စက်တင်ဘာ ၇ ရက်က မောင်တောမြို့အနီး ကင်းလှည့်နေကြသော မြန်မာရဲတပ်ဖွဲ့ဝင်များ (Photo : AFP)

လူသားချင်း စာနာထောက်ထားမှုဆိုင်ရာ ဝန်ထမ်းများနှင့် ဂျာနယ်လစ်များအား ဘင်္ဂါလီမွတ်စလင် ၆၅၀,၀၀၀ ဘင်္ဂလားဒေ့ရှ်သို့ ထွက်ပြေးခဲ့ရသည့် အကြမ်းဖက်မှုများ ဖြစ်ပွားရာ မြန်မာနိုင်ငံ ရခိုင်ပြည်နယ်သို့ လွတ်လပ်စွာ ဝင်ရောက်ခွင့်ပြုရန် အကျပ်အတည်းဆိုင်ရာ နိုင်ငံတကာ အကြံပေးအဖွဲ့သစ်၏ အကြီးအကဲက တောင်းဆိုခဲ့သည်။

ထိုင်းနိုင်ငံခြားရေး ဝန်ကြီးဟောင်းဖြစ်သူ ဆူရာကီအက်ဆာသီရာထိုင်းက လွန်ခဲ့သည့်လက မြန်မာနိုင်ငံတွင် ရိုက်တာသတင်းထောက် နှစ်ဦးအား ဖမ်းဆီးခဲ့မှုနှင့် ပတ်သက်၍ စိုးရိမ်မိကြောင်းလည်း ဖော်ပြခဲ့ပြီး ၎င်းအနေဖြင့် ယင်းကိစ္စသည် နိုင်ငံတကာ မီဒီယာများအား ပိုမိုကျယ်ပြန့်စွာ ကန့်သတ်ပိတ်ပင်မှုများဆီသို့ ဦးတည်မသွားစေရန် မျှော်လင့်မိသည်ဟုလည်း ပြောကြားခဲ့သည်။

“စာနယ်ဇင်းတွေနဲ့ လူသားချင်းစာနာ ထောက်ထားမှုဆိုင်ရာ အဖွဲ့တွေ ရခိုင်ပြည်နယ်ကို ဝင်ခွင့်ရရေးဟာ အရေးကြီးတဲ့ကိစ္စ ဖြစ်သလို တခြားသက်ဆိုင်ရာ ပုဂ္ဂိုလ်တွေလည်း ဝင်ခွင့်ရဖို့ အရေးကြီးပါတယ်” ဟု ဆူ ရာကီအက်က ဘန်ကောက်မြို့တွင် ပြုလုပ်သော တွေ့ဆုံမေးမြန်းခန်း တစ်ခု၌ ပြောကြားခဲ့သည်။ သူက “တရားဝင် သတင်းရေးသားမှုတွေဟာ အားပေးသင့်တဲ့ကိစ္စ ဖြစ်ပါတယ်” ဟုလည်း ပြောကြားခဲ့သည်။

မြန်မာနိုင်ငံတွင် ဘင်္ဂါလီမွတ်စလင် အကြမ်းဖက်သမားများ၏ တိုက်ခိုက်မှုများကို တုံ့ပြန်သောအားဖြင့် တပ်မတော်က စစ်ဆင်ရေးတစ်ရပ် ဆောင်ရွက်ခဲ့ရာ ရခိုင်ပြည်နယ်သို့ ဝင်ရောက်ခွင့်ကို ပြင်းပြင်းထန်ထန် ပိတ်ထားခဲ့သည်။ တပ်မတော်၏ စစ်ဆင်ရေးကို ကုလသမဂ္ဂက လူမျိုးစုလိုက် သုတ်သင်မှုဟု ပြစ်တင်ရှုတ်ချ ခဲ့သော်လည်း ဗုဒ္ဓဘာသာဝင်အများစု နေထိုင်သော မြန်မာနိုင်ငံက ယင်းစွပ်စွဲချက်ကို ပယ်ချခဲ့သည်။

ကုလသမဂ္ဂ အတွင်းရေးမှူးချုပ်ဟောင်း ကိုဖီအာနန် ဦးဆောင်သည့် အစောပိုင်း ကော်မရှင်တစ်ရပ်၏ အကြံပြုချက်များကို မည်သို့မည်ပုံ အကောင်အထည် ဖော်ရမည်ကို အကြံပေးမည့် အဖွဲ့ဝင် ၁၀ ဦး ပါဝင်သော ဘုတ်အဖွဲ့အား ဦးဆောင်ရန် မြန်မာခေါင်းဆောင် ဒေါ်အောင်ဆန်းစုကြည်က ဆူရာကီအက် (၅၉ နှစ်) ကို ရွေးချယ်ခဲ့သည်။

ကာလကြာရှည်ခဲ့ပြီဖြစ်သော ရခိုင်ပြည်နယ်၏ လူမျိုးရေးနှင့် ဘာသာရေး တင်းမာမှုများကို ဖြေရှင်းရန်အတွက် စုံစမ်းစစ်ဆေးမှုများ ပြုလုပ်ရန် ၂၀၁၆ ခုနှစ်က ဒေါ်အောင်ဆန်းစုကြည် ခန့်အပ်ခဲ့သည့် ကိုဖီအာနန်၏ ကော်မရှင်မှ ထုတ်ပြန်သော ၆၃ မျက်နှာပါသည့် အစီရင်ခံစာတွင် လွတ်လပ်သော မီဒီယာများကို သတင်းရယူ ရေးသားခွင့်ပြုရန်သည် အထူးအကြံပြုချက် တစ်ရပ်အဖြစ် ပါဝင်သည်။

ရခိုင်ပြည်နယ်၌ ဖြစ်ပွားသော ပဋိပက္ခများနှင့် ပတ်သက်၍ သတင်းရေးသားခဲ့သော ရိုက်တာသတင်းထောက် နှစ်ဦးဖြစ်သည့် ဝလုံးနှင့် ကျော်စိုးမိုးတို့အား မြန်မာနိုင်ငံ၏ တရားဝင် လျှို့ဝှက်အက်ဥပဒေအား ချိုးဖောက်မှုနှင့် ပတ်သက်၍ သင်္ကာမကင်းဖြစ်ကာ ဒီဇင်ဘာ ၁၂ ရက်က ရန်ကုန်မြို့တွင် ဖမ်းဆီးခဲ့သည်။

Ref : Reuters