ထိုင်းနိုင်ငံရှိ အထောက်အထားမဲ့ မြန်မာရွှေ့ပြောင်းလုပ်သားများကို အထောက်အထားလက်မှတ် ထုတ်ပေးသော CI စခန်းများ၌ ဖြစ်ပေါ်နေသည့် အခက်အခဲများကို မြန်မာကိုယ်စားလှယ်အဖွဲ့ ကွင်းဆင်းစစ်ဆေးခဲ့ကြောင်း သိရသည်။
အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန အလုပ်သမား ညွှန်ကြားရေးဦးစီးဌာန ညွှန်ကြားရေးမှူးချုပ် ဦးဝင်းရှိန်နှင့် ပြည်ထဲရေးဝန်ကြီးဌာနက ကိုယ်စားလှယ်ငါးဦးပါဝင်သော အဖွဲ့သည် အောက်တိုဘာ ၃ ရက်မှ ၇ ရက်အထိ ထိုင်းနိုင်ငံ မဟာချိုင် (၁)၊ မဟာချိုင် (၂)၊ စမုပရာကန်၊ ရနောင်း၊ ဆောင်ခလာ၊ ချင်းမိုင်၊ မဲဆိုင်၊ မဲဆောက်နှင့် နခွန်စဝမ် စသည့် CI ကတ်ထုတ်ပေးသည့် စခန်းများနှင့် ထိုင်းနိုင်ငံ ဘန်ကောက်မြို့ရှိ သာမန်နိုင်ငံကူးလက်မှတ် ထုတ်ပေးရေးစခန်းများသို့ သွားရောက်ခဲ့ကြောင်း သိရသည်။
မြန်မာကိုယ်စားလှယ်အဖွဲ့သည် ထိုင်းနိုင်ငံရောက် မြန်မာ့လူမှုအဖွဲ့အစည်းများနှင့် တွေ့ဆုံ၍ CI စခန်းများ၌ ဖြစ်ပေါ်နေသည့် Seven Eleven ဆိုင်များတွင် ငွေသွင်းရာ၌ ရရှိသည့်ငွေသွင်းစလစ်ပါ နေ့ရက်အလိုက် CI ကတ်ပြုလုပ်၍ မရခြင်း၊ ပွဲစားများက ခေါင်းပုံဖြတ် အမြတ်ထုတ်နေမှုများ၊ ဗီဇာကြေး ပိုမိုပေးဆောင်နေရမှုများ၊ ထိုင်းနိုင်ငံသို့ MoU စနစ်ဖြင့် အလုပ်သမားစေလွှတ်ရာတွင် ကြုံတွေ့နေရမှုများ၊ ထိုင်းနိုင်ငံ၏ ဒေသအချို့တွင် သတ်မှတ်လုပ်အားခ အပြည့်အဝမရရှိမှုများ၊ ထိုင်းနိုင်ငံတွင် ယခင်က အလုပ်သမားများထံမှ အိမ်ပြန်စရိတ်ကောက်ခံခဲ့မှုနှင့် ပတ်သက်၍ ဌာနဆိုင်ရာများ ဆောင်ရွက်နေမှုများနှင့် ထိုင်းနိုင်ငံရောက် မြန်မာအလုပ်သမား ကာကွယ်စောင့်ရှောက်ပေးရေးကိစ္စများကို ဆွေးနွေးခဲ့ကြောင်း သိရသည်။
မြန်မာကိုယ်စားလှယ်အဖွဲ့သည် ထိုင်းနိုင်ငံရောက် မြန်မာလူမှုအဖွဲ့အစည်းများ၊ CI စခန်းများသို့ ကွင်းဆင်းစစ်ဆေးမှုအရ ထိုင်းနိုင်ငံ၊ အလုပ်သမားဝန်ကြီးဌာန အလုပ်အကိုင်ဌာန ညွှန်ကြားရေးမှူးချုပ်နှင့် အောက်တိုဘာ ၇ ရက်တွင် တွေ့ဆုံကာ Counter Service Co.,Ltd နှင့် မြန်မာဘက်မှလုပ်ငန်းအဖွဲ့တို့ လက်မှတ်ရေးထိုးထားသော သဘောတူစာချုပ်အရ ရက်အလိုက် သတ်မှတ်ရေး လုပ်ငန်းစဉ်နှင့်အညီ မြန်မာဘက်မှ သတ်မှတ်ထားသည့် ဘတ် ၃၀၀ နှင့် Seven Eleven ဆိုင်များအတွက် ဝန်ဆောင်စရိတ်ဘတ် ၁၀ အပါအဝင် ဘတ် ၃၁၀ ကိုတစ်ပါတည်းပေးသွင်းပြီး သဘောတူစာချုပ်အရ ရက်အလိုက် သတ်မှတ်ခြင်းတို့ကို မြန်မာဘက်မှသာ တာဝန်ယူ ညှိနှိုင်းဆောင်ရွက်မည်ဖြစ်ကြောင်း၊ ဝန်ဆောင်စရိတ် ပိုမိုကောက်ခံနေသော နှစ်နိုင်ငံပွဲစားများကို ထိရောက်စွာ ဖမ်းဆီးအရေးယူသွားမည်ဖြစ်ကြောင်း၊ CI စာအုပ်ထုတ်ယူပြီးသည့် အလုပ်သမားများအား နေ့ချင်းပြီးဆေးစစ်ခြင်း၊ ဗီဇာနှင့် Work Permit ထုတ်ပေးခြင်းကို ထိုင်းနိုင်ငံဘက်က ဆောင်ရွက်မည်ဖြစ်ကြောင်း ဆွေးနွေးခဲ့သည်။
ထို့ပြင် နှစ်နိုင်ငံဆွေးနွေးရာ၌ မြန်မာရွှေ့ပြောင်းအလုပ်သမား အများအပြားရှိသည့် ဒေသများ၌ မြန်မာအလုပ်သမားများ အဆင်ပြေစေရန်နှင့် ပွဲစားများဖြင့် ဆောင်ရွက်ခြင်းမပြုရန်၊ ထိုင်းနိုင်ငံဘက်မှ စာရင်းကောက်ယူခဲ့သည့် အထောက်အထားမဲ့ မြန်မာအလုပ်သမားများနှင့် ပတ်သက်၍ ဦးစားပေး ဆောင်ရွက်သွားမည်ဖြစ်ကြောင်း စသည်ဖြင့် ဆွေးနွေးခဲ့ကြကြောင်း သိရသည်။
