ပြည်တွင်းရွှေဈေးကွက်အတွင်း အရောင်းအဝယ် ပြုလုပ်နေမှုကို ယခုနှစ် နှစ်ဆန်းပိုင်းက တွေ့ရစဉ်

သြဂုတ် ၁၁ ရက်တွင် ကမ္ဘာ့ရွှေဈေး လေးရက်ဆက်တိုက် မြင့်တက်ခဲ့ပြီး ပြည်တွင်းရွှေဈေးသည် ယခင်စံချိန်တင် ဈေးနှုန်းကို ကျော်ဖြတ်ပြီး ကျပ် ၉၁၄၀၀၀ ကျော်အထိ ရောက်ရှိခဲ့ကြောင်း ဈေးကွက်အတွင်း ရွှေရောင်းဝယ်သူများထံမှ သိရသည်။

ဇူလိုင်လဆန်းပိုင်းက ကမ္ဘာ့ရွှေဈေး ကျဆင်းခဲ့ခြင်းကြောင့် ဇူလိုင် ၃ ရက်မှ စတင်ကာ ပြည်တွင်းရွှေဈေးနှုန်း ကျပ် ၉၀၀၀၀၀ အောက်သို့ ရောက်ခဲ့ပြီး ဇူလိုင် ၈ ရက်မှ ၁၁ ရက်အထိ ကျပ် ၈၉၀၀၀၀ အောက်အထိ ကျဆင်းခဲ့ကာ ဇူလိုင် ၁၂ ရက်တွင် ၈၉၀၀၀၀ အထက်၊ ဇူလိုင် ၂၁ ရက်မှ စတင်ကာ ကျပ် ၉၀၀၀၀၀ အထက်၊ သြဂုတ် ၉ ရက်တွင် ၉၁၀၀၀၀ ခန့်၊ သြဂုတ် ၁၀ ရက်တွင် ကျပ် ၉၁၂၈၀၀ အထိ ပြန်ရောက်ခဲ့သည်။ ထို့နောက် ကမ္ဘာ့ရွှေဈေး ဆက်တက်မှုနှင့်အတူ သြဂုတ် ၁၁ ရက်တွင် စံချိန်သစ်ဈေးနှုန်းအဖြစ် ၉၁၄၂၀၀ အထိ ရောက်ရှိခဲ့ခြင်းဖြစ်သည်။

ပြီးခဲ့သော ဧပြီလအတွင်း ပြည်တွင်းရွှေဈေး အနိမ့်ဆုံးနှုန်းသည် ကျပ် ၈၉၄၇၀၀ (ဧပြီ ၃ ရက်) ဖြစ်ပြီး အမြင့်ဆုံးနှုန်းသည် ကျပ် ၉၁၁၈၀၀ (ဧပြီ ၁၈ ရက်) ဖြစ်သည်။ မေလအတွင်း ပြည်တွင်းရွှေဈေး အနိမ့်ဆုံးနှုန်းသည် ကျပ် ၈၉၁၂၀၀ (မေ ၅ ရက်) ဖြစ်ပြီး အမြင့်ဆုံးနှုန်းသည် ကျပ် ၉၁၁၀၀၀ (မေ ၁၈ ရက်) ဖြစ်ခဲ့သည်။

ပြည်တွင်း ရွှေဈေးနှုန်းသည် မေ ၁၆ ရက်မှစပြီး ဇူလိုင် ၂ ရက်အထိ ကျပ် ၉၀၀၀၀၀ အထက်သို့ ရောက်ရှိခဲ့သည်။ ကမ္ဘာ့ရွှေဈေး မြင့်တက်ခြင်းကြောင့် ဇွန် ၇ ရက်တွင် ပြည်တွင်းရွှေဈေး ကျပ် ၉၁၃၄၀၀ အထိ စံချိန်တင်ခဲ့ပြီးနောက် ဈေးပြန်ကျခဲ့ရာ ဇွန် ၂၉ ရက်တွင် ကျပ် ၉၀၄၄၀၀  ဇွန် ၃၀ ရက်တွင် ၉၀၀၆၀၀ အထိ ကျဆင်းခဲ့ပြီး ဇူလိုင် ၃ ရက်တွင် မေ ၁၆ ရက်နောက်ပိုင်း ပထမဦးဆုံး အကြိမ်အဖြစ် ကျပ် ၉၀၀၀၀၀ အောက်အထိ ကျဆင်းခဲ့ကြောင်း သိရသည်။  ထို့နောက် ဇူလိုင် ၈ ရက်မှ စတင်ကာ ကျပ် ၈၉၀၀၀၀ အောက် ရောက်ခဲ့ပြီး ဇူလိုင် ၁၂ ရက်တွင် ပြန်တက်ခဲ့ကာ ဇူလိုင် ၁၇ မှ ၂၀ ရက်အတွင်း ကျပ် ၈၉၆၀၀၀ မှ ၈၉၉၀၀၀ ဝန်းကျင် ဖြစ်ပေါ်ခဲ့ပြီး ဇူလိုင် ၂၁ ရက်မှ စတင်ကာ ကျပ် ၉၀၀၀၀၀ အထက်သို့ ရောက်ရှိခဲ့ရာ ဇူလိုင် ၂၇ ရက်တွင် ၉၀၇၀၀၀ ဝန်းကျင် ဖြစ်ပေါ်ခဲ့ပြီး သြဂုတ် ၅ ရက်တွင် ကျပ် ၉၀၅၃၀၀ အထိ ပြန်လည်ကျဆင်းခဲ့ကာ သြဂုတ် ၈ ရက်တွင် ကျပ် ၉၀၈၀၀၀၊ သြဂုတ် ၉ ရက်တွင် ကျပ် ၉၁၀၀၀၀ ခန့်၊ သြဂုတ် ၁၁ ရက်တွင် ကျပ် ၉၁၄၀၀၀ ကျော်အထိ ရောက်ရှိခဲ့ပြီး စံချိန်သစ် တင်ခဲ့ခြင်းဖြစ်သည်။

