ရန်ကုန်မြို့ လမ်းမတော်မြို့နယ် အတွင်းရှိ ရွှေအရောင်းဆိုင် တစ်ဆိုင်ကို တွေ့ရစဉ်
သြဂုတ် ၁၁ ရက်တွင် ကမ္ဘာ့ရွှေဈေး လေးရက်တိုက်အဖြစ် မြင့်တက်ခဲ့ပြီး ညနေ ဈေးပိတ်ချိန်တွင် ၁၂၈၉ ဒေါ်လာအထိ ရောက်ရှိခဲ့ရာ ပြည်တွင်းဈေးကွက်အတွင်း သြဂုတ် ၁၂ ရက်တွင် ကျပ် ၉၁၅၀၀၀ ကျော်အထိ စံချိန်တင်ဈေးနှုန်းအဖြစ် ဆက်လက်မြင့်တက်ခဲ့ကြောင်း ရွှေရောင်းဝယ်သူများထံမှ သိရသည်။
ဇူလိုင်လဆန်းပိုင်းက ကမ္ဘာ့ရွှေဈေး ကျဆင်းခဲ့ခြင်းကြောင့် ဇူလိုင် ၃ ရက်မှ စတင်ကာ ပြည်တွင်းရွှေဈေးနှုန်း ကျပ် ၉၀၀၀၀၀ အောက်သို့ ရောက်ခဲ့ပြီး ဇူလိုင် ၈ ရက်မှ ၁၁ ရက်အထိ ကျပ် ၈၉၀၀၀၀ အောက်အထိ ကျဆင်းခဲ့ကာ ဇူလိုင် ၁၂ ရက်တွင် ၈၉၀၀၀၀ အထက်၊ ဇူလိုင် ၂၁ ရက်မှ စတင်ကာ ကျပ် ၉၀၀၀၀၀ အထက်၊ သြဂုတ် ၉ ရက်တွင် ၉၁၀၀၀၀ ခန့်၊ သြဂုတ် ၁၀ ရက်တွင် ကျပ် ၉၁၂၈၀၀ အထိ ပြန်ရောက်ခဲ့သည်။ ထို့နောက် ကမ္ဘာ့ရွှေဈေး ဆက်တက်မှုနှင့်အတူ သြဂုတ် ၁၁ ရက်တွင် စံချိန်တင်ဈေးနှုန်းအဖြစ် ၉၁၄၂၀၀ အထိ ရောက်ရှိခဲ့ကာ သြဂုတ် ၁၂ ရက်တွင် ကျပ် ၉၁၅၄၀၀ အထိ စံချိန် ထပ်တင်ခဲ့ခြင်းဖြစ်သည်။
ပြီးခဲ့သော ဧပြီလအတွင်း ပြည်တွင်းရွှေဈေး အနိမ့်ဆုံးနှုန်းသည် ကျပ် ၈၉၄၇၀၀ (ဧပြီ ၃ ရက်) ဖြစ်ပြီး အမြင့်ဆုံးနှုန်းသည် ကျပ် ၉၁၁၈၀၀ (ဧပြီ ၁၈ ရက်) ဖြစ်သည်။ မေလအတွင်း ပြည်တွင်းရွှေဈေး အနိမ့်ဆုံးနှုန်းသည် ကျပ် ၈၉၁၂၀၀ (မေ ၅ ရက်) ဖြစ်ပြီး အမြင့်ဆုံးနှုန်းသည် ကျပ် ၉၁၁၀၀၀ (မေ ၁၈ ရက်) ဖြစ်ခဲ့သည်။
ပြည်တွင်းရွှေဈေးနှုန်းသည် မေ ၁၆ ရက်မှစပြီး ဇူလိုင် ၂ ရက်အထိ ကျပ် ၉၀၀၀၀၀ အထက်သို့ ရောက်ရှိခဲ့သည်။ ကမ္ဘာ့ရွှေဈေး မြင့်တက်ခြင်းကြောင့် ဇွန် ၇ ရက်တွင် ပြည်တွင်းရွှေဈေး ကျပ် ၉၁၃၄၀၀ အထိ စံချိန်တင်ခဲ့ပြီးနောက် ဈေးပြန်ကျခဲ့ရာ ဇွန် ၂၉ ရက်တွင် ကျပ် ၉၀၄၄၀၀ ဇွန် ၃၀ ရက်တွင် ၉၀၀၆၀၀ အထိ ကျဆင်းခဲ့ပြီး