တောင်ကိုရီးယားသို့ သွားရောက်ခဲ့သည့် အဆင့်မြင့်ကိုယ်စားလှယ်အဖွဲ့ကို စကားပြောနေသော ကင်ဂျုံအွန်အား ဖေဖော်ဝါရီ ၁၂ ရက်က တွေ့ရစဉ် (Photo: AFP)

အမေရိကန်သမ္မတ ဒေါ်နယ်ထရန့်က တရုတ်အား ပိတ်ဆို့အရေးယူသွားမည်ဟု ခြိမ်းခြောက်ခဲ့ပြီး တောင်ကိုရီးယားနှင့်ရရှိထားသော လွတ်လပ်စွာကုန်သွယ်ရေး သဘောတူညီချက်ကိုလည်း ပြန်လည်ပြင်ဆင်ခြင်း သို့မဟုတ် ပယ်ဖျက်ခြင်း ပြုလုပ်သွားမည်ဟု ဖေဖော်ဝါရီ ၁၃ ရက်တွင်ကတိပြုခဲ့ရာ အာရှရှိ အဓိကကုန်သွယ်ရေး မိတ်ဖက်နှစ်နိုင်ငံအား တုံ့ပြန်မှုများဆောင်ရွက်သွားမည်ဟု ခြိမ်းခြောက်လိုက်ခြင်းဖြစ်သည်။

တရုတ်သည် အမေရိကန်၏ သံမဏိနှင့် အလူမီနီယမ်လုပ်ငန်းများအား ပျက်စီးစေခဲ့ကြောင်း စွပ်စွဲလျက် ထရန့်က သွင်းကုန်အခွန်များနှင့် ခွဲတမ်းများသတ်မှတ်ခြင်းအပါအဝင် ရွေးချယ်စရာအားလုံးကို စဉ်းစားနေကြောင်း ပြောကြားခဲ့သည်။ ဆောက်လုပ်ရေးလုပ်ငန်းများမှသည် ကားလုပ်ငန်းများအထိ အလွန်အမင်းအရေးပါသော သံမဏိနှင့် အလူမီနီယမ်တင်ပို့မှုများအတွက် တရုတ်အစိုးရက ထောက်ပံ့ပေးနေသည်ဟု သံသယရှိမှုများနှင့်ပတ်သက်သည့် အမေရိကန်ကုန်သွယ်ရေးဌာန၏ အစီရင်ခံစာနှစ်ခုကို ထရန့်က မကြာသေးမီကရရှိခဲ့သည်။

လက်တုံ့ပြန်နိုင်ခြေရှိသည့် အရေးယူမှုများအား ချမှတ်ရန်အတွက်ဆုံးဖြတ်ရန် ထရန့်သည် နောက်ထပ်အချိန်နှစ်လရမည်ဖြစ်ကြောင်း၊ သို့သော် သူသည် တရုတ်အား တုံ့ပြန်ထိုးနှက်ရန်အတွက် အလွန်အမင်းထက်သန်နေကြောင်း သိရသည်။ တရုတ်နှင့် နိုင်ငံအချို့တို့တွင် ပိုလျှံထုတ်လုပ်နေမှုများအား ဖြေရှင်းရန် လိုအပ်မှုအပါအဝင် အမေရိကန်၏အကျိုးစီးပွားများအတွက် အကောင်းဆုံးဖြစ်စေမည့်ဆုံးဖြတ်ချက်ကို ၎င်းကချရမည်ဖြစ်ကြောင်း ထရန့်က ဆိုခဲ့သည်။

အမေရိကန်ကသာ ပိတ်ဆို့အရေးယူခဲ့လျှင် တရုတ်ကလည်း တန်ပြန်အရေးယူနိုင်ခြင်းကြောင့် ကမ္ဘာ့စီးပွားရေးအင်အားအကြီးဆုံး နှစ်နိုင်ငံအကြား ကုန်သွယ်ရေးစစ်ပွဲဖြစ်ပွားနိုင်မှုကို မြင့်တက်စေနိုင်ကြောင်း ကျွမ်းကျင်ပညာရှင်များက ယုံကြည်နေသည်။

စက်မှုလုပ်ငန်းများကျဆင်းနေပြီး လူဦးရေထိုးကျနေသော အထူးသဖြင့် အမေရိကန်အရှေ့မြောက်ပိုင်းနှင့် အလယ်အနောက်ပိုင်း ပြည်နယ်များအတွက် ရပ်တည်ကာကွယ်ပေးသူဖြစ်စေရမည်ဟု ကတိပြုလျက် သမ္မတဖြစ်လာခဲ့သော ထရန့်သည် ရွေးကောက်ပွဲမဲဆွယ်စဉ်အတွင်း တွေ့ရှိခဲ့ရသော ဗလာဖြစ်နေသည့်စက်ရုံများအား ကယ်တင်နိုင်ရန် လုပ်ဆောင်သွားမည်ဟုလည်း ဖေဖော်ဝါရီ ၁၂ ရက်တွင် ပြောကြားခဲ့သည်။

ပြင်ဆင်သွားမည်ဟု ထရန့်က အကြိမ်ကြိမ်ကတိပြုထားသော်လည်း အမေရိကန် ကုန်သွယ်ရေးလိုငွေပြမှုသည် ၎င်း၏သမ္မတသက်တမ်းပထမနှစ်တွင် ပို၍မြင့်မားလာပြီး ဒေါ်လာ ၅၆၆ ဘီလျံအထိ မြင့်တက်ခဲ့သည်။

၂၀၁၂ ခုနှစ်တွင် အမေရိကန်နှင့် တောင်ကိုရီးယားတို့အကြားရရှိခဲ့သော လွတ်လပ်စွာကုန်သွယ်ရေး သဘောတူညီချက်သည် နှစ်ဖက်ကုန်သွယ်မှုတွင် အမေရိကန်၏လိုငွေပြမှုအား အလွန်အမင်းမြင့်တက်စေခဲ့သည်ဟု ထရန့်က အပြစ်တင်ခဲ့ပြီး ယင်းသဘောတူညီချက်အား ပြန်လည်ညှိနှိုင်းခြင်း သို့မဟုတ် အလုံးစုံဖျက်သိမ်းခြင်း လုပ်ဆောင်သွားမည်ဟု ကတိပြုခဲ့သည်။