ပဲခူးတိုင်းဒေသကြီး အုတ်တွင်းမြို့နယ်ရှိ မတ်ပဲစိုက်ခင်း တစ်နေရာကို တွေ့ရစဉ် (ဓာတ်ပုံ-ဇော်ဝင်းချစ်)

အိန္ဒိယအစိုးရက ပဲတန်ချိန်ငါးသိန်း တင်သွင်းခွင့်လိုင်စင် ထုတ်ပေးလိုက်ခြင်းကြောင့် ပြည်တွင်း ဈေးကွက်အတွင်း မတ်ပဲနှင့် ပဲစင်းငုံ ဈေးနှုန်းများ ဆက်လက်မြင့်တက်ခဲ့ပြီး မေလဆန်းနှင့် နှိုင်းယှဉ်ပါက တစ်တန်လျှင် နှစ်သိန်းနီးပါးအထိ မြင့်တက်ခဲ့ကြောင်း ဘုရင့်နောင် ကုန်စည်ဒိုင်ရှိ ကုန်သည်များထံမှ သိရသည်။

အိန္ဒိယက မတ်ပဲနှင့် ပဲတီစိမ်းတန်ချိန် သုံးသိန်းအပြင် ပဲစင်းငုံတန်ချိန်နှစ်သိန်း ထပ်မံတင်သွင်းခွင့် ပြုထားပြီး ဇွန်လဆန်းတွင် လိုင်စင်များ စတင်ထုတ်ပေးပြီး သြဂုတ် ၃၁ ရက် နောက်ဆုံးထား တင်သွင်းရမည် ဖြစ်ကြောင်း အိန္ဒိယ အစိုးရဌာနက ထုတ်ပြန်ကြေညာထားသည်။

ရန်ကုန်ဈေးကွက်အတွင်း နေ့စဉ်ပဲအရောင်းအဝယ်ဖြစ်မှု ကုန်သေတ္တာ ၁၀၀- ၁၅၀ ဝန်းကျင်ရှိလာပြီး အိန္ဒိယမှ ပဲတင်သွင်းခွင့် ပြန်ပေးပြီးနောက်ပိုင်း ဇွန် ၅ ရက်အထိ မတ်ပဲတစ်တန် ကျပ် ၁၇၀၀၀၀ ကျော်၊ ပဲစင်းငုံတစ်တန် ကျပ် ၁၉၀၀၀၀ ကျော်မြင့်တက်လာကြောင်း ဘုရင့်နောင် ကုန်စည်ဒိုင်ရှိ ကုန်သည်များထံမှ သိရသည်။

မြန်မာဈေးကွက်တွင်၂၀၁၇ နှစ်စ၌ မတ်ပဲတစ်တန်ကျပ် ၁၂ သိန်းဝန်းကျင်၊ ပဲစင်းငုံအနီတစ်တန် ကျပ်ရှစ်သိန်းခွဲဝန်းကျင် ရှိခဲ့ပြီး အိန္ဒိယ၏ ပဲတင်သွင်းမှု ကန့်သတ်ချက်စတင်ပြီး နောက်ပိုင်း ဈေးနှုန်းများ ထိုးဆင်းခဲ့ခြင်းဖြစ်သည်။ မတ်ပဲနှင့် ပဲစင်းငုံဈေးနှုန်းများသည် တစ်တန်လျှင် ကျပ်သုံးသိန်းကျော်အထိ ကျဆင်းခဲ့ပြီး ယခုအိန္ဒိယမှ ပြန်လည်ဝယ်ယူမည့် ကြေညာချက်များ ထွက်ပေါ်ချိန်နောက်ပိုင်း ဈေးနှုန်းများ ပြန်လည်မြင့်တက်ခဲ့သည်။

