တရုတ်နှစ်သစ်ကူးမတိုင်မီ ဖေဖော်ဝါရီ ၁၀ ရက်က ပေကျင်းရှိ ဘူတာရုံ အဓိကခန်းမဆောင်၌ သွားလာနေသော ခရီးသည်များ (Photo: AFP)

တရုတ်နှစ်သစ်ကူးမတိုင်မီ  နိုင်ငံအစွန်အဖျားဒေသများသို့ အစဉ်အလာအရ ခရီးသွားရောက်မှု၏ တစ်စိတ်တစ်ပိုင်းအဖြစ် ဆင်းရဲသော နိုင်ငံအနောက်တောင်ပိုင်းရှိ  ဒေသတစ်ခုသို့ သွားရောက်စဉ် တရုတ်သမ္မ တရှီကျင်ပင်းက ဆင်းရဲမွဲတေမှုတစ္ဆေများအား တရုတ်က တိုက်ဖျက်သွားမည်ဖြစ်ကြောင်း ရွာသားများအား ပြောကြားခဲ့သည်။

တရုတ်ခေါင်းဆောင်များသည် ပုံမှန်အားဖြင့် နှစ်သစ်ကူးပွဲတော်ကာလတစ်ဝိုက်တွင် နိုင်ငံတစ်ဝန်းသို့ စစ်ဆေးရေးခရီးစဉ်များ ထွက်ခွာလေ့ရှိပြီး နှစ်သစ်ကူးမတိုင်မီ  ၎င်းတို့၏ အရေးပါသော မူဝါဒအစီအစဉ်များ သို့မဟုတ် သက်ဆိုင်သော အကြောင်းအရာများအား ချပြလေ့ရှိသည်။

ဖေဖော်ဝါရီ ၁၅ ရက်တွင် စတင်ပြီး သီတင်းပတ်ကြာရှည်သော တရုတ်နှစ်သစ်ကူးသည် တရုတ်ပြက္ခဒိန်တွင် အရေးပါဆုံးပွဲတော်ဖြစ်ပြီး ယင်းကာလအတွင်း လူသန်းပေါင်းများစွာသည် နေရပ်များသို့ ပြန်လေ့ရှိကြသည်။

တရုတ်သည် ၂၀၂၀ ပြည့်နှစ်မတိုင်မီ လူသန်း ၇၀ အား ဆင်းရဲမွဲတေမှုမှ ဆွဲတင်သွားမည်ဟု ၂၀၁၅ ခုနှစ်တွင် ကတိပြုခဲ့ပြီးနောက် ရှီသည် ဆင်းရဲမွဲတေမှု လျော့ပါးစေရန်ကိစ္စကို ၎င်း၏ အရေးပါသော မူဝါဒတစ်ခုအဖြစ် ဆောင်ရွက်ခဲ့သည်။

ယီမျိုးနွယ်စုများ နေထိုင်သော စီချွမ်ပြည်နယ်၏ ဝေးလံသော တောင်တန်းထူထပ်သည့် ရွာတစ်ရွာသို့ ရှီက သွားရောက်ခဲ့စဉ် ရွာသူတစ်ဦးက နာဖျားမှုများသည် တစ္ဆေများကြောင့်ဟု ယုံကြည်လာခဲ့ကြောင်း သမ္မတကို ပြောကြားခဲ့သည်ဟု အစိုးရမီဒီယာက ဖေဖော်ဝါရီ ၁၂ ရက်တွင် ဖော်ပြခဲ့သည်။

ယင်းရွာသူ၏ အကြောင်းအား နားထောင်ခဲ့ပြီးနောက် ရှီက အဆိုပါတစ္ဆေများအား မောင်းထုတ်ပစ်သွားမည်ဟု ပြောကြားခဲ့ကြောင်း မီဒီယာများက ဖော်ပြခဲ့သည်။

အတိတ်ကာလတွင် တစ္ဆေများရှိခဲ့ကြောင်း၊ လျစ်လျူရှုမှု၊ နောက်ကြောင်းပြန်လှည့်မှုနှင့် ဆင်းရဲမွဲတေမှု တစ္ဆေများဖြစ်ကြောင်း ရှီက ယင်းရွာသူကို ပြောကြားခဲ့ သည်။ အဆိုပါပြဿနာများအား ဖြေရှင်းနိုင်ခဲ့လျှင် ယင်းတစ္ဆေများလည်း ပျောက်ကွယ်သွားမည်ဖြစ်ကြောင်း၊ အကယ်၍ ယဉ်ကျေးမှု၊ အသိပညာနှင့် ကျန်းမာရေးညီညွတ်မှုတို့ရှိလျှင် ၎င်းတို့၏ ဖွံ့ဖြိုးတိုးတက်သော ဘဝသည် ယင်းအခက်အခဲများအား ဖြေရှင်းနိုင်သွားမည်ဖြစ်ကြောင်း၊ ယင်းအချိန်ရောက်လျှင် တစ္ဆေများလည်းရှိနိုင်တော့မည် မဟုတ်ကြောင်း ရှီက ပြောကြားခဲ့သည်။

ကိုယ်ပိုင်စာရှိသော ယီမျိုးနွယ်စုသည်  တရုတ်တွင် တရားဝင်အသိအမှတ်ပြုထားသည့် လူနည်းစု ၅၅ မျိုးအနက် တစ်မျိုးအပါအဝင်ဖြစ်သည်။

ရှီသည် ယင်းခရီးစဉ်တွင် အသားခြောက်များအား စစ်ဆေးခြင်း၊ ရောင်စုံ ရိုးရာအဝတ်အစားများ ဝတ်ဆင်ထားသော ရွာသားများနှင့် စကားပြောခြင်းနှင့် အိမ်ရာစီမံကိန်းများအား စစ်ဆေးကြည့်ရှုခြင်းတို့ကို လုပ်ဆောင်မှုများအား အစိုးရသတင်းအေဂျင်စီဆင်ဟွာ နှင့်  အစိုးရရုပ်သံတို့က ပြသခဲ့ကြသည်။

နေရာတစ်နေရာတွင် ရှီထံ ယီရိုးရာ အဖြူရောင်ဝတ်ရုံပေးခဲ့ရာ အစိမ်းရင့်ရောင် ဂျက်ကင်ဝတ်ထားသော ရှီက ၎င်း၏ ပုခုံးပေါ်ထိုဝတ်ရုံကို လွှမ်းခဲ့ကြောင်း သိရသည်။ ရှီသည် တရုတ်နှစ်သစ်ကူးမတိုင်မီနှင့် နှစ်သစ် ကူးကာလအတွင်း နိုင်ငံ၏ အခြားနေရာများသို့လည်း သွားရောက်နိုင်ခြေရှိကြောင်း သိရသည်။