ပြည်တွင်း ပုံနှိပ်မီဒီယာလောက ရှင်သန်ဖွံ့ဖြိုးရေးအတွက် ကုန်သွယ်လုပ်ငန်းခွန် ကင်းလွတ်ခွင့်ပြုရန် စီမံကိန်းနှင့် ဘဏ္ဍာရေး ဝန်ကြီးဌာနနှင့် ညိနှိုင်းခဲ့ကြောင်း၊ ကင်းလွတ်ခွင့်ပေးပါက အခွန်များ ဆုံးရှုံးနိုင်သည်ကို ချင့်ချိန်သင့်ဟု အကြောင်းပြန်ကြောင်းနှင့် ၂၀၁၈ ခုနှစ် ပြည်ထောင်စု၏ အခွန်အကောက်ဥပဒေ ရေးဆွဲချိန်တွင် လွှတ်တော်ကိုယ်စားလှယ်များ၏ ဆွေးနွေးဆုံးဖြတ်မှုကို ခံယူသင့်ကြောင်း ပြန်ကြားရေးဝန်ကြီးဌာန ဒုတိယဝန်ကြီး ဦးအောင်လှထွန်းက ပြောကြားသည်။

ဇန်နဝါရီ ၂၉ ရက်က ပြုလုပ်သည့် အမျိုးသားလွှတ်တော် အစည်းအဝေးတွင် စစ်ကိုင်းတိုင်းဒေသကြီး မဲဆန္ဒနယ် အမှတ် (၅) မှ ဦးရဲထွဋ်က ပြန်ကြားရေး ဝန်ကြီးဌာန၊ မူပိုင်ခွင့်နှင့် မှတ်ပုံတင်ဌာနတွင် ထုတ်ဝေခြင်း အသိအမှတ်ပြုလက်မှတ် လျှောက်ထားရယူ၍ ပြည်တွင်းတွင် ထုတ်လုပ်ရောင်းချသော စာအုပ်၊ စာပေ၊ စာစောင်များ၊ နိုင်ငံတော်က သတ်မှတ်ထားသော ကုန်သွယ်မှု နည်းလမ်းဖြင့် ပြည်ပမှ တင်သွင်းရောင်းချသော စာအုပ်၊ စာပေ၊ စာစောင်များနှင့် ဆက်နွှယ်သော ဝန်ဆောင်မှု Supply Chain တစ်ခုလုံးကို ကုန်သွယ်လုပ်ငန်းခွန် ကောက်ခံခြင်းမှ ကင်းလွတ်ခွင့်ပြုပေးရန် အစီအစဉ်ရှိ မရှိ မေးမြန်းသည်။