အိန္ဒိယ၏ မတ်ပဲနှင့် ပဲတိစိမ်းတန်ချိန် သုံးသိန်းတင်သွင်းခွင့်မပြုမီ မေ ၄ ရက်တွင် ဖြစ်ပေါ်သော ပဲဈေးနှုန်းများမှာ မတ်ပဲ (FAQ/RC) တစ်တန်လျှင် ကျပ် ၃၈၂၀၀၀၊ မတ်ပဲ (SQ/RC) တစ်တန်လျှင် ကျပ် ၅၂၀၀၀၀၊ ပဲစင်းငုံနီ (RC) တစ်တန်လျှင် ကျပ် ၃၄၀၀၀၀ တို့ဖြစ်ပြီး ကြေညာချက်ထွက်ပြီး တစ်လဝန်းကျင်အကြာ ဇွန် ၅ ရက်တွင် မတ်ပဲ (FAQ/RC) တစ်တန်လျှင် ကျပ် ၅၄၃၀၀၀၊ မတ်ပဲ (SQ/RC)  တစ်တန်လျှင် ကျပ် ၆၉၃၀၀၀၊ ပဲစင်းငုံနီ (RC) တစ်တန်လျှင် ကျပ် ၅၃၀၀၀၀ အထိ မြင့်တက်ခဲ့သည်။ မေ ၄ ရက်နှင့် ဇွန် ၅ ရက်တွင် ဖြစ်ပေါ်သော ဈေးနှုန်းများကို နှိုင်းယှဉ်ပါက မတ်ပဲ (FAQ/RC) တစ်တန်လျှင် ကျပ် ၁၆၁၀၀၀၊ မတ်ပဲ (SQ/RC) တစ်တန်လျှင် ကျပ် ၁၇၃၀၀၀၊ ပဲစင်းငုံနီ (RC) တစ်တန်လျှင် ကျပ် ၁၉၀၀၀၀ မြင့်တက်ခဲ့ခြင်းဖြစ်သည်။

အိန္ဒိယနိုင်ငံ၏ သီးနှံဈေးကွက်ဆိုင်ရာ သုတေသနလုပ်ငန်း တစ်ခုက ၂၀၁၈ ခုနှစ် အတွင်း မြန်မာနိုင်ငံတွင် မတ်ပဲတန်ချိန် လေးသိန်းခွဲ၊ ပဲစင်းငုံတန်ချိန် တစ်သိန်းခွဲ ထွက်ရှိမည်ဟု မျှော်မှန်းထားပြီး ၂၀၁၇ ခုနှစ် သြဂုတ် နောက်ပိုင်းမှ ၂၀၁၈ ခုနှစ်အတွင်း မြန်မာ့ပဲဈေးကွက် ဈေးနှုန်းကျဆင်းမှုကြောင့် ၂၀၁၉ ခုနှစ်တွင် ပဲစိုက်ပျိုးမှု လျော့နည်းနိုင်ကာ မတ်ပဲတန်ချိန် နှစ်သိန်းနှင့် ပဲစင်းငုံတန်ချိန် ငါးသောင်းခန့်သာ ထွက်ရှိမည်ဟု ခန့်မှန်းထားသည်။

၂၀၁၇-၂၀၁၈ ဘဏ္ဍာနှစ်အတွင်း အိန္ဒိယနိုင်ငံ၏ ပဲတင်သွင်းမှု ကန့်သတ်ခံခဲ့ရခြင်းကြောင့် တင်ပို့မှုပမာဏ လျော့နည်းခဲ့ပြီး နိုင်ငံတကာ ပဲဈေးများ ကျဆင်းမှုကြောင့် တင်ပို့မှုမှ ရငွေလည်း သိသိသာသာ ကျဆင်းခဲ့သည်။ ၂၀၁၇-၂၀၁၈ ဘဏ္ဍာနှစ်အတွင်း ပြည်ပသို့ ပဲမျိုးစုံတန်ချိန် ၁၃ သိန်းကျော် တင်ပို့ခဲ့ပြီး ဒေါ်လာ ၈၈၃ သန်းကျော် ရရှိခဲ့ကာ ယခင်ဘဏ္ဍာနှစ်နှင့် နှိုင်းယှဉ်ပါက တန်ချိန် တစ်သိန်းကျော်၊ ရငွေဒေါ်လာသန်း ၅၀၀ ကျော် လျော့နည်းခဲ့ကြောင်း စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနမှ ထုတ်ပြန်သော ကုန်သွယ်ရေး စာရင်းများအရ သိရသည်။