာန ပြည်ထောင်စုဝန်ကြီး ဦးကျော်ဝင်းက ပြောကြားသည်။
တရုတ်-မြန်မာ စီးပွားရေးစြင်္ကံတွင် သဘောတူညီချက် ရရှိပြီးသော လုပ်ငန်းများကိုလည်း ဆောင်ရွက်စေလိုပြီး ဆောင်ရွက်လိုသော လုပ်ငန်းများနှင့်ပတ်သက်သည့် အဆိုပြုလွှာများကို မြန်မာနိုင်ငံ ရင်းနှီးမြှုပ်နှံမှုကော်မရှင်သို့ တင်ပြစေလိုပြီး တရုတ်-မြန်မာ နှစ်နိုင်ငံခေါင်းဆောင်များ သဘောတူညီချက်အတိုင်း တရုတ်-မြန်မာစီးပွားရေး စြင်္ကံလမ်း လျင်မြန်စွာ အကောင်အထည်ဖော် ဆောင်ရွက်နိုင်ရန်နှင့် မြန်မာနိုင်ငံ၏ ပညာရေး၊ ကျန်းမာရေး၊ လူမှုရေး၊ စီးပွားရေး လျင်မြန်စွာဖွံ့ဖြိုးတိုးတက်ရန်အတွက် လိုအပ်လျက်ရှိသည့် အခြေခံအဆောက်အအုံများ တည်ဆောက်နိုင်ရန် လိုအပ်ကြောင်း မြန်မာနိုင်ငံရင်းနှီးမြှုပ်နှံမှုကော်မရှင်ဥက္ကဋ္ဌလည်း ဖြစ်သူ ဦးကျော်ဝင်း က ဆက်လက်ပြောကြားသည်။
ထို့ပြင် စြင်္ကံလမ်း တည်ဆောက်ရေးမှာ လုပ်ငန်းပမာဏအလျောက် ပြည်တွင်း ပြည်ပ ရင်းနှီးမြှုပ်နှံမှုများဖြင့် ကာလတို/ကာလရှည် အချိန်ယူ ဆောင်ရွက်ရမည်ဖြစ်ပြီး စီးပွားရေးလုပ်ငန်းရှင်များအနေဖြင့် လက်ရှိ လုပ်ငန်းများသာမက တရုတ်-မြန်မာ စီးပွားရေးစြင်္ကံတွင် သဘောတူညီချက် ရရှိပြီးသော လုပ်ငန်းများကိုလည်း ဆောင်ရွက်စေလိုကြောင်းနှင့် ဆောင်ရွက်လိုသော လုပ်ငန်းများနှင့် ပတ်သက်သည့် အဆိုပြုလွှာများကို မြန်မာနိုင်ငံ ရင်းနှီးမြှုပ်နှံမှုကော်မရှင်ထံ တင်ပြစေလိုကြောင်း ဦးကျော်ဝင်းက ပြောကြားသည်။
မြန်မာနိုင်ငံအစိုးရနှင့် တရုတ်ပြည်သူ့သမ္မတနိုင်ငံ အစိုးရတို့အကြား စီးပွားရေးစြင်္ကံလမ်း တည်ထောင်ရေးဆိုင်ရာ နားလည်မှုစာချွန်လွှာ (မူကြမ်း) အတွက် အပြီးသတ် ညှိနှိုင်းမှုပြုလုပ်ပြီး ဖြစ်သည်။
