မော်လမြိုင်မြို့ရှိ ငွေမိုးဟိုတယ်တွင် ဖေဖော်ဝါရီ ၂၂ ရက်က JMC ဆိုင်ရာ အလုပ်ရုံဆွေးနွေးပွဲ ပြုလုပ်စဉ်
တရားဥပဒေစိုးမိုးရေးအတွက် နှစ်ဖက်တပ်များအနေဖြင့် တည်ဆဲတရားဥပဒေများအား လေးစားလိုက်နာရမည်ဖြစ်ကြောင်း မွန်ပြည်နယ် ပစ်ခတ်တိုက်ခိုက်မှု ရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ JMC-S (Mon) ဥက္ကဋ္ဌဖြစ်သူ အရှေ့တောင် တိုင်းစစ်ဌာနချုပ် တိုင်းမှူးဗိုလ်ချုပ်မျိုးဝင်းက ဖေဖော်ဝါရီ ၂၂ ရက် နံနက် ၉ နာရီက မော်လမြိုင်မြို့ရှိ ငွေမိုးဟိုတယ်တွင် ပြုလုပ်သော JMC ဆိုင်ရာ အလုပ်ရုံဆွေးနွေးပွဲ အဖွင့်အမှာစကားပြောကြား၌ ထည့်သွင်းပြောကြားခဲ့သည်။
“ဒီနေရာမှာ အဓိကအချက်ကတော့ တရားဥပဒေစိုးမိုးရေးပဲ ဖြစ်ပါတယ်။ တရားဥပဒေစိုးမိုးမှသာလျှင် လူတွေအားလုံးအေးအေးချမ်းချမ်းနဲ့နေထိုင်နိုင်ပြီးတော့ လူမှုစီးပွားတိုးတက်မှာ ဖြစ်ပါတယ်။ တရားဥပဒေ ဆိုတာကလည်း ဒီကနေ့တည်ဆဲဥပဒေတွေပဲ ဖြစ်ပါတယ်။ တည်ဆဲဥပဒေကိုလည်းပဲ လေးစားလိုက်နာရမှာ ဖြစ်ပါတယ်။ တည်ဆဲဥပဒေတွေကို လေ့လာမယ်။ လေ့လာမယ့် အချက်တွေပေါ်မူတည်ပြီး ကျွန်တော်တို့ လိုက်နာဆောင်ရွက်သွားမယ်ဆိုရင် ဘာအခက်အခဲမှရှိမှာ မဟုတ်ပါဘူး။ အဲ့ဒီတော့ နှစ်ဖက်တပ်ဖွဲ့၊ အဖွဲ့အစည်းတွေအနေနဲ့လည်း တရားဥပဒေကို လေးစားလိုက်နာရမှာ ဖြစ်ပါတယ်” ဟု ဗိုလ်ချုပ်မျိုးဝင်းက ပြောကြားသည်။
၎င်းက ဆက်လက်ပြီး “ကိုယ့်ဒေသနယ်မြေအတွင်း ဆောင်ရွက်လိုတဲ့ အချက်အလက်တွေရှိရင်လည်း ပူးပေါင်းညှိနှိုင်း ဆောင်ရွက်သွားကြရမှာ ဖြစ်ပါတယ်။ ပူးပေါင်းညှိနှိုင်း ဆောင်ရွက်ခြင်းအားဖြင့် အရာရာ ဖွံ့ဖြိုးတိုး တက်မှာ ဖြစ်ပါတယ်။ ဒါကြောင့် ဒီကနေ့ အလုပ်ရုံဆွေးနွေးပွဲကို တက်ရောက်လာတဲ့ တပ်မှူးတွေအနေနဲ့ ဒီ JMC ဆိုင်ရာလုပ်ငန်းစဉ်တွေရယ်၊ COC ဆိုတဲ့ Code of Conduct တွေကို သိရှိနားလည်ပြီး ကိုယ်ကိုယ်တိုင် သိရှိနားလည်ပြီး ဒီအချက်တွေကိုလည်းပဲ လိုက်နာဆောင်ရွက်ကြဖို့၊ မိမိရဲ့ကွပ်ကဲမှုအောက်မှာရှိတဲ့ အဆင့်အားလုံးကို ချပြရှင်းလင်းပြီးတော့ တရားဥပဒေနဲ့အညီ နေထိုင်လုပ်ကိုင်ခြင်း၊ JMC ဆိုင်ရာ လုပ်ငန်းစဉ်တွေကို အောင်မြင်အောင် အထောက်အကူပြုခြင်းအားဖြင့် ဒီဘက်က နိုင်ငံရေးဆွေးနွေးပွဲတွေ အောင်မြင်ပြီးတော့ ကျွန်တော်တို့ လိုလားတဲ့၊ အားလုံးသဘောတူတဲ့ ဒီမိုကရေစီကို အခြေခံတဲ့ ဖက်ဒရယ်ပြည်ထောင်စုကိုလည်း ရရှိမှာဖြစ်ပါတယ်” ဟု ပြောကြားသည်။
