![](https://news-eleven.com/sites/news-eleven.com/files/styles/news_detail_image/public/news-images/1000008987.jpg?itok=jg1f0VFz)
တရုတ်နှင့် အမေရိကန်နိုင်ငံတို့မှ အဆင့်မြင့် စစ်ဘက်အရာရှိကြီးများသည် စက်တင်ဘာ ၁၀ ရက်က ဗီဒီယိုကောလ်ဖြင့် ဆွေးနွေးမှုပြုလုပ်ခဲ့ပြီး ၎င်းဆွေးနွေးမှုအတွင်း ဘုံအလေးထားစရာ ကိစ္စရပ်များနှင့်ပတ်သက်၍ ခြေခြေမြစ်မြစ် အမြင်ချင်းဖလှယ် ဆွေးနွေးခဲ့ကြောင်း သိရသည်။
"စက်တင်ဘာ ၁၀ ရက် မနက်ပိုင်းက တရုတ်ပြည်သူ့လွတ်မြောက်ရေးတပ်မတော် တောင်ပိုင်းစစ်ဒေသကြီး၊ ကွပ်ကဲရေးမှူး ဝူယာနန်ဟာ အမေရိကန်စစ်တပ်ရဲ့ အင်ဒို-ပစိဖိတ် ကွပ်ကဲရေးဌာနချုပ် ကွပ်ကဲရေးမှူး ဆမ်မြူရယ် ပါပါရိုနဲ့ ဗီဒီယိုကောလ်ကတစ်ဆင့် ဆွေးနွေးခဲ့တယ်" ဟု တရုတ်ကာကွယ်ရေးဝန်ကြီးဌာနက ထုတ်ပြန်ကြေညာခဲ့သည်။
၂၀၁၆ ခုနှစ်နောက်ပိုင်း အမေရိကန် အမျိုးသားလုံခြုံရေး အကြံပေးတစ်ဦး၏ ပထမဆုံးခရီးစဉ်အဖြစ် ဩဂုတ်လနှောင်းပိုင်းက အမေရိကန် အမျိုးသားလုံခြုံရေးအကြံပေး ဂျိတ်ခ်ဆူလီဗန် တရုတ်သို့ လာရောက်ခဲ့ပြီး မရှေးမနှောင်းတွင် ပထဝီဝင်နိုင်ငံရေး ပြိုင်ဘက်များဖြစ်သည့် အမေရိကန်နှင့် တရုတ်အကြား အဆင့်မြင့် စစ်ဘက်ဆိုင်ရာ ဆွေးနွေးမှု ပြုလုပ်ခဲ့ခြင်းဖြစ်သည်။
ထိုခရီးစဉ်အတွင်း ဆူလီဗန်သည် တရုတ်သမ္မတရှီကျင်းပင်၊ တရုတ်စစ်တပ်၏ အဆင့်မြင့်အရာရှိကြီး ကျန်းယို့ရှာတို့နှင့် တွေ့ဆုံဆွေးနွေးမှုများ ပြုလုပ်ခဲ့သည်။
ဆူလီဗန်နှင့် ကျန်းတို့၏ တွေ့ဆုံစဉ် မကြာမီအတောအတွင်း နှစ်နိုင်ငံ စစ်ဒေသကြီး ကွပ်ကဲရေးမှူးများအကြား ဆွေးနွေးမှုပြုလုပ်ရန် နှစ်ဖက် သဘောတူညီခဲ့သည်ဟု အိမ်ဖြူတော်က ထုတ်ပြန်ခဲ့သည်။