ယူရိုက ထင်မှတ်မထားတာတွေ၊ အံ့အားသင့်စရာတွေကို မြင်တွေ့ရတတ်တဲ့ ပြိုင်ပွဲတစ်ခုအဖြစ်  ဘောလုံးပရိသတ်အများစုက မှတ်ယူထားကြပါတယ်။ ဒိန်းမတ်နဲ့ ဂရိတို့လို အောက်အသင်းတွေ ဗိုလ်စွဲခဲ့ဖူးတာအပါအဝင် ပြိုင်ပွဲအတွင်းမှာ ထွက်ပေါ်တတ်တဲ့ ထူးခြားရလဒ်တွေကြောင့်လည်း ဖြစ်ပါတယ်။