တရုတ်နိုင်ငံ ယူနန်ပြည်နယ်မှ တရုတ်- မြန်မာနယ်စပ်ဒေသကို ဖြတ်ကျော်ကာ မန္တလေးမြို့အထိ၊ မန္တလေးမြို့မှ အရှေ့သို့ တန်းလာကာ ရန်ကုန်မြို့သစ်အထိ၊ မန္တလေးမြို့မှ အနောက်သို့ တန်းသွားကာ ကျောက်ဖြူအထူးစီးပွားရေးဇုန်အထိဟူသော တရုတ်-မြန်မာစီးပွားရေးစြင်္ကံကို အတူတကွ တည်ဆောက်ခြင်းနှင့် ပတ်သက်ပြီး မြန်မာဘက်နှင့် ဆွေးနွေးရန် ဆန္ဒရှိနေကြောင်း မြန်မာနိုင်ငံဆိုင်ရာ တရုတ်သံအမတ်ကြီး Mr. Hong Liang က ဖေဖော်ဝါရီ ၁ ရက်တွင် ဖော်ထုတ်ရေးသားမှုအပြီး ဖေဖော်ဝါရီ ၃ ရက်မှ ၇ ရက်အထိ တရုတ်နိုင်ငံ ပေကျင်းမြို့တွင် ကျင်းပမည့် တရုတ်- မြန်မာ စီးပွားရေးစြင်္ကံလမ်း တည်ထောင်ရေးနှင့် စပ်လျဉ်းသည့် အစည်းအဝေးသို့ တက်ရောက်ရန် စီမံကိန်းနှင့် ဘဏ္ဍာရေးဝန်ကြီးဌာန ပြည်ထောင်စုဝန်ကြီး၊ မြန်မာနိုင်ငံ ရင်းနှီးမြှုပ်နှံမှုကော်မရှင်ဥက္ကဋ္ဌ ဦးကျော်ဝင်း ဦးဆောင်သည့် ကိုယ်စားလှယ်အဖွဲ့ သွားရောက် ဆွေးနွေးမှုအပြီး အဆိုပါ နားလည်မှုစာချွန်လွှာကို လက်မှတ်ရေးထိုးလိုက်ခြင်း ဖြစ်သည်။
တရုတ်-မြန်မာအကြားတွင် အတူတူ ပိုင်ဆိုင်သော နယ်နိမိတ်မျဉ်းကြောင်းမှာ ကီလိုမီတာ ၂၂၀၀ ကျော် ရှည်လျားပြီး နှစ်နိုင်ငံ ပြည်သူလူထုအကြားရှိ ရိုးရာဆွေမျိုးပေါက်ဖော် ချစ်ကြည်ရေးသည် နှစ်ပေါင်းများစွာ ခိုင်ခိုင်မာမာ တည်ရှိခဲ့၍ နှစ်နိုင်ငံတို့က ဆိုးအတူပူအမျှ အိမ်နီးချင်းကောင်းဖြစ်ပြီး တူညီသော ကံကြမ္မာရှိသည့် နိုင်ငံဖြစ်ကြသည်။ လက်ရှိကာလတွင် မြန်မာနိုင်ငံနှင့် ပြည်သူလူထုက အမျိုးသားပြန်လည်သင့်မြတ်ရေးနှင့် ထာဝရငြိမ်းချမ်းရေး အကောင်အထည်ဖော်ခြင်း၊ ဖွံ့ဖြိုးမှုနှင့် လူမှုဘ၀ မြှင့်တင်ပေးခြင်းများကို အလိုလားဆုံး ဖြစ်သည်။
တရုတ်နိုင်ငံသည် ဆွေမျိုးပေါက်ဖော်အနေဖြင့် အစွမ်းကုန် ကူညီပေးရန် ဆန္ဒရှိပြီး မြန်မာနိုင်ငံရှိ ပါတီအသီးသီး၊ အဖွဲ့အစည်းအသီးသီးတို့ စည်းလုံးညီညွတ်စွာ ပူးပေါင်းဆောင်ရွက်ကြပြီး နိုင်ငံကောင်းမွန်စွာ တည်ဆောက်ကာ ဖွံ့ဖြိုးတိုးတက်လာရန် မျှော်လင့်ကြောင်း Mr. Hong Liang က ဖော်ထုတ်ရေးသားသည်။
