၂၀၁၆ ခုနှစ် ဇွန် ၂၁ ရက်က ဝါရှင်တန်တွင် ကွန်ဖရင့်တစ်ခု၌ စကားပြောနေသော ဆမ်ဆောင်းအီလက်ထရွန်နစ် ကုမ္ပဏီ အမှုဆောင်ချုပ် ကွမ်အိုဟွန်း (Photo: AFP)

ဆမ်ဆောင်း အီလက်ထရွန်နစ်၏ အမှုဆောင်ချုပ်သည် အောက်တိုဘာ ၁၃ ရက်က ရာထူးမှ နုတ်ထွက်သွားသည်ဟု သိရသည်။ တောင်ကိုရီးယား နည်းပညာ လုပ်ငန်းကြီး ဆမ်ဆောင်း၏ ယခုနှစ် တတိယ သုံးလပတ် ကာလအတွင်း အမြတ်အစွန်းသည် စံချိန်တင် မြင့်တက်ခဲ့သော်လည်း ဆမ်ဆောင်းမှာ မကြုံစဖူး အကျပ်အတည်းကြီး တစ်ခုနှင့် ရင်ဆိုင်နေရသည်ဟု နုတ်ထွက်သွားသည့် အမှုဆောင် ဥက္ကဋ္ဌ ကွမ်အိုဟွန်းက ပြောကြားသွားခဲ့သည်။

ဆမ်ဆောင်း အင်ပါယာကြီး၏ အမွေဆက်ခံသူဖြစ်ပြီး လက်ရှိ အကြီးအကဲဟုလည်း ယူဆခံထားရသော လီဂျေယောင်းအား ထောင်ကျစေခဲ့သည့် ခြစားမှု အရှုပ်တော်ပုံကို ကျော်လွှားရန်အတွက် ဆမ်ဆောင်းက ရုန်းကန်နေရစဉ် ကွမ်အိုဟွန်း၏ နုတ်ထွက်မှု ထွက်ပေါ်လာခဲ့ခြင်းဖြစ်သည်။

“ကျွန်တော်တို့ အနေနဲ့ မကြုံစဖူး အကျပ်အတည်းနဲ့ ရင်ဆိုင်နေရတဲ့ ဒီအချိန်မှာ အဆက်မပြတ် ပြောင်းလဲနေတဲ့ အိုင်တီကဏ္ဍရဲ့ စိန်ခေါ်မှုတွေကို ပိုမိုကောင်းမွန်စွာတုံ့ ပြန်နိုင်တဲ့ ငယ်ရွယ်တဲ့ ခေါင်းဆောင်တစ်ဦးနဲ့ အတူ ကုမ္ပဏီဟာ အသစ်တစ်ဖန် ပြန်စရမယ့် အချိန်လို့ ကျွန်တော် ယုံကြည်ပါတယ်” ဟု ကွမ်က ပြောကြားသွားခဲ့သည်။

“ကံကောင်းစွာနဲ့ ကုမ္ပဏီဟာ အကောင်းဆုံး ရလဒ်တွေ ရရှိနေပေမယ့် ဒါဟာ ယခင်က လုပ်ခဲ့တဲ့ ရင်းနှီးမြှုပ်နှံမှုတွေ၊ ဆုံးဖြတ်ချက်တွေရဲ့ အသီးအပွင့် တစ်ခုသာ ဖြစ်ပါတယ်” ဟု ကွမ်က ဆိုသည်။

ယခုကဲ့သို့ ကွမ်၏ ရုတ်တရက် နုတ်ထွက်မှုသည် လီအား သက်ညှာသည့် ပြစ်ဒဏ်ချမှတ်စေရန် တွက်ချက် လုပ်ဆောင်သည့် တရားရေးဗျူဟာတစ်ခု ဖြစ်နိုင်သည်ဟု ဆမ်ဆောင်းနှင့် ယင်းကော်ပိုရိတ် လုပ်ငန်းကြီး၏ အလေ့အထများအကြောင်း စာအုပ်များကို ရေးသားခဲ့သော စာရေးဆရာ ရှင်ဂျန်တက်က သုံးသပ်ခဲ့သည်။

“ဝါရင့် အကြီးအကဲ ကွမ် နုတ်ထွက်သွားတဲ့ ဒီလိုအချိန်မှာ ဆမ်ဆောင်းလုပ်ငန်းကြီးဟု ဒုဥက္ကဋ္ဌလီကို ပိုပြီး လိုအပ်လာတယ်လို့ လီရဲ့ရှေ့နေတွေက စောဒက တက်လာနိုင်ပါတယ်” ဟု ၎င်းက ပြောခဲ့ပြီး ယင်းကဲ့သို့ နည်းဗျူဟာကို အခြားသော တောင်ကိုရီးယား မိသားစု စီးပွားရေး အင်ပါယာကြီးများကလည်း ရံဖန်ရံခါ အသုံးပြုလေ့ ရှိသည်ဟု ဆိုသည်။

အခြားသော အမည်မဖော်လိုသည့် လေ့လာသူတစ်ဦးကမူ အသက် ၆၄ နှစ် အရွယ် ဝါရင့်အမှုထမ်းကွမ်၏ နုတ်ထွက်မှုသည် ဆမ်ဆောင်းထိပ်ပိုင်းတွင် ပိုမို ကျယ်ကျယ်ပြန့်ပြန့် အပြောင်းအလဲများ ပြုလုပ်မည့် လက္ခဏာတစ်ခု ဖြစ်နိုင်သည်ဟု ပြောကြားခဲ့သည်။

ဆမ်ဆောင်းသည် ဇူလိုင်မှ စက်တင်ဘာလအတွင်း အမြတ်ငွေ ဒေါ်လာ ၁၂ ဒသမ ၈ ဘီလျံ (ဝမ် ၁၄ ဒသမ ၅ ထရီလျံ) ရနိုင်သည်ဟု ခန့်မှန်းထားကြောင်း ထုတ်ပြန်ခဲ့ပြီး မကြာမီမှာပင် ကွမ်၏ နုတ်ထွက်မှု ထွက်ပေါ်လာခဲ့သည်။ ယင်းအမြတ်ငွေသည် ယမန်နှစ် အလားတူကာလ အတွင်းက ရခဲ့သည့် အမြတ်ငွေထက် သုံးဆနီးပါး မြင့်တက်လာခြင်း ဖြစ်သည့်အပြင် ကာလတစ်လျှောက်လုံး အမြင့်ဆုံးဟုလည်း ဆိုနိုင်သည်။

Ref: AFP