ဇူလိုင် ၃ ရက်တွင် မေ ၁၆ ရက်နောက်ပိုင်း ပထမဦးဆုံးအကြိမ်အဖြစ် ကျပ် ၉၀၀၀၀၀ အောက်အထိ ကျဆင်းခဲ့ကြောင်း သိရသည်။ ထို့နောက် ဇူလိုင် ၈ ရက်မှ စတင်ကာ ကျပ် ၈၉၀၀၀၀ အောက်ရောက်ခဲ့ပြီး ဇူလိုင် ၁၂ ရက်တွင် ပြန်တက်ခဲ့ကာ ဇူလိုင် ၁၇ မှ ၂၀ ရက်အတွင်း ကျပ် ၈၉၆၀၀၀ မှ ၈၉၉၀၀၀ ဝန်းကျင် ဖြစ်ပေါ်ခဲ့ပြီး ဇူလိုင် ၂၁ ရက်မှ စတင်ကာ ကျပ် ၉၀၀၀၀၀ အထက်သို့ ရောက်ရှိခဲ့ရာ ဇူလိုင် ၂၇ ရက်တွင် ကျပ် ၉၀၇၀၀၀ ဝန်းကျင် ဖြစ်ပေါ်ခဲ့ပြီး သြဂုတ် ၅ ရက်တွင် ကျပ် ၉၀၅၃၀၀ အထိ ပြန်လည်ကျဆင်းခဲ့ကာ သြဂုတ် ၈ ရက်နောက်ပိုင်း ဆက်တိုက်ဈေးတက်ခဲ့ပြီး သြဂုတ် ၁၁ ရက်တွင် ကျပ် ၉၁၄၂၀၀၊ သြဂုတ် ၁၂ ရက်တွင် ကျပ် ၉၁၅၄၀၀ တို့ဖြင့် စံချိန်သစ်ဈေးနှုန်းများ ဖြစ်ပေါ်ခဲ့သည်။
ကမ္ဘာ့ရွှေဈေးနှုန်းကို ပြန်ကြည့်ပါက ဇွန် ၁ ရက်တွင် ၁၂၆၆ ဒေါ်လာဝန်းကျင် ရှိသော ကမ္ဘာ့ရွှေဈေးနှုန်းသည် ဇွန်လအတွင်း အမြင့်ဆုံးနှုန်းအဖြစ် ဇွန် ၆ ရက်တွင် ၁၂၉၄ ဒေါ်လာအထိ မြင့်တက်ခဲ့ပြီး ဇွန်လအတွင်း အနိမ့်ဆုံးနှုန်းအဖြစ် ဇွန် ၂၆ ရက်တွင် ဒေါ်လာ ၁၂၄၀ အထိ ဈေးကျဆင်းခဲ့ကာ ဇွန် ၃၀ ရက်တွင် ၁၂၄၂ ဒေါ်လာဝန်းကျင် ဖြစ်ပေါ်ခဲ့သည်။ ဇူလိုင်လတွင်လည်း အတက်အကျများ ဖြစ်ပေါ်ခဲ့ပြီး ဇူလိုင်လအတွင်း အနိမ့်ဆုံးနှုန်းအဖြစ် ဇူလိုင် ၇ ရက်တွင် ၁၂၀၅ ဒေါ်လာအထိ ကျဆင်းခဲ့ပြီး အမြင့်ဆုံးနှုန်းအဖြစ် ဇူလိုင် ၂၈ ရက်တွင် ၁၂၆၈ ဒေါ်လာအထိ ရောက်ရှိခဲ့သည်။ ထို့နောက် သြဂုတ် ၂ ရက်တွင် ၁၂၇၁ ဒေါ်လာသို့ ရောက်ခဲ့ပြီး သြဂုတ် ၄၊ ၇ ရက်တွင် ၁၂၅၈ ဒေါ်လာဝန်းကျင်အထိ ပြန်ကျခဲ့သည်။ သြဂုတ် ၈ ရက်တွင် ဒေါ်လာ ၁၂၆၀ ဝန်းကျင်သို့ ပြန်တက်ခဲ့ပြီး ယင်းနောက်ပိုင်း သြဂုတ် ၉ ရက်တွင် ၁၂၆၈ ဒေါ်လာ၊ သြဂုတ် ၁၀ ရက်တွင် ၁၂၇၉ ဒေါ်လာ၊ သြဂုတ် ၁၁ ရက်တွင် ၁၂၈၉ ဒေါ်လာအထိ ဆက်တိုက် မြင့်တက်ခဲ့ခြင်းဖြစ်သည်။
