ဒုတိယအကြိမ် ပြည်သူ့လွှတ်တော် ပထမပုံမှန် အစည်းအဝေးမှ ပဉ္စမပုံမှန် အစည်းအဝေးကာလ ငါးကြိမ်အထိ အဆိုစုစုပေါင်း ၆၈ ခု တင်သွင်းခဲ့ရာတွင် လွှတ်တော်က အတည်ပြုခဲ့သည့်အဆို ၂၇ ခု ရှိပြီး မှတ်တမ်းတင် ထားရှိသည့်အဆို ၃၆ ခု ရှိကြောင်း ပြည်သူ့လွှတ်တော်ရုံး၏ သတင်းထုတ်ပြန်ချက်အရ သိရသည်။
ပြည်သူ့လွှတ်တော် ပထမပုံမှန် အစည်းအဝေးမှ ပဉ္စမပုံမှန် အစည်းအဝေးအထိ အဆိုများ ဆောင်ရွက်ပြီးစီးမှု အခြေအနေနှင့် ပတ်သက်၍ စက်တင်ဘာ ၁၄ ရက်က သတင်းထုတ်ပြန်ခဲ့သည်။
အဆို ၆၈ ခုတွင် ရိုးရိုးအဆို ၅၇ ခု တင်သွင်းရာ၌ အဆို ၂၁ ခုကို ပြည်သူ့လွှတ်တော် က အတည်ပြုခဲ့ပြီး ၃၂ ခုကို မှတ်တမ်းတင်ခဲ့ကြောင်း၊ အဆိုနှစ်ခုကို အတည်မပြုခဲ့ကြောင်း၊ အဆိုတစ်ခုကို ရုပ်သိမ်းခဲ့ပြီး ဆက်လက် ဆွေးနွေးရန် မသင့်ကြောင်း ဆုံးဖြတ်ခဲ့သည့် အဆိုတစ်ခု ရှိခဲ့ကြောင်း၊ ထို့ပြင် အရေးကြီးအဆို စုစုပေါင်း ၁၁ ခု တင်သွင်းခဲ့ရာတွင် ခြောက်ခုကို အတည်ပြုခဲ့ကြောင်း၊ အရေးကြီးအဆို လေးခုကို မှတ်တမ်းတင်ခဲ့ကြောင်း၊ အရေးကြီးအဆို တစ်ခုကို အတည်မပြုခဲ့ကြောင်း သတင်းထုတ်ပြန်ချက်အရ သိရသည်။
ပြည်သူ့လွှတ်တော် ပဉ္စမပုံမှန် အစည်းအဝေးကာလအတွင်း အဆို ၂၃ ခု တင်သွင်းခဲ့ရာတွင် အဆို ၁၁ ခု အတည်ပြုဖြစ်ခဲ့ပြီး လွှတ်တော်က အတည်ပြုထားသည့် အဆိုများထဲတွင် နိုင်ငံတစ်ဝန်း သဘာဝဘေးအန္တရာယ်များနှင့် အင်းဆက်ပိုးမွှားများကြောင့် နစ်နာဆုံးရှုံးနေကြသော တောင်သူလယ်သမားများ၏ အကျိုးစီးပွားအတွက် အာမခံချက်ရှိစေမည့် သီးနှံ အာမခံလုပ်ငန်းများကို ဆောလျင်စွာ အကောင်အထည် ဖော်ဆောင်ပေးရေး အစိုးရအား တိုက်တွန်းကြောင်းအဆိုလည်း တစ်ခုအပါအဝင် ဖြစ်သည်။
နိုင်ငံတစ်ဝန်း အဂတိလိုက်စားမှုများ ထင်ရှား သိသာစွာ ကျဆင်းလျော့ပါးရေးအတွက် ပြည်ထောင်စုအစိုးရမှ ထိထိရောက်ရောက် ကိုင်တွယ်ဖြေရှင်း ဆောင်ရွက်ပေးရန် ဒုတိယပုံမှန် အစည်းအဝေးကာလအတွင်း တင်သွင်းခဲ့ပြီး အဆိုအပေါ် လွှတ်တော် ကိုယ်စားလှယ်အများအပြား ဆွေးနွေးခဲ့ကြကာ လွှတ်တော်ကလည်း ကန့်ကွက်သူမရှိ အတည်ပြုထားသည်။
