ဒီဇင်ဘာ ၁၄ ရက်က ထိုင်းနိုင်ငံ ချင်းမိုင်မြို့၌စတင်သော NCA ရေးထိုးထားသည့် တိုင်းရင်းသား လက်နက်ကိုင်အဖွဲ့များ၏ ၂၁ ရာစု ပင်လုံအစည်းအဝေးအတွက် ကြိုတင်ပြင်ဆင်မှုဆိုင်ရာ ဆွေးနွေးပွဲ (Photo - KNU)
တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) ရေးထိုးထားသည့် တိုင်းရင်းသားလက်နက်ကိုင်ရှစ်ဖွဲ့၏ ငြိမ်းချမ်းရေးလုပ်ငန်းစဉ် ဦးဆောင်အဖွဲ့ (PPST) နှင့် လုပ်ငန်းကော်မတီများအကြား ပြည်ထောင်စုငြိမ်းချမ်းရေး ညီလာခံ-၂၁ ရာစု ပင်လုံတတိယအစည်းအဝေးအတွက် ကြိုတင်ပြင်ဆင်မှုဆိုင်ရာ ဆွေးနွေးပွဲကို ထိုင်းနိုင်ငံ၊ ချင်းမိုင်မြို့တွင် ဒီဇင်ဘာ ၁၄ ရက်မှ ၁၈ ရက်အထိ ပြုလုပ်လျက်ရှိသည်။
အဆိုပါဆွေးနွေးပွဲကာလအတွင်း လာမည့် ၂၁ ရာစု ပင်လုံညီလာခံ တတိယအစည်းဝေးတွင်တင်ပြမည့် ကဏ္ဍကြီး ငါးခုဖြစ်သော နိုင်ငံရေးကဏ္ဍ၊ စီးပွားရေးကဏ္ဍ၊ လူမှုရေးကဏ္ဍ၊ မြေယာနှင့် သဘာဝပတ်ဝန်းကျင်ကဏ္ဍနှင့် လုံခြုံရေးကဏ္ဍတို့ကို အသေးစိတ် ပြန်လည်ဆွေးနွေးသွားမည်ဖြစ်ကြောင်း NCA ရေးထိုးထားသည့် တိုင်းရင်းသားလက်နက်ကိုင်အဖွဲ့များ၏ရုံးမှ သတင်းထုတ်ပြန်ချက်အရ သိရသည်။
“EAO တွေအကြား လက်ရှိနိုင်ငံရေး ဖြစ်ပေါ်တိုးတက်မှုများအပေါ် ရှုမြင်သုံးသပ်မှု မတူကြတဲ့အခြေခံကနေ NCA လက်မှတ်ထိုးသူ၊ မထိုးသူတွေ ရယ်လို့ဖြစ်နေတဲ့ အခုလို အနေအထားမှာ အားလုံးလက်ခံနိုင်တဲ့၊ လက်ခံပြီးဖြစ်တဲ့ ဒီမိုကရေစီနဲ့ ဖက်ဒရယ်ပြည်ထောင်စုဆိုင်ရာ အခြေခံမူတွေကို ဦးစွာဆွေးနွေးရယူဖို့ လိုအပ်တယ်လို့ မြင်ပါတယ်။ မှန်ကန်ပြီးတရားမျှတတဲ့ နိုင်ငံရေးဆွေးနွေးပွဲ အခင်းအကျင်းတွေနဲ့ အောင်မြင်တဲ့ဆွေးနွေးမှု ရလဒ်တွေဟာ နောက်ထပ် NCA လက်မှတ်ရေးထိုးမယ့် အဖွဲ့အစည်းတွေ ထပ်မံပေါ်ပေါက်လာရေးကို အားပေးမှာဖြစ်ပါတယ်” ဟု PPST အဖွဲ့ခေါင်းဆောင် ကရင်အမျိုးသားအစည်းအရုံး (KNU) ဥက္ကဋ္ဌ ဗိုလ်ချုပ်ကြီး စောမူတူးစေးဖိုးက ပြောကြားသည်။
ထို့ပြင် တိုင်းရင်းသားလက်နက်ကိုင် ရှစ်ဖွဲ့မှ ကဏ္ဍငါးခု၏ လုပ်ငန်းကော်မတီငါးခု၏ ခေါင်းဆောင်အသီးသီးက ၎င်းတို့ပြင်ဆင်ထားသည့် သက်ဆိုင်ရာကဏ္ဍအသီးသီးမှ စာတမ်းများအား ငြိမ်းချမ်းရေးလုပ်ငန်းစဉ် ဦးဆောင်အဖွဲ့ (PPST) ထံသို့ တင်ပြဆွေးနွေးကြမည်ဖြစ်ပြီး ငြိမ်းချမ်းရေး လုပ်ငန်းစဉ်အလုပ်အဖွဲ့ (PPWT) ၊ ကဏ္ဍအလိုက်ပါဝင်သည့် လုပ်ငန်းကော်မတီဝင်များ တက်ရောက်လျက်ရှိကြောင်း သိရသည်။