“JMC အနေနဲ့က ပစ်ခတ်တိုက်ခိုက်မှုတွေ မဖြစ်အောင်၊ နှစ်ဖက်တပ်တွေ ပဋိပက္ခ မဖြစ်အောင်၊ ထိတွေ့တိုက်ခိုက်မှုတွေမဖြစ်အောင် ကျွန်တော်တို့အနေနဲ့ ညှိနှိုင်းဆောင်ရွက်နေသလို၊ တစ်ဖက်ကလည်းပဲ UPDJC ကနေပြီးတော့ အားလုံးလက်ခံနိုင်မယ့် နိုင်ငံရေးဆိုင်ရာ ဆွေးနွေးပွဲတွေ ကျင်းပပြုလုပ်သွားမှာ ဖြစ်ပါတယ်။ JMC ဆိုတာက တစ်ဖက်က နိုင်ငံရေးဆွေးနွေးပွဲတွေ အောင်မြင်စွာ ဆောင်ရွက်နိုင်ဖို့အတွက် ငြိမ်းချမ်းရေးရရှိလေအောင်၊ ငြိမ်းချမ်းရေး တည်မြဲနေအောင်၊ ခိုင်မြဲနေအောင် ဆက်လက်ဆောင်ရွက်နေတဲ့ အဖွဲ့ပဲဖြစ်ပါတယ်။ တစ်ဖက်က စားပွဲဝိုင်းမှာ ဆွေးနွေးနေတဲ့အချိန်မှာ တစ်ဖက်က ပဋိပက္ခတွေဖြစ်ပွားနေလို့ရှိရင် ဆွေးနွေးပွဲတွေက ဘယ်လိုမှအဆင်ပြေချောမွေ့မှာ မဟုတ်ပါဘူး။ ဒါကြောင့် တိုင်းရင်းသားတွေ၊ ပြည်သူလူထုတွေ လိုလားနေတဲ့ ဒီမိုကရေစီကို အခြေခံတဲ့ ဖက်ဒရယ်ပြည်ထောင်စု ဖြစ်ပေါ်လာရေးအတွက် နိုင်ငံရေးဆွေးနွေးပွဲတွေ အောင်အောင်မြင်မြင်နဲ့ ဆွေးနွေးနိုင်ဖို့ လိုအပ်ပါတယ်။ ဒီလိုဆွေးနွေးနိုင်ဖို့အတွက်လည်း တစ်ဖက်က တိုင်ရင်းသားလက်နက်ကိုင် အဖွဲ့အစည်းတွေနဲ့ အစိုးရ၊ တပ်မတော်၊ တစ်ဖက်အဖွဲ့အစည်းတွေ ငြိမ်းငြိမ်းချမ်းချမ်းနဲ့ အတူပူးပေါင်းနေထိုင်ပြီး ဒေသအတွက် လိုအပ်တဲ့ ဖွံ့ဖြိုးမှုတွေ၊ အခြေခံအချက်တွေကို ပြည့်စုံအောင် တစ်ဖက်တစ်လမ်းက ဆောင်ရွက်ရမှာဖြစ်ပါတယ်” ဟု ဗိုလ်ချုပ်မျိုးဝင်းက ပြောကြားသည်။
“ဒီနေရာမှာ အချက်တစ်ချက်အနေနဲ့ စည်းမျဉ်းစည်းကမ်းများနှင့် စစ်ဘက်ဆိုင်ရာ ကျင့်ဝတ်များ (Code of Conduct- COC) က ဘာကိုအခြေခံလဲဆိုတော့ ကျွန်တော်တို့ နှစ်ဖက်တပ်တွေ လိုက်နာရမယ့် စည်းမျဉ်းစည်းကမ်းတွေ၊ ပြီးတဲ့အခါမှာ ပြည်သူလူထုအပေါ် ကျွန်တော်တို့ နှစ်ဖက်တပ်တွေအနေနဲ့ ကာကွယ်စောင့်ရှောက်ဖို့ တာဝန်ရှိပါတယ်။ ဒါကြောင့် ပြည်သူလူထုနဲ့ ပတ်သက်တဲ့ လိုက်နာရမယ့် အချက်အလက်တွေကိုလည်းပဲ သေချာကျေကျေလည်လည် သိရှိပြီးတော့ လိုက်နာဆောင်ရွက်ဖို့ လိုပါမယ်” ဟု ဗိုလ်ချုပ်မျိုးဝင်းက ဆက်လက်ပြောကြားသည်။
