<

First Eleven Sports Journal မှရွေးချယ်သည့် အကောင်းဆုံး ဘောလုံးသမားများ မဲပေးရန်

Vote Now

မူးယစ်ဆေးဝါး တားဆီးနှိမ်နင်းရေး ထိရောက်စွာ ပူးပေါင်းဆောင်ရွက်ပေးရန် ပြည်နယ်အစိုးရနှင့် ပြည်ထောင်စုအစိုးရအား တိုက်တွန်းကြောင်း ကချင်ပြည်နယ်လွှတ်တော်တွင် အဆိုတင်သွင်း

ဒီဇင်ဘာ ၅ ရက်ကကျင်းပခဲ့သည့် ကချင်ပြည်နယ် လွှတ်တော်အစည်းအဝေးအား တွေ့ရစဉ် (ဓာတ်ပုံ-ထွန်းလင်းအောင်)

မူးယစ်ဆေးဝါး တားဆီးနှိမ်နင်းရေးကို ထိရောက်စွာ ပူးပေါင်းဆောင်ရွက်ပေးရန် ပြည်နယ်အစိုးရနှင့် ပြည်ထောင်စုအစိုးရအား တိုက်တွန်းကြောင်းအဆိုကို ဒုတိယအကြိမ် ကချင်ပြည်နယ်လွှတ်တော် န၀မပုံမှန်အစည်းအဝေး ပဉ္စမနေ့တွင် တင်သွင်းခဲ့သည်။

ယင်းအဆိုကို အင်ဂျန်းယန်မြို့နယ် မဲဆန္ဒနယ် အမှတ် (၂) မှ ပြည်နယ်လွှတ်တော် ကိုယ်စားလှယ် ဒေါ်မရန်ဂျာဆိုင်းခွန်က တင်သွင်းခဲ့ခြင်းဖြစ်ပြီး “မြစ်ကြီးနားတက္ကသိုလ် ကျောင်းဝင်းအတွင်း၊ မြစ်ကြီးနားမြို့တွင်း အနီးတစ်ဝိုက်၊ ကချင်ပြည်နယ်အတွင်း မြို့ရွာများတွင် မူးယစ်ဆေးဝါး ရောင်းဝယ်ဖောက်ကားမှု တားဆီးနှိမ်နင်းရေးအတွက် ထိရောက်သောမူနှင့် စီမံချက်များချမှတ်ပြီး အစိုးရ၊ သက်ဆိုင်ရာနေရာများမှ တာဝန်ရှိသူများ၊ ပြည်သူ့လုံခြုံရေးရဲတပ်ဖွဲ့၊ မူးယစ်ဆေးဝါး တားဆီးနှိမ်နင်းရေးအဖွဲ့များနှင့်အတူ မြို့မိ၊ မြို့ဖ၊ လူမှုအဖွဲ့အစည်းများကို ပူးပေါင်းပါဝင်စေလျက် ကချင်ပြည်နယ်အတွင်း မူးယစ်ဆေးဝါး တားဆီးနှိမ်နင်းရေးကို အမြန်ဆုံးထိရောက်စွာ ဆောင်ရွက်ပေးရန် ပြည်ထောင်စုအစိုးရနှင့် ကချင်ပြည်နယ်အစိုးရနှစ်ရပ်လုံးအား တိုက်တွန်းကြောင်း” အဆိုတင်သွင်းခဲ့ခြင်းဖြစ်သည်။