ကမ္ဘာ့ရွှေဈေးနှုန်းကို ပြန်ကြည့်ပါက ဇွန် ၁ ရက်တွင် ၁၂၆၆ ဒေါ်လာဝန်းကျင်ရှိသော ကမ္ဘာ့ရွှေဈေးနှုန်းသည် ဇွန်လအတွင်း အမြင့်ဆုံးနှုန်းအဖြစ် ဇွန် ၆ ရက်တွင် ၁၂၉၄ ဒေါ်လာအထိ မြင့်တက်ခဲ့ပြီး ဇွန်လအတွင်း အနိမ့်ဆုံးနှုန်းအဖြစ် ဇွန် ၂၆ ရက်တွင် ၁၂၄၀ ဒေါ်လာအထိ ဈေးကျဆင်းခဲ့ကာ ဇွန် ၃၀ ရက်တွင် ၁၂၄၂ ဒေါ်လာဝန်းကျင် ဖြစ်ပေါ်ခဲ့သည်။

ထို့နောက် ဇူလိုင်လအတွင်း ဆက်တိုက်အားပျော့ခဲ့ပြီး ဇူလိုင် ၄ ရက်တွင် ၁၂၁၇ ဒေါ်လာ၊ ဇူလိုင် ၇ ရက်တွင် ၁၂၀၅ ဒေါ်လာအထိ ကျဆင်းခဲ့ကာ ဇူလိုင် ၁၀ ရက်နောက်ပိုင်း ဈေးပြန်တက်မှုကြောင့် ဇူလိုင် ၂၄ ရက်တွင် ၁၂၅၇ ဒေါ်လာအထိ ရောက်ခဲ့ပြီး ဇူလိုင် ၂၆ ရက်တွင် ၁၂၄၅ ဒေါ်လာဝန်းကျင်အထိ ပြန်ကျခဲ့သည်။ ထို့နောက် ဇူလိုင် ၂၇ ရက်တွင် ၁၂၆၄ ဒေါ်လာ၊ ဇူလိုင် ၂၈ ရက်တွင် ၁၂၆၈ ဒေါ်လာ၊ သြဂုတ် ၂ ရက်တွင် ၁၂၇၁ ဒေါ်လာအထိ ပြန်တက်ခဲ့ပြီး သြဂုတ် ၄၊ ၇ ရက် တွင် ၁၂၅၈ ဒေါ်လာဝန်းကျင်၊ သြဂုတ် ၈ ရက်တွင် ဒေါ်လာ ၁၂၆၀၊ သြဂုတ် ၉ ရက်တွင် ၁၂၆၈ ဒေါ်လာ၊ သြဂုတ် ၁၀ ရက်တွင် ၁၂၇၉ ဒေါ်လာ၊ သြဂုတ် ၁၁ ရက်တွင် ၁၂၈၈ ဒေါ်လာဝန်းကျင် ရှိခဲ့သည်။

ကမ္ဘာ့ရွှေဈေးနှုန်းသည် ဧပြီလမှစ၍ အတက်အဆင်းကြမ်းလျက်ရှိပြီး လတစ်လအတွင်း အမြင့်ဆုံးနှင့် အနိမ့်ဆုံးနှုန်းသည် ဒေါ်လာ ၄၀ ခန့်မှ ဒေါ်လာ ၈၀ ခန့် အထိ ကွာခြားလျက်ရှိသည်။ ပြီးခဲ့သည့် ဇွန်လအတွင်း အမြင့်ဆုံးနှုန်းနှင့် အနိမ့်ဆုံးနှုန်း ကွာဟချက်သည် ဒေါ်လာ ၅၀ ကျော် ဖြစ်ပေါ်ခဲ့သည်။ ထို့အတူ ဇူလိုင်လအတွင်း အမြင့်ဆုံးနှုန်းမှာ ၁၂၆၈ ဒေါ်လာဖြစ်ပြီး အနိမ့်ဆုံးနှုန်းမှာ ၁၂၀၅ ဒေါ်လာဖြစ်ခြင်းကြောင့် ၆၃ ဒေါ်လာဝန်းကျင် ကွာဟခဲ့ကြောင်း သိရသည်။

■ Writer: စည်သူအောင်