“တကယ်တမ်းလက်နက်ကိုင် ပဋိပက္ခတွေ ရှည်ကြာနေလေ၊ ယုံကြည်မှုအားနည်းလေပဲ ဖြစ်ပါတယ်။ ဒီလိုမျိုး ပဋိပက္ခရှည်ကြာနေတာကို ဒီအတိုင်းပဲ သွားကြမှာလား။ ဒါကို ကျွန်မတို့ စဉ်းစားကြရပါမယ်။ သို့သော်လည်း ယနေ့ မြန်မာနိုင်ငံရဲ့ အဓိကရည်မှန်းချက်၊ ယုံကြည်ချက်ပန်းတိုင်ဟာ ကျွန်မ ထင်ပါတယ်။ တကယ့်ငြိမ်းချမ်းရေးပါပဲ။ ထိုနည်းတူစွာပဲ ငြိမ်းချမ်းရေးဟာ မြန်မာနိုင်ငံရဲ့ အဓိက ရည်မှန်းချက်၊ ဘုံပန်းတိုင်ဖြစ်နေတဲ့အတွက် ဒီနေ့ ဒီမှာရှိနေတဲ့လူအားလုံးကလည်း နှလုံးသားထဲမှာ ငြိမ်းချမ်းရေးကို လိုချင်တမ်းတကြမယ်လို့ ယုံကြည်ပါတယ်။ ထို့နည်းတူစွာ ဒီကနေ့ ငြိမ်းချမ်းရေးကို အကောင်အထည်ဖော်ဆောင်တဲ့နေရာမှာ NCA လမ်းကြောင်းကနေ ပေါ်ပေါက်လာတဲ့ JMC ဟာ တကယ့် ဒေါက်တိုင်တစ်ခုပါပဲ။ JMC လုပ်ငန်းစဉ်တွေကိုလည်း ဒီအလုပ်ရုံ ဆွေးနွေးပွဲ တက်ရောက်လာသူများအနေနဲ့ ပိုမိုသိရှိပြီးတော့ ပူးပေါင်းဆောင်ရွက်ကြမယ်ဆိုရင် ကျွန်မတို့ မြန်မာနိုင်ငံရဲ့ တကယ့်ရည်မှန်းချက်ပန်းတိုင်ကို ရောက်ရှိနိုင်လိမ့်မယ်လို့ အရပ်သားကိုယ်စားလှယ်တစ်ယောက်အနေနဲ့ ယုံကြည်ပါတယ်” ဟု မွန်ပြည်နယ် ပစ်ခတ်တိုက်ခိုက်မှုဆိုင်ရာ ပူးတွဲစောင့်ကြည့်ရေးကော်မတီ JMC-S (Mon) ဒု ဥက္ကဋ္ဌ (၂) ဖြစ်သူ ဒေါ်နော်ဆာထူးက ပြောကြားသည်။
အဆိုပါ JMC ဆိုင်ရာ အလုပ်ရုံဆွေးနွေးပွဲသို့ အရှေ့တောင်တိုင်းစစ်ဌာနချုပ် တိုင်းမှူးဗိုလ်ချုပ်မျိုးဝင်း၊ မွန်ပြည်နယ်အစိုးရ အဖွဲ့ဝင် လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီးဝင်းနိုင်ဦးစသော မွန်ပြည်နယ် ပစ်ခတ်တိုက်ခိုက်မှုဆိုင်ရာ ပူးတွဲစောင့်ကြည့်ရေးကော်မတီဝင်များ၊ တပ်မတော်သား ကိုယ်စားလှယ်များ၊ တိုင်းရင်းသားလက်နက်ကိုင် အဖွဲ့အစည်းများမှ ကိုယ်စားလှယ်များ၊ အထွေထွေအုပ်ချုပ်ရေးဦးစီးဌာနမှ ခရိုင်နှင့် မြို့နယ်အဆင့် အုပ်ချုပ်ရေးမှူးများ တက်ရောက်ခဲ့ကြပြီး အလုပ်ရုံ ဆွေးနွေးပွဲအား ဖေဖော်ဝါရီ ၂၂ ရက်မှ ၂၃ ရက်ထိ နှစ်ရက်တာ ကျင်းပပြုလုပ်သွားမည်ဖြစ်ကြောင်း သိရသည်။
