အင်းလေးကန်၏ အစိတ်အပိုင်းတစ်နေရာကို တွေ့ရစဉ်
လုပ်ပိုင်ခွင့်အပြည့်အဝသာ ပေးထားမည်ဆိုပါက အင်းလေးကန်ကြီး ရေမခန်းအောင်လုပ်နိုင်ကြောင်း အင်းတိုင်းရင်းသားရေးရာဝန်ကြီး ဒေါက်တာထွန်းလှိုင်က ပြောကြားသည်။
ရှမ်းပြည်နယ်တောင်ပိုင်း၊ ညောင်ရွှေမြို့နယ်၊ အင်းလေးကန်ကြီးသည် ၂၀၁၀ ပြည့်နှစ် မှစတင်ကာ အပူချိန်မြင့်မားခြင်းကြောင့် ရေခန်းခြောက်ခြင်း ပြဿနာများနှင့် ကြုံတွေ့ရပြီး နှစ်စဉ်ရေခန်းလျက်ရှိပြီး အစိုးရသစ် တက်လာသော ၂၀၁၆ ခုနှစ်မှစတင်ကာ အင်းဝန်ကြီး ဒေါက်တာထွန်းလှိုင် ဦးဆောင်သောအဖွဲ့မှ အင်းလေးကန်တွင် လက်ရိုက်ဆည်များကို အင်းတောင်ဘက်ပိုင်းအထိ လက်ရိုက်ဆည်များ တည်ဆောက်ထားခြင်းကြောင့် ရေမခန်းတော့သည်မှာ နှစ်နှစ်ရှိပြီဖြစ်ကြောင်း၊ ယခု နှစ်နွေရာသီတွင်လည်း ရေခန်းခြောက်တော့ မည်မဟုတ်ဘဲ တစ်သက်လုံး ရေခန်းတော့ မည်မဟုတ်တော့ကြောင်း အင်းဝန်ကြီး ဒေါက်တာထွန်းလှိုင်က ပြောကြားလိုက်ခြင်း ဖြစ်သည်။
“အခုလုပ်နေတယ်လေ။ အင်းလေးကန် ရေရှည်ထိန်းသိမ်းရေးအတွက်ကတော့ တိတိကျကျလုပ်နေတယ်။ ကျန်တဲ့အဖွဲ့တွေကတော့ ပိုက်ဆံတောင်းနေတာနဲ့ပဲ ပြီးနေတာပဲ၊ ကျန်တဲ့အဖွဲ့တွေက ပိုက်ဆံဘယ်လိုတောင်း ရမလဲဆိုတာကိုပဲ စဉ်းစားနေကြတာ။ ဒါပါပဲ။ ကျွန်တော်တို့မှာလည်း ညွှန်ကြားချက်တွေ ရှိတယ်လေ။ DSO တွေနဲ့ ထဲထဲဝင်ဝင်ကို လုပ်လို့မရဘူးလေ။ အရပ်ဘက်အဖွဲ့အစည်းနဲ့ ရောရောနှောနှော မလုပ်ရဘူးလေ။ ရင်းရင်းနှီးနှီးတော့ နေလို့ရတာပေါ့။ ရောနှောပြီး သွားလာလို့တော့ မရဘူးလေ။ အင်းလေးကန်မှာ အရင်တုန်းက နှစ်ပေ၊ သုံးပေဟာ အခု ၁၂ ပေလောက်ရှိတယ်။ ဘယ်တော့မှ မခန်းတော့ဘူး။ ကျုပ်တို့က မနှောင့်ယှက်ဘူး။ ကျုပ်တို့ကို လုပ်ပိုင်ခွင့် ပေးထားမယ်ဆိုရင် ဒီထက်တက် ချင်လို့ရသေးတယ်။ ကျုပ်တို့က လုပ်ပိုင်ခွင့် အပြည့်အ၀ ပေးထားမယ်ဆိုရင် ရေဘယ်နှပေ ကျန်ချင်သလဲ၊ အဲဒါသာပြောပါ” ဟု အင်းဝန်ကြီး ဒေါက်တာထွန်းလှိုင်က ပြောကြားသည်။
