ထိုင်းနိုင်ငံ၌ အလုပ်လုပ်ကိုင်နေသည့် မြန်မာရွှေ့ပြောင်း လုပ်သားများ သက်သေခံ CI ကတ် ရရှိရန် ဆောင်ရွက်ရမည့် အချက်များအား အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အား ဝန်ကြီးဌာနက စက်တင်ဘာ ၂၁ ရက်တွင် သတင်းထုတ်ပြန်ခဲ့ကြောင်း သိရသည်။
မြန်မာရွှေ့ပြောင်း လုပ်သားများအား ထိုင်းနိုင်ငံမှ ထုတ်ပေးထားသော ယာယီနေထိုင် အလုပ်လုပ်ခွင့် လက်မှတ် (ဘတ်ကတ်ခေါ် TR-38) ကိုင်ဆောင်ထားသည့် မြန်မာအလုပ်သမားများနှင့် ယာယီ မြန်မာနိုင်ငံကူးလက်မှတ် သက်တမ်း ကုန်ဆုံးမည့် အလုပ်သမားများနှင့် အလုပ်အကိုင်ဌာန၌ မှတ်ပုံတင်ထားသည့် အထောက်အထားမဲ့ မြန်မာအလုပ်သမားများအား ထိုင်းနိုင်ငံရှိ (စမုစခွန်) မဟာချိုင်(၁)၊ (၂)၊ စမုပရာကန်၊ မယ်ဆိုင်၊ မဲဆောက်၊ ရနောင်း၊ ချင်းမိုင်၊ နခွန်စဝမ်နှင့် ဆောင်ခလာမြို့များတွင် CI ကတ်များ ထုတ်ပေးလျက် ရှိကြောင်း သိရသည်။
ယင်းအပြင် ထိုင်းနိုင်ငံမှ ဆေးစစ်ခြင်း၊ နေထိုင်ခွင့် (Visa) ထုတ်ပေးခြင်း၊ အလုပ်လုပ်ခွင့် လက်မှတ် (Work Permit) ထုတ်ပေးခြင်းတို့ကို One Stop Service ဖြင့် ဆောင်ရွက်ပေးလျက် ရှိကြောင်း သိရသည်။
သက်သေခံ လက်မှတ် CI ကတ် ရရှိလိုသည့် အလုပ်သမားများ အနေဖြင့် TR-38 (သို့မဟုတ်) ယာယီ မြန်မာနိုင်ငံကူးလက်မှတ် (သို့မဟုတ်) ထိုင်း အလုပ်အကိုင်ဌာနမှ ထုတ်ပေးသည့် အထောက်အထား စာရွက်စာတမ်းများနှင့်အတူ သက်ဆိုင်ရာ CI စခန်းသို့ သွားရောက်ပြီး CI လျှောက်ထားသူ၏ ကိုယ်ရေးမှတ်တမ်း ထိန်းသိမ်းပုံစံကို လျှောက်ထားရမည် ဖြစ်ကြောင်း၊ CI စခန်းတွင် ကိုယ်ရေးအချက်အလက် စိစစ်မှုခံယူခြင်း၊ ဓာတ်ပုံရိုက်ခြင်း၊ မျက်စိ စိစစ်ခြင်းတို့ ပြုလုပ်ပြီးပါက သက်သေခံလက်မှတ် CI ကတ်နှင့် ပြည်ပ အလုပ်အကိုင် အလုပ်သမား သက်သေခံကတ်ပြား ရရှိမည်ဖြစ်ကြောင်း အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနက ထုတ်ပြန်ထားသည်။
CI ကတ်နှင့် ပြည်ပ အလုပ်အကိုင် အလုပ်သမား သက်သေခံကတ်ပြား ထုတ်ယူပြီးပါက ထိုင်းနိုင်ငံရှိ သက်ဆိုင်ရာ ဌာနများက ဆေးစစ်ခြင်း၊ နေထိုင်ခွင့် (Visa ထုတ်ပေးခြင်း၊ အလုပ် လုပ်ခွင့်လက်မှတ် (Work Permit) ထုတ်ပေးခြင်းတို့ကို One Stop Service အဖြစ် ဆောင်ရွက်ပေးမည်ဖြစ်ပြီး အဆိုပါ လုပ်ငန်းစဉ်များအတွက် ဗီဇာကြေး ဘတ် ၅၀၀၊ စာရွက်စာတမ်းကြေး ဘတ် ၁၀၀၊ အလုပ် လုပ်ကိုင်ခွင့်လက်မှတ် နှစ်ဝက်အတွက် ဘတ် ၅၅၀၊ တစ်နှစ်အတွက် ဘတ် ၁၀၀၀၊ ကျန်းမာရေး စစ်ဆေးခြင်းနှင့် ကျန်းမာရေးအာမခံကြေး ဘတ် ၁၆၀၀ စုစုပေါင်း ဘတ် ၂၆၅၀ မှ ၃၁၀၀ အထိ ထိုင်းနိုင်ငံရှိ သက်ဆိုင်ရာဌာနများသို့ ပေးသွင်းရမည် ဖြစ်ကြောင်း အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အား ဝန်ကြီးဌာနက ထုတ်ပြန်ထားသည်။