အဆိုပါ မေးမြန်းမှုအား ဒုတိယဝန်ကြီး ဦးအောင်လှထွန်းက မြန်မာစာပေ ဖွံ့ဖြိုးတိုးတက်ရေးနှင့် ပြည်တွင်းပုံနှိပ် မီဒီယာလောက ရှင်သန်ဖွံ့ဖြိုးရေးအတွက် သက်ဆိုင်ရာ အဖွဲ့ အစည်းများ၏ မေတ္တာရပ်ခံမှုများအရ ပြည်တွင်းတွင် ပုံနှိပ်ထုတ်ေ၀ ရောင်းချသည့် စာအုပ်စာစောင်များ၊ ကုန်သွယ်မှု နည်းလမ်းများဖြင့် ပြည်ပမှ တင်သွင်းရောင်းချသည့် စာအုပ်စာစောင်များနှင့် ဆက်နွှယ်သော ဝန်ဆောင်မှု Supply Chain တစ်ခုလုံးကို ကုန်သွယ်လုပ်ငန်းခွန် ကောက်ခံခြင်းမှ ကင်းလွတ်ခွင့်ပြုပေးရန် ပြန်ကြားရေး ဝန်ကြီးဌာနအနေဖြင့် သက်ဆိုင်ရာ ဝန်ကြီးဌာနသို့ ညှိနှိုင်းပေးခဲ့ကြောင်း၊ စီမံကိန်းနှင့် ဘဏ္ဍာရေး ဝန်ကြီးဌာန၊ ပြည်တွင်းအခွန်များ ဦးစီးဌာန အနေဖြင့် ပြည်တွင်းတွင် ထုတ်လုပ်ရောင်းချနေသည့် စာအုပ် စာပေ၊ စာစောင်များထံမှ ၂၀၁၄-၂၀၁၅ ဘဏ္ဍာနှစ်တွင် ကျပ် ၂၈၀ ဒသမ ၅၇၈ သန်း၊ ၂၀၁၅- ၂၀၁၆ ဘဏ္ဍာနှစ်တွင် ကျပ် ၇၂၅ ဒသမ ၇၀၁ သန်း၊ ၂၀၁၆-၂၀၁၇ ဘဏ္ဍာနှစ်တွင် ကျပ် ၆၂၃ ဒသမ ၁၇၆ သန်း၊၂၀၁၇-၂၀၁၈ ဘဏ္ဍာနှစ် အောက်တိုဘာလအထိ ကျပ် ၂၃၆ ဒသမ ၂၈၄ သန်း ကောက်ခံရရှိခဲ့ကြောင်း၊ ၂၀၁၈ ခုနှစ် ပြည်ထောင်စု၏ အခွန်အကောက်ဥပဒေ ရေးဆွဲချိန်တွင် ပြဋ္ဌာန်းမည့်ဥပဒေကို ပြည် ထောင်စုလွှတ်တော်တွင် အတည်ပြု ဆုံးဖြတ်ရသည့်အတွက် ကိုယ်စားလှယ်တော်အနေဖြင့် လွှတ်တော်တွင် စာအုပ်စာပေ၊ စာစောင်များ အပေါ်မှ ကုန်သွယ်လုပ်ငန်းခွန် ကင်းလွတ်ခွင့် ပြဋ္ဌာန်းရရှိနိုင်ရေး ဝင်ရောက်ဆွေးနွေးဆုံး ဖြတ်မှုကို ခံယူသင့်ကြောင်း၊ ကင်းလွတ်ခွင့်များ ပေးပါက ဘဏ္ဍာနှစ် တစ်နှစ်အတွင်း ကောက်ခံရရှိနိုင်သည့် ကျပ်သန်းပေါင်းများစွာ အခွန်ဘဏ္ဍာငွေများ ဆုံးရှုံးနိုင်ခြေရှိသည်ကို ချင့်ချိန်ထည့်သွင်း ဆွေးနွေးသင့်သည်ဟု စီမံကိန်းနှင့် ဘဏ္ဍာရေး ဝန်ကြီးဌာနမှ အကြောင်း ပြန်လာကြောင်း ပြောကြားသည်။

ပြန်ကြားရေး ဝန်ကြီးဌာန အနေဖြင့် ပုံနှိပ်ခြင်းလုပ်ငန်း လုပ်ကိုင်သူများ၊ ထုတ်ဝေခြင်းလုပ်ငန်း လုပ်ကိုင်သူများ၊ သတင်းအေဂျင်စီလုပ်ငန်း လုပ်ကိုင်သူများကို ၂၀၁၄ ခုနှစ်တွင် ပြဋ္ဌာန်းခဲ့ပြီးဖြစ်သည့် ပုံနှိပ်ခြင်းနှင့် ထုတ်ဝေခြင်းလုပ်ငန်း ဥပဒေနှင့်အညီ အသိအမှတ်ပြု လက်မှတ်ကိုသာ ထုတ်ပေးခြင်းဖြစ်ကြောင်း၊ ယင်းလုပ်ငန်း လုပ်ကိုင်သူများ အနေဖြင့် စည်ပင်သာယာရေးအဖွဲ့မှ လုပ်ငန်းလုပ်ကိုင်ခွင့် လိုင်စင်ပေးခြင်း၊ လုပ်ငန်းအပေါ်ဝင်ငွေခွန်၊ အမြတ်ခွန်ကောက်ခံခြင်း၊ ကုန်သွယ်လုပ်ငန်းခွန် ကောက်ခံခြင်း စသည့်လုပ်ငန်းများကို စီမံကိန်းနှင့် ဘဏ္ဍာရေးဝန်ကြီးဌာန၊ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနတို့မှ သတ်မှတ်ထားသည့် ဥပဒေ၊ နည်းဥပဒေများ၊ လုပ်ထုံးလုပ်နည်းများအရ ဆောင်ရွက်သွားရမည်ဖြစ်ပြီး ပြန်ကြားရေး ဝန်ကြီးဌာန အနေဖြင့် သီးခြားဆောင်ရွက်ခြင်း မရှိကြောင်း ဒုတိယဝန်ကြီးက ပြောကြားသည်။