ဆက်လက်၍ အင်းလေးကန်နှင့် ပတ်သက်၍ ဥပဒေများပြဋ္ဌာန်းပြီး ဆောင်ရွက်ရန်လိုအပ်ကြောင်း ညောင်ရွှေမြို့နယ် လွှတ်တော်ကိုယ်စားလှယ်များ ပြောကြားခဲ့ခြင်းနှင့် ပတ်သက်၍ သက်ဆိုင်ရာအစိုးရထံ တင်ပြရာတွင် ပြည်ထောင်စုအစိုးရနှင့်သာ သက်ဆိုင်သဖြင့် ပြည်ထောင်စုသို့တင်ပြရန်၊ အကြောင်းပြန်ခဲ့ကြောင်း သိရသည်။
ဖေဖော်ဝါရီ ၈ ရက်မှစတင်ကာ အင်းလေးကန် အုပ်ချုပ်ရေးရုံးခန်းတွင် ရုံးဝန်ထမ်းများကို စတင်ခန့်ထားကာလုပ်ငန်းများ ဆောင်ရွက်နေပြီဖြစ်ကြောင်း သိရသည်။
အင်းလေးကန်သည် လောပိတရေအား လျှပ်စစ်စက်ရုံအတွက် အထောက်အကူပြု ကန်ကြီးဖြစ်ပြီး၊ ရှေးယခင်က အလျား ၃၆ မိုင်၊ အနံ ရှစ်မိုင်ရှိခဲ့ပြီး ရေပြင်ဧရိယာ ၁၀၀ စတုရန်းမိုင်ရှိခဲ့ကြောင်း၊ ၁၉၉၆ ခုနှစ်တိုင်း တာချက်အရ မိုးရာသီတွင် ရေပြင်စတုရန်းမိုင် ၆၀၊ နွေရာသီတွင် ၄၀ စတုရန်းမိုင်သာရှိတော့ပြီး အနက်ဆုံးမှာ မိုးရာသီပေ ၂၀ နှင့် နွေရာ သီ ၁၂ ပေခန့်သာ ရှိတော့ကြောင်း သိရသည်။ ၂၀၀၇ စိစစ်ချက်အရ (က) မူလအင်းရေပြင်နယ်နိမိတ်မှာ ၆၆၉၆၇ ဧက ၁၀၄ ဒသမ ၆၃ စတုရန်းမိုင်၊ (ခ) လက်ရှိ အင်းရေပြင် နယ်နိမိတ်မှာ ၄၀၁၃၀ ဧက ၆၂ ဒသမ ၇၀ စတုရန်း မိုင်၊ (ဂ) လက်ရှိ အင်းရေပြင်ဧရိယာ ၁၅၆၆၉ ဧက၊ (ဃ) ကျွန်းရိုင်းဧရိယာ ၈၂၄၁ ဧက၊ (င) ကျွန်းမျှောဧရိယာ ၉၂၅၄ ဧက၊ (စ) လူနေ ထိုင်သည့်ဧရိယာ ၂၀၉၅ ဧက၊ (ဆ) စိုက်ပျိုး မြေ ၄၈၇၁ ဧကရှိကြောင်း သိရသည်။
အင်းလေးကန် ရေဝေရေလဲ ဒေသတွင်းသို့ စီးဝင်သော ချောင်းပေါင်း ၂၉ ချောင်းရှိပြီး၊ အဓိကကျသော နမ့်လတ်ချောင်း၊ နယ်ခြားချောင်း (ရေပယ်ချောင်း)၊ ကလောချောင်း (သန်းတောင်ချောင်း)၊ ဘီလူးချောင်းတို့မှာ ရာသီမရွေးစီးဝင်ကြောင်း သိရသည်။
လက်ရှိအချိန်တွင် ရေခန်းခြောက်ခြင်း မကြုံရသေးကြောင်း၊ ၂၀၁၆ ခုနှစ် အစိုးရသစ်လက်ထက်တွင် အင်းတိုင်းရင်းသားရေးရာဝန်ကြီး ဒေါက်တာထွန်းလှိုင်မှ လက်ရိုက်ဆည်များ တည်ဆောက်ထားခြင်းကြောင့် လတ်တလော နောက်ပိုင်းနှစ်များတွင်ရေများစွာ ထိန်း ထားနိုင်ခြင်းဖြစ်သည်။
