အမေရိကန်လူနေမှုဘဝတွင် လိင်ပိုင်းဆိုင်ရာ အနှောင့်အယှက်ပြုမှု၊ တိုက်ခိုက်မှု နှင့် ညှဉ်းပန်းနှိပ်စက်မှုများ ပျံ့နှံ့နေမှုများအား ဖော်ထုတ်ခဲ့ကြသော 'နှုတ်ပိတ်မှုများအား ဖြိုခွင်းခဲ့ကြသူများ'ကို တိုင်းမ်မဂ္ဂဇင်းက ၂၀၁၇ ခုနှစ်၏ Person of the Year အဖြစ် ဒီဇင်ဘာ ၆ ရက်တွင် ရွေးချယ်ခဲ့သည်။ အမေရိကန်သမ္မတ ဒေါ်နယ်ထရန့်သည်  runner-up ရွေးချယ်ခံခဲ့ရပြီး တရုတ်သမ္မတ ရှီကျင်ပင်းက တတိယနေရာ၌ ရပ်တည်ခဲ့သည်။

သြဇာအကြီးဆုံး အထင်ကရပုဂ္ဂိုလ် အချို့၏မုဒိမ်းကျင့်မှုပင် ပါဝင်ခဲ့သည့် လိင်ပိုင်းဆိုင်ရာ နှောင့်ယှက်မှုများနှင့် တိုက်ခိုက်မှုများအား ယခုနှစ်တွင် လူသိရှင်ကြား ဖော်ထုတ်ခဲ့ကြသည့် အမျိုးသမီးအများစုပါဝင်သော တစ်ဦးချင်းစီကို 'နှုတ်ပိတ်မှုကို ဖြိုခွင်းခဲ့ကြသူများ'ဟု တိုင်းမ်က ဂုဏ်ပြုရွေးချယ်ခဲ့ ခြင်းဖြစ်သည်။ ယင်းစာရင်းတွင် ဟောလိဝုဒ် အထင်ကရထုတ်လုပ်သူ ဟာဗေးဝိန်းစတိန်း၏ လိင်ပိုင်းဆိုင်ရာကျူးလွန်မှုများအား ထုတ်ဖော်ခဲ့ကြသည့် ထင်ရှားသော သရုပ်ဆောင်များမှသည် ၎င်းတို့ လိင်ပိုင်းဆိုင်ရာ စော်ကား ခံခဲ့ရသည့်အကြောင်းများကို hashtag #Me Too  ဖြင့် ဖော်ထုတ်ခဲ့ကြသည့် သာမန် အမျိုးသမီးများအထိ ပါဝင်ကြောင်း တိုင်းမ်က ဆိုခဲ့သည်။

ဝိန်းစတိန်းအား စွပ်စွဲမှုများသည် ဟောလိဝုဒ်အပြင် စီးပွားရေးလုပ်ငန်းကြီးများ၊ နိုင်ငံရေးနှင့် သတင်းမီဒီယာနယ်ပယ်တို့မှ  အခြားထိပ်တန်းပုဂ္ဂိုလ်များပါ ပါဝင်သော ယုတ်ညံ့သည့် လိင်ပိုင်းဆိုင်ရာစော်ကားမှု စွပ်စွဲချက်များ တစ်သီတစ်တန်း ထွက်ပေါ်လာစေရန်အတွက် အရေးပါခဲ့သည်။ ၎င်းတို့၏သက်ဆိုင်ရာနယ်ပယ်တွင် သြဇာတိက္ကမ ရှိခဲ့ဖူးကြသူများသည် ယင်းစွပ်စွဲချက်များ ထွက်ပေါ်လာချိန်တွင် ထုတ်ပယ်ခံရခြင်း သို့မဟုတ် ဆိုင်းငံ့ခံရခြင်းတို့ ကြုံခဲ့ရပြီး ၎င်းတို့၏ လုပ်ငန်းများသည် ပျက်စီးခဲ့ကြရသည်။

တိုင်းမ်၏ Person of the Year မျက်နှာဖုံးတွင် ဖော်ပြခံခဲ့ရသူများ၌ အသက် ၆၅ နှစ်ရှိ ဝိန်းစတိန်း၏ လိင်ပိုင်းဆိုင်ရာစော်ကားမှုများအား ပထမဆုံးထုတ်ဖော်စွပ်စွဲခဲ့သည့် သရုပ်ဆောင် အက်ရှ်လေးဂျုဒ်နှင့်အတူ

အဆိုတော် တေလာဆွစ်၊ Uber ကုမ္ပဏီမှ အင်ဂျင်နီယာဟောင်း ဆူဇန်ဖောင်လာတို့ ပါဝင်ခဲ့သည်။

လိင်ပိုင်းဆိုင်ရာ စော်ကားခံခဲ့ရကြောင်း  ထုတ်ဖော်ခဲ့သူများတွင် အမျိုးသားအချို့လည်း ပါဝင်ခဲ့သည်။ အော်စကာဆုရှင် သရုပ်ဆောင် ကီဗင်စပေဆီသည် ဆယ်ကျော်သက်အရွယ်တွင် ၎င်းအား လိင်ပိုင်းဆိုင်ရာအတွက် ချဉ်းကပ်ခဲ့ဖူးကြောင်း အမေရိကန် အမျိုးသားသရုပ်ဆောင်အန်သိုနီရက်က စွပ်စွဲခဲ့ပြီးနောက် အခြားအမျိုးသား တစ်ဒါဇင်ကျော်ကလည်း စပေဆီအား အလားတူ စွပ်စွဲချက်များ ပြုလုပ်ခဲ့ကြသည်။

တိုင်းမ်မဂ္ဂဇင်းသည် ၁၉၂၇ ခုနှစ်နောက်ပိုင်း တစ်နှစ်တာအတွင်း သတင်းများနှင့် ဖြစ်ရပ်များကို သြဇာလွှမ်းမိုးမှုအရှိဆုံးဖြစ်သည့် တစ်ဦးချင်း သို့မဟုတ် အဖွဲ့အစည်းကို Person of the Year အဖြစ် ရွေးချယ်လာခဲ့ခြင်းဖြစ်ကြောင်း သိရသည်။