ပြန်ကြားရေး ဝန်ကြီးဌာနအနေဖြင့် အများပြည်သူအတွက် အသိပညာ ဗဟုသုတ တိုးတက်စေမည့် စာအုပ်စာပေ ထုတ်လုပ်ဖြန့်ချိရေး လုပ်ငန်းများ ဖွံ့ဖြိုးတိုးတက်ရေးကို လိုလားကြောင်း၊ အခွန်အကောက်များ လျှော့ချပေးမည်ဆိုပါက ထောက်ခံကြောင်း၊ သို့ရာတွင် အခွန်ဘဏ္ဍာကိစ္စသည် ပြန်ကြားရေး ဝန်ကြီးဌာန၏ ဆောင်ရွက်မှု နယ်ပယ်တွင် မရှိကြောင်း ဒုတိယဝန်ကြီးက ပြောကြားသည်။

လွှတ်တော်ကိုယ်စားလှယ် ဦးရဲထွဋ်က “ဒီမိုကရေစီခေတ်မှာတော့ ဒါတွေက မြန်မြန်ဆန်ဆန်နဲ့ ဦးစားပေး လုပ်ရမှာပေါ့။ အခွန်တွေ ဘယ်လောက်လျော့သွားမယ်ဆိုတာ ပြောရမယ့်အစား တခြားနေရာကနေ Cover လုပ်ရမယ်လေ။ စာပေနဲ့ ပတ်သက်တာ ဦးစားပေး သုံးရမှာပေါ့။ တခြားကနေ Cover လုပ်ရမှာပေါ့” ဟု သတင်းထောက်များအား ဆိုသည်။

ဦးအောင်လှထွန်းက “တဖြည်းဖြည်းလာမှာပေါ့။ နိုင်ငံပိုင်သတင်းစာနဲ့ ပတ်သက်လို့ သူပြောတဲ့သဘောက မှန်တယ်။ ဒီမိုကရေစီ နိုင်ငံတွေမှာ ဥရောပနိုင်ငံတွေမှာ။ တချို့နိုင်ငံဆိုရင် ပြန်ကြားရေး ဝန်ကြီးဌာနတောင် မရှိဘူး။ ဒါပေမဲ့ ကျွန်တော်တို့အတွက် တကယ့်စစ်မှန်တဲ့ Role Model မဟုတ်သေးဘူးပေါ့။ ကျွန်တော်တို့က ဒီမိုကရေစီက သုံးနှစ်သားပဲ ရှိသေးတာကိုး။ ဒီအသွင်ကူးပြောင်းရေး ကာလမှာ ပြန်ကြားရေး ဝန်ကြီးဌာနလည်း ရှိသင့်တယ်။ နိုင်ငံပိုင် သတင်းစာလည်း ရှိသင့်တယ်။ တစ်စုံတစ်ရာထိ ရှိသင့်ပါတယ်။ အရေးကြီးတာက နိုင်ငံပိုင် သတင်းစာတွေက တကယ့်ကို ပြည်သူကို မျက်နှာမူပြီး နိုင်ငံရဲ့ Narrative ပေါ့။ ပြည်သူနဲ့ အစိုးရကြားမှာ ပေါင်းစပ်ပေးဖို့ နိုင်ငံနဲ့ နိုင်ငံတကာကြားမှာ ပေါင်းစပ်ပေးနိုင်ဖို့ အဲဒါကို ထိထိရောက်ရောက် ဆောင်ရွက်ပေးနိုင်ဖို့ပဲ အရေးကြီးပါတယ်။ လောလောဆယ် အဲဒါကို ဦးစားပေး ဆောင်ရွက်ဖို့ စိတ်ကူးရှိပါတယ်။ တစ်စုံတစ်ရာ ကာလအထိ ရှိနေဦးမှာပါ နိုင်ငံပိုင် သတင်းစာကလေ။ နိုင်ငံအနေအထားအရ လိုအပ်နေသေးတာပေါ့။ တစ်ချိန်ကျရင်တော့ ဒီမိုကရေစီ ရင့်သန်လာရင် တစ်ဖြည်းဖြည်း တိုးတက်သွားမှာပေါ့” ဟု သတင်းထောက်များအား ပြောကြားသည်။

