၂၀၁၆ ခုနှစ် မတ် ၅ ရက်က ရိုက်ကူးထားသောဓာတ်ပုံ၌ တွေ့ရသည့် တရုတ်ဒုဝန်ကြီးချုပ် ဝမ်ယန် (ဝဲ)နှင့် စကားပြောနေသော ချုံကျင့် ကွန်မြူနစ်ပါတီခေါင်းဆောင် ဆွန်ကျန်ချိုင် (ယာ) (Photo: AFP)
တစ်ချိန်က တရုတ်ထိပ်တန်းခေါင်းဆောင် ဖြစ်လာနိုင်သူဟု ယူဆခံခဲ့ရသော ပေါ်လစ်ဗျူရို အဖွဲ့ဝင်ဟောင်းတစ်ဦးအား ခြစားမှုဖြင့် တရားစွဲခဲ့ကြောင်း တရုတ်အစိုးရရှေ့နေက ဖေဖော်ဝါရီ ၁၃ ရက်တွင် ပြောကြားခဲ့သည်။ တရုတ်အနောက်တောင်ပိုင်း ချုံကျင့်၏ ပါတီဥက္ကဋ္ဌဟောင်းဖြစ်ခဲ့သော ဆွန်ကျန်ချိုင်သည် တရားမဝင်လာဘ်ငွေအမြောက်အမြား လက်ခံမှုဖြင့် အခြားသူများအတွက် အခွင့်အရေးရရှိရန် ကြိုးပမ်းမှုတို့ဖြင့် တရားစွဲဆိုခံရမည်ဖြစ်ကြောင်း တရုတ်ပြည်သူ့ရှေ့နေချုပ် ရုံးဝက်ဘ်ဆိုက်တွင် ဖော်ပြသော ကြေညာချက်ကဆိုသည်။
ဆွန်ကို ထျန်ကျင်းပြည်သူ့တရားရုံးတွင် တရားစွဲဆိုမှုများ ဆက်လက်ဆောင်ရွက်သွားမည်ဖြစ်ကြောင်း ယင်းကြေညာချက်က ဖော်ပြခဲ့သည်။ ပြင်းထန်သည့် စည်းကမ်းချိုးဖောက်မှုများအတွက် ဆွန်ကို စုံစမ်းစစ်ဆေးနေကြောင်း တရုတ်ကွန်မြူနစ်ပါတီ စည်းကမ်းထိန်းသိမ်းရေးအဖွဲ့က ဇူလိုင်လတွင် ပြောကြားခဲ့သည်။ ဆွန်သည် ၂၀၁၃ ခုနှစ်က ထောင်ဒဏ်တစ်သက် ချမှတ်ခံခဲ့ရသော ချုံကျင့်အုပ်ချုပ်ရေးမှူး ပိုရှီလိုင်နောက်ပိုင်းတွင် စုံစမ်းစစ်ဆေးမှုကို ပထမဆုံးခံရသော ပေါ်လစ်ဗျူရိုအဖွဲ့ဝင် ဖြစ်လာခဲ့သည်။ ဆွန်ကို ပြီးခဲ့သည့်စက်တင်ဘာတွင် ရာထူးမှ တရားဝင်ထုတ်ပယ်ခဲ့ပြီးဖြစ်သည်။
တရုတ်သမ္မတ ရှီကျင်ပင်းသည် ခြစားမှုတိုက်ဖျက်ရေးကို ပြင်းပြင်းထန်ထန် ဆောင်ရွက်နေပြီး လာမည့်လတွင် တရုတ်၏ နှစ်ပတ်လည် အမျိုးသားညီလာခံကိုကျင်းပရန် ပြင်ဆင်နေချိန်၌ ခြစားမှုဖြင့် အရေးယူမှုများ ပေါ်ပေါက်ခဲ့ခြင်းဖြစ်သည်။ တရုတ်တွင် အစိုးရအဖွဲ့အတွင်း ခြစားမှုသည် နက်နက်ရှိုင်းရှိုင်း ကျယ်ပြန့်နေပြီး ၂၀၁၁ ခုနှစ်တွင် အာဏာရလာခဲ့ပြီးနောက်ပိုင်း ရှီကျင်ပင်းက ခြစားမှုနှိမ်နင်းရေးကို စတင်ခဲ့ခြင်းဖြစ်သည်။
တရုတ်၏ အင်တာနက်စည်းကမ်းထိန်းချုပ်ရေး တာဝန်ခံဟောင်းဖြစ်သော လူဝေကိုလည်း လာဘ်ယူမှုအတွက် ကွန်မြူနစ်ပါတီမှထုတ်ပယ်ခဲ့ကြောင်း ကွန်မြူနစ်ပါတီ ဗဟိုစည်းကမ်းထိန်းသိမ်းရေးကော်မတီက ဖေဖော်ဝါရီ ၁၃ ရက်တွင် ကြေညာခဲ့သည်။
တိုင်းမ်မဂ္ဂဇင်း၏ ကမ္ဘာ့သြဇာအကြီးဆုံးပုဂ္ဂိုလ် ၁၀၀ စာရင်းတွင် ပါဝင်ခဲ့ဖူးသူ လူဝေသည် ပုဂ္ဂိုလ်ရေးအကျိုးစီးပွားအတွက် အာဏာကိုအသုံးချခဲ့ကြောင်း ပါတီ၏ အင်တာနက်မဟာဗျူဟာကို ဆောင်ရွက်ရန်အတွက် သူက စိတ်တိုင်းကျရွေးချယ်မှု ဆောင်ရွက်ခဲ့ကြောင်း စည်းကမ်းထိန်းသိမ်းရေးကော်မရှင်၏ ကြေညာချက်တွင် ဖော်ပြခဲ့သည်။
