လီဗာပူးလ်တိုက်စစ်မှူး ဒါဝင်နူးနက်ဇ်က ၎င်း၏ Instagram တွင် လီဗာပူးလ်နှင့်သက်ဆိုင်သည့် Post များကို ဖျက်ပစ်ခဲ့ခြင်းမှာ ဝေဖန်သည့်၊ အနုတ်သဘောဆောင်သော Comment များကြောင့်ဖြစ်သည်ဟု ရှင်းလင်းပြောကြားခဲ့သည်။ 

အသက် (၂၄) နှစ်အရွယ်ရှိ ဥရုဂွေးလက်ရွေးစင် တိုက်စစ်မှူး ဒါဝင်နူးနက်ဇ်သည် ၂၀၂၂ နွေရာသီတွင် ပေါ်တူဂီကလပ် ဘင်ဖီကာအသင်းမှ လီဗာပူးလ်အသင်းထံသို့ ကလပ်စံချိိန်တင် ပြောင်းရွှေ့ကြေး ပေါင်(၈၅)သန်း (Add-ons ကြေးများအပါအဝင်)ဖြင့် ပြောင်းရွှေ့လာခဲ့သူဖြစ်သည်။ ဒါဝင်နူးနက်ဇ်သည် လီဗာပူးလ်အသင်းတွင် ထင်မှတ်ထားသလောက် ခြေစွမ်းပြနိုင်ခြင်းမရှိသေးသလို အပိုင်အခွင့်အရေးများကို လွဲချော်ခြင်းကြောင့် ယခုရာသီ နောက်ပိုင်းပွဲစဉ်များတွင် ပွဲထွက်ကစားခွင့်ပင် ပျောက်ဆုံးခဲ့ရသည်။ 

ထို့ပြင် လီဗာပူးလ်အသင်းအနေဖြင့် ပရီးမီးယားလိဂ်ချန်ပီယံဆုကို လက်လွှတ်ခဲ့ရခြင်းအတွက် ဒါဝင်နူးနက်ဇ်နှင့် တိုက်စစ်ကစားသမားများမှာ ဝေဖန်မှုများနှင့် ရင်ဆိုင်ခဲ့ရသည်။ ထို့ကြောင့် ဒါဝင်နူးနက်ဇ်သည် မေလ (၅) ရက်က ကစားခဲ့သည့် ပရီးမီးယားလိဂ်ပွဲစဉ် လီဗာပူးလ် (၄-၂) စပါးပွဲအပြီးတွင် ၎င်း၏ Instagram မှ လီဗာပူးလ်နှင့်ပတ်သက်သည့် Post များအားလုံးကို ဖျက်ပစ်ခဲ့သည်။ ဒါဝင်နူးနက်ဇ်အနေဖြင့် ယင်းသို့ပြုမူခဲ့ခြင်းကြောင့် လီဗာပူးလ်အသင်းမှထွက်ခွာတော့မည်ဟု သတင်းများလည်း ထွက်ပေါ်ခဲ့သည်။ 

ဒါဝင်နူးနက်ဇ်က ဝေဖန်မှုများက ၎င်းအပေါ် သက်ရောက်မှုရှိခဲ့ကြောင်းနှင့် ယခုအခါ ဝေဖန်မှုနှင့် ချီးကျူးမှုများကို ဂရုစိုက်တော့မည်မဟုတ်ကြောင်း ဝန်ခံပြောကြားခဲ့ခြင်းဖြစ်သည်။ ဒါဝင်နူးနက်ဇ်က "ခင်ဗျား ဘောလုံးစကစားချိန်ကနေ ကစားသမားဘဝက အနားယူတဲ့အချိန်အထိ တစ်ယောက်ယောက်ကတော့ ခင်ဗျားကို ဝေဖန်မှာပဲ။ အရင်တုန်းက ကျွန်တော်ဟာ လူမှုကွန်ရက်မှာ ပရိသတ်တွေရဲ့Comment တွေကို အရမ်းဖတ်ပြီး ခံစားခဲ့ ရပါတယ်။ အနုတ်သဘောဆောင်တဲ့ ဝေဖန်တဲ့ Comment တွေက သက်ရောက်မှုမရှိဘူးဆိုလို့ ပြောနေတာက လိမ်တာပါ။ အဲဒီ Comment တွေက တိုက်ရိုက်သက်ရောက်မှု ရှိတာပါ။ အခုတော့ လူမှုကွန်ရက်က Comment တွေကို ကျွန်တော် မဖတ်တော့ပါဘူး။ ကြည့်လည်း မကြည့်တော့ပါဘူး။ ကျွန်တော့်အနေနဲ့ ပွဲအတွင်းဖြစ်တာကို ပွဲထဲမှာပဲ ထားခဲ့ပါတယ်"ဟု ပြောကြားခဲ့သည်။ 

ဒါဝင်နူးနက်ဇ်သည် ၎င်း၏ Instagram မှ လီဗာပူူးလ်နှင့်သက်ဆိုင်သည့် Post များကို ဖျက်ပစ်ခဲ့သော်လည်း ဝုလ်ဗ်အား (၂-၀)ဂိုးဖြင့် အနိုင်ရသည့်ပွဲအပြီးတွင် အန်ဖီးလ်ကွင်း၌ မိသားစုနှင့်အတူ လီဗာပူးလ်ဂျာစီသစ်ကို ဝတ်ဆင်ထားသည့် မိသားစုဓာတ်ပုံကို Instagram Profile ပုံအဖြစ် ပြန်တင်ထားသည်။