စိုက်ပျိုးရေးနှင့် မွေးမြူရေးအခြေခံ စီးပွားရေးလုပ်ငန်းများကို မြန်မာ့လယ်ယာဖွံ့ဖြိုးရေးဘဏ်မှ အတိုးနှုန်း ကိုးရာခိုင်နှုန်းဖြင့် ဘဏ်ချေးငွေထုတ်ပေးမည်ဖြစ်ပြီး အနည်းဆုံး ကျပ်သိန်း ၂၀၀ မှ အများဆုံး ကျပ်သိန်း ၅၀၀၀ အထိ ချေးငွေရယူနိုင်မည်ဖြစ်ကြောင်း မြန်မာ့လယ်ယာဖွံ့ဖြိုးရေးဘဏ်က ဇန်နဝါရီ ၁ ရက်တွင် သတင်းထုတ်ပြန်သည်။
ထိုသို့ ချေးငွေထုတ်ချေးပေးမည့် လုပ်ငန်းများမှာ စိုက်ပျိုးရေးနှင့် မွေးမြူရေးအခြေခံ စီးပွားရေးလုပ်ငန်းများဖြစ်သည့် မျိုးစေ့သန့်စင်စက်၊ အခြောက်ခံစက်၊ သိုလှောင်ရုံ၊ အစာစပ်စက် ၊ သီးနှံကြိတ်ခွဲစက်၊ ဆန်စက်၊ ဆီစက်၊ အရည်အသွေးမြင့်ထုတ်ကုန်ထုတ်လုပ်သည့် စက်ရုံများ၊ ထုပ်ပိုးစက်၊ နှစ်တို နှစ်လတ် သီးနှံစိုက်ပျိုးထုတ်လုပ်မှုလုပ်ငန်းများ၊ မွေးမြူရေးလုပ်ငန်းများ၊ အထူးသဖြင့် ပို့ကုန်တိုးမြှင့် ထုတ်လုပ်နိုင်သည့်လုပ်ငန်းများ၊ သွင်းကုန်အစားထိုးလုပ်ငန်းများဖြစ်ပြီး သက်ဆိုင်ရာ တိုင်းဒေသကြီး/ပြည်နယ် လယ်ယာမြေ စီမံခန့်ခွဲမှုကော်မတီနှင့် သက်ဆိုင်ရာအသင်းချုပ်များ၏ ထောက်ခံတင်ပြသည့် လုပ်ငန်းများကို ဦးစားပေးထုတ်ချေးသွားမည်ဖြစ်သည်။
ထိုသို့ ချေးငွေထုတ်ချေးရာတွင် နှစ်တို ချေးငွေအဖြစ် သက်တမ်းသုံးနှစ်၊ နှစ်လတ် ချေးငွေအဖြစ် သက်တမ်းငါးနှစ် သတ်မှတ်ပြီး အတိုးနှုန်းမှာ တစ်နှစ်လျှင် ကိုးရာခိုင်နှုန်းဖြစ်ကြောင်း သိရသည်။ ချေးငွေပမာဏမှာ လုပ်ငန်းနှင့် အာမခံပစ္စည်းအပေါ် မူတည်၍ ကျပ် သိန်း ၂၀၀ မှ ကျပ် သိန်း ၅၀၀၀ အထိ ထုတ်ချေးပေးမည်ဖြစ်သည်။
ချေးငွေရယူနိုင်ရန် တင်ပြရန်လိုအပ်သည့် အာမခံပစ္စည်းများမှာ လယ်ယာလုပ်ကိုင်ခွင့်ပုံစံ(၇)၊ လန-၃၉(သို့မဟုတ်) လယ်ယာမြေဥပဒေပုဒ်မ ၃၀ (က)နှင့် (ခ)အရ အခြားသုံးစွဲခွင့် သို့မဟုတ် မြေငှားလိုင်စင်/ ဂရန် သို့မဟုတ် ဘိုးဘွားပိုင်မြေ၊ မြေသုံးစွဲခွင့်ပြုမိန့် မူရင်းနှင့် မရွှေ့မပြောင်းနိုင်သောပစ္စည်းများကို ချေးငွေအာမခံအဖြစ် တင်သွင်းရန် လိုအပ်ပြီး ရွှေ့ပြောင်းနိုင်သော ပစ္စည်းများကို
လည်း ချေးငွေအာမခံအဖြစ် ပေးအပ်နိုင်မည်ဖြစ်သည်။ အာမခံပစ္စည်းမပေးနိုင်သူများအနေဖြင့် လုပ်ငန်းကောင်းမွန်ပါက ချေးငွေအာမခံအဖွဲ့အစည်းနှင့် ချိတ်ဆက် ဆောင်ရွက်နိုင်မည်ဖြစ်ပြီး ချေးငွေအာမခံ အဖွဲ့အစည်းနှင့် ချိတ်ဆက်ဆောင်ရွက်ပါက ချေးငွေပမာဏကို အများဆုံး ကျပ် သိန်း ၂၀၀ အထိ ထုတ်ပေးမည်ဖြစ်သည်။
ထိုသို့ ချေးငွေထုတ်ချေးပေးပြီးပါက ချေးငွေပြန်လည်ပေးဆပ်ရန် သုံးနှစ်သက်တမ်းရှိသော နှစ်တိုချေးငွေအတွက် ဆိုင်းငံ့ကာလတစ်နှစ်နှင့် ကျသင့်အတိုးကို သုံးလတစ်ကြိမ်ကောက်ခံပြီး အရင်းပေးဆပ်မှုကို နှစ်နှစ်အတွင်း ခြောက်လတစ်ကြိမ်ဖြင့် လေးရစ် ပေးဆပ်ရန် သတ်မှတ်ထားသည်။
ငါးနှစ်သက်တမ်းရှိသော ချေးငွေအတွက် ဆိုင်းငံ့ကာလ နှစ်နှစ်၊ ကျသင့်အတိုးကို သုံးလတစ်ကြိမ်ဖြင့် ကောက်ခံပြီး အရင်းပေးဆပ်မှုကို သုံးနှစ်အတွင်း ခြောက်လ တစ်ကြိမ်ဖြင့် ခြောက်ရစ်ပေးဆပ်ရမည်ဖြစ်ကြောင်း မြန်မာ့လယ်ယာဖွံ့ဖြိုးရေးဘဏ်က ထုတ်ပြန်ထားသည်။