NCA ရေးထိုးထားသည့် တိုင်းရင်းသား လက်နက်ကိုင်အဖွဲ့များမှာ ကရင်အမျိုးသား အစည်းအရုံး (KNU) ၊ ရှမ်းပြည်ပြန်လည်ထူထောင်ရေးကောင်စီ (RCSS/ SSA) ၊ ပအိုဝ်းအမျိုးသား လွတ်မြောက်ရေးအဖွဲ့ချုပ် (PNLO) ၊ ချင်းအမျိုးသားတပ်ဦး (CNF) ၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး (ABSDF)၊ ရခိုင်ပြည်လွတ်မြောက်ရေးပါတီ (ALP) ၊ DKBA ၊ KNU/ KNLA-PC တို့ဖြစ်ကြသည်။
ယခုနှစ်အတွင်း ပြုလုပ်ခဲ့သည့် ၂၁ ရာစု ပင်လုံဒုတိယအစည်းအဝေးတွင် ပြည်ထောင်စု သဘောတူစာချုပ်၏ အစိတ်အပိုင်း (၁) အဖြစ် အခြေခံမူ အချက် ၃၇ ချက်အား ချမှတ်ခဲ့သော်လည်း ဖက်ဒရယ်မူနှင့်ပတ်သက်ပြီး မရရှိသေးသည့်အတွက် လာမည့်ညီလာခံတွင် ဖက်ဒရယ်မူများရရှိအောင် ကြိုးစားသွားမည်ဖြစ်ကြောင်း ဒေါက်တာ ဆလိုင်းလျန်မှုန်းဆာခေါင်းက ပြောကြားထားသည်။
“ပြီးခဲ့တဲ့ညီလာခံမှာ ၃၇ ချက်ကို ရတယ်ဆိုပေမယ့် ကျွန်တော်တို့ဖက်ဒရယ် Principle တွေနဲ့ ပတ်သက်လို့သော်လည်းကောင်း အခြေခံ Principle တွေနဲ့ပတ်သက်လို့သော်လည်းကောင်း ကျွန်တော်တို့လိုချင်တာ တကယ့်အနှစ်သာရရှိတဲ့ Principle တွေ မရသေးဘူး။ အဲဒီအတွက်ကြောင့် လာမယ့်ညီလာခံမှာ အနည်းဆုံးတော့ ဖက်ဒရယ် Principle တွေကို အားလုံးအပြည့်အစုံရနိုင်ဖို့ ကြိုးစားသွားမှာ ဖြစ်တယ်” ဟု ဒေါက်တာ ဆလိုင်းလျန်မှုန်းဆာခေါင်းက ပြောကြားသည်။
ပြည်ထောင်စု ငြိမ်းချမ်းရေးညီလာခံအား တစ်နှစ်လျှင် အနည်းဆုံးနှစ်ကြိမ်ကျင်း ပရန်ဆုံးဖြတ်ထားသဖြင့် ထပ်မံကျင်းပမည့် တတိယအကြိမ်အစည်းအဝေးအား ဒီဇင်ဘာလအတွင်းကျင်းပရန် အစိုးရဘက်က ဆန္ဒရှိသော်လည်း အမျိုးသားအဆင့် နိုင်ငံရေးဆွေးနွေးပွဲများ ထပ်မံမကျင်းပနိုင်မှုအပါအဝင် အဆင်သင့်မဖြစ်သေးဟု တိုင်းရင်းသားလက်နက်ကိုင်အဖွဲ့များဘက်က ယူဆကာ ၂၀၁၈ ခုနှစ် နှစ်ဆန်းတွင် ကျင်းပရန်အဆိုပြုခဲ့ပြီး နိုဝင်ဘာ ၂၇ ရက်ကပြုလုပ်သည့် ခြောက်ကြိမ်မြောက် JICM အစည်းအဝေးတွင် ၂၁ ရာစု ပင်လုံတတိယအစည်းအဝေးအား လာမည့်ဇန်နဝါရီလကုန်ပိုင်းတွင် ကျင်းပရန် ဆုံးဖြတ်ထားသည်။
ထို့အတူ တပ်မတော်နှင့် RCSS/ SSA တို့အကြား နေရာအငြင်းပွားမှုကြောင့် လူမျိုးအလိုက် အမျိုးသားအဆင့် နိုင်ငံရေးဆွေးနွေးပွဲ (ရှမ်း) ကျင်းပနိုင်ခြင်း မရှိသေးမှုအပေါ် JICM အစည်းအဝေးတွင် နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၏ ကြားဝင်ညှိနှိုင်းပေးမှုအရ ရှမ်းပြည်နယ် လင်းခေးမြို့တွင် လူမျိုးအလိုက်အမျိုးသားအဆင့် နိုင်ငံရေးဆွေးနွေးပွဲ (ရှမ်း) အား ကျင်းပရန် တပ်မတော်နှင့် RCSS/ SSA နှစ်ဖက်စလုံးက သဘောတူခဲ့သည်။