သတင်းထောက်တစ်ဦးက “နိုင်ငံပိုင် သတင်းစာနှစ်စောင် ဖြစ်နေတော့ နုနယ်တဲ့ ပုဂ္ဂလိက သတင်းစာကို သတ်နေသလို ဖြစ်မနေဘူးလား” ဟု မေးမြန်းချက်အား ဒုတိယဝန်ကြီးက “သတ်နေတာတော့ မဟုတ်ဘူးပေါ့လေ။ ဒါတစ်ခုခုတော့ စီစဉ်ရမှာပေ့ါ။ ကျွန်တော့် စိတ်ကူးထဲမှာတော့ ရှိပါတယ်။ ကျွန်တော် အရင်ကလည်း မရယူခင်ကလည်း ကျွန်တော် အဲဒါမျိုးတွေ ဖြေကြားဖူးပါတယ်။ အဲဒါက လိုအပ်တဲ့ဟာ။ ဘာကြောင့်လဲဆိုရင် ပုဂ္ဂလိကမီဒီယာ လုံးဝအားနည်းလို့မရဘူး။ ဘာလို့လဲဆို ဒီမိုကရေစီ လူ့ဘောင်တစ်ခုမှာ တကယ့်ကို နိုင်ငံရဲ့ Narrative ကို ကမ္ဘာကို တင်ပြနိုင်တဲ့ဟာက ပုဂ္ဂလိကမီဒီယာပေါ့။ ပုဂ္ဂလိကမီဒီယာ အားကောင်းဖို့ သိပ်ကိုလိုအပ်ပါတယ်။ ပုဂ္ဂလိက မီဒီယာဆို အခုဆို မြန်မာ Language တစ်ခုပဲ ရှိတယ်။ နိုင်ငံတကာ ဘာသာစကားတွေနဲ့။ အရေးကြီးဆုံးက သတင်းအချက်အလက် ရရှိပိုင်ခွင့်ပေါ့။ ဒါ့အပြင် ဘဏ္ဍာရေးအရ ရပ်တည်ခွင့် သိပ်အရေးကြီးတယ်။ ပြည်တွင်းက ပုဂ္ဂလိက မီဒီယာတွေဟာ ငွေရေးကြေးရေးအရ အမှီအခို ကင်းဖို့လိုပါတယ်။ အထူးသဖြင့် ပြည်ပက အဖွဲ့အစည်းတွေဆီက သြဇာခံ ဖြစ်လို့မရဘူး။ ဘာဖြစ်လို့လဲဆိုရင် ပြည်ပက တစ်ခုခု လက်ခံလိုက်ပြီဆိုရင် Editorial Policy ပေါ့။ အဲဒီကို ထိခိုက်နိုင်တယ်။ မထိခိုက်တဲ့၊ အဲဒီလို လွှမ်းမိုးဖို့ မကြိုးစားတဲ့ အဖွဲ့အစည်းတွေလည်း ရှိပါတယ်။ ဒါပေမဲ့ လွှမ်းမိုးဖို့ကြိုးစားတဲ့ အဖွဲ့အစည်းလည်းရှိတယ်။ အဲဒါမျိုးတွေကျတော့ မဖြစ်သင့်ဘူးပေါ့။ အားပေးဖို့လိုတယ်။ ပုဂ္ဂလိကမီဒီယာ ဖွံ့ဖြိုးရေးကို တန်ဖိုးထားပါတယ်။ ရှေရှည်မှာ ပုဂ္ဂလိက မီဒီယာကပဲ ပုံဖော်သွားမှာကိုး။ ဒီမိုကရေစီတိုင်းမှာ ပုဂ္ဂလိကမီဒီယာကပဲ လုပ်နေကြတာကိုး။ အဲဒီနိုင်ငံရဲ့ Narrative ခေါ်တာပေါ့။ အဲဒီနိုင်ငံ အကြောင်းကို ကမ္ဘာကိုတင်ပြတဲ့ အလုပ်ပေါ့။ ကျွန်တော်တို့မှာ ပုဂ္ဂလိက မီဒီယာကလည်း သုံးနှစ်သားပဲ ရှိသေးတယ်။ ဒီမိုကရေစီကလည်း လေးငါးနှစ်သားပဲ ရှိသေးတယ်။ အသက်ကတော့ ခုနစ်ဆယ် ကျော်ပြီပေါ့လေ။ နိုင်ငံလွတ်လပ်ရေးရတာ ခုနစ်ဆယ်ကျော်ပြီ။ ကျွန်တော်တို့ရဲ့ အဖြစ်က အသက် ၇၀ ကျော်မှ အခုမှ လမ်းလျှောက်သင်သလို ဖြစ်နေတယ်။ အဲဒါကို နည်းနည်းစိတ်ရှည်ပေးဖို့ လိုပါတယ်” ဟု ပြောကြားသည်။