အဆိုတင်သူ လွှတ်တော်ကိုယ်စားလှယ်က “ကျွန်မတို့ ပထမဆုံးလွှတ်တော်ကျင်းပချိန်မှာပဲ ဆဒုံးဒေသတွေမှာ ဘိန်းခင်းဖျက်သူတွေနဲ့ ဘိန်းခင်းစိုက်တဲ့သူတွေ ပဋိပက္ခဖြစ်လို့ လွှတ်တော်မှာအရေးကြီး အဆိုတင်ခဲ့ရပါတယ်။ အောင်လည်းအောင်ပါတယ်။ အခု ကျွန်မပြန်တွေ့နေရတဲ့ အခြေအနေက မြစ်ကြီးနားတက္ကသိုလ်လို နေရာမျိုးတောင်မှ လွတ်လွတ်လပ်လပ်ပုံစံမျိုးပေါက်နေတာ ၀မ်းနည်းစရာဖြစ်နေတယ်။ အခုပုံမှာပြထားတဲ့ ဆေးထိုးပိုက်တွေဟာ မြစ်ကြီးနားတက္ကသိုလ် ပင်မဆောင်နောက်ဘက်က အိမ်သာမှာတွေ့တာဖြစ်ပါတယ်။ ကချင်ပြည်နယ်မှာ မူးယစ်ဆေးဝါးဒဏ်ကိုမခံစားရတဲ့ အိမ်ထောင်စုဆိုတာမရှိပါဘူး။ လူ့စွမ်းအားအရင်းအမြစ်တွေ ဆုံးရှုံးခဲ့ရတာ ဆယ်စုနှစ်ကြာခဲ့ပြီ။ တက္ကသိုလ်ကျောင်းဝင်းမှာတောင်မှ ဒီလိုအခြေအနေမျိုးဖြစ်နေရင် စဉ်းစားသာကြည့်ကြပါ။ ရပ်ကွက်တွင်းတွေက တချို့နေရာတွေမှာလည်း ဒီအတိုင်းပဲဖြစ်နေတယ်။ မူးယစ်ဆေးကြောင့် လုယက်မှုတွေဖြစ်နေတာလည်း ဆက်စပ်နေပါတယ်။ အခုက ဘိန်းစိုက်ခင်းတွေလည်း ဒီနှစ်တိုးလာတာကို ကြားသိနေရပါတယ်။ မူးယစ်ဆေးဝါး ပြဿနာဖြေရှင်းဖို့ (၁) မူဝါဒစနစ်တကျရေးဆွဲရန် (၂) မူးယစ်ဆေးဝါးသုံးစွဲသူကို မူးယစ်သားကောင်အဖြစ်သာ ရှုမြင်ပြီး နိုင်ငံတကာအောင်မြင်မှုများကို နမူနာယူကာ ကယ်ဆယ်သော စနစ်ကိုကျင့်သုံးရန် (၃) မူးယစ်ဆေးဝါး စိုက်ပျိုးထုတ်လုပ်နေတဲ့ ဒေသများမှာဒေသခံများ စားဝတ်နေရေးကျပ်တည်းမှုကြောင့်ဖြစ်ပါက ပညာပေးရန်နှင့် အစားထိုးသီးနှံများ အစားထိုးအောင်မြင်အောင် ဆောင်ရွက်ပေးခြင်း (၄) ကိုယ်ကျိုးစီးပွားအတွက် စေခိုင်းခြင်း၊ ထုတ်လုပ်စေခြင်း၊ ထောက်ပံ့ခြင်း၊ အဆင့်ဆင့်ထုတ်လုပ်ခြင်းဖြစ်ပါက ကြီးလေးသောပြစ်ဒဏ်များကို ထိရောက်စွာဆောင်ရွက်ခြင်းတို့ကို လုပ်သင့်ပါတယ်။ လွန်ခဲ့တဲ့ ၂၀၁၅ ခုနှစ်မှာ ကချင်ပြည်နယ်တွင် ဘိန်းခင်းတွေကို ထိရောက်စွာဖျက်ဆီးနိုင်ခဲ့ပေမဲ့ ၂၀၁၆ ခုနှစ်မှာ မလုပ်လာတဲ့အတွက် ပြန်လည်ပေါများလာတာကိုလည်း တွေ့ရပါတယ်။ ဆဒုံးလိုဒေသမျိုးဟာ နယ်ခြားစောင့်တပ်သာရှိတဲ့အတွက် ထိန်းချုပ်နိုင်ရပါမယ်။ ဘိန်းဟာရာသီအတွင်းမှာ စိုက်ပျိုးနိုင်တာဖြစ်တဲ့အတွက် ကချင်ပြည်နယ်အတွက် စိုးရိမ်စရာဖြစ်ပါတယ်။ အစိုးရကဦးဆောင်ရမှာဖြစ်သလို လူထုကပူးပေါင်းပါဝင်မှသာ အောင်မြင်မှာဖြစ်ပါတယ်” ဟုပြောကြားသည်။

ယင်းအဆိုကို ၀ိုင်းမော်မြို့နယ်၊ မဲဆန္ဒနယ် အမှတ် (၂) မှ ဦးဇခေါင်ခမ်းရယ်က ထောက်ခံခဲ့ပြီး ဒီဇင်ဘာ ၆ ရက်တွင်ကျင်းပမည့် ပြည်နယ်လွှတ်တော်တွင် အတည်ပြုမည်ဖြစ်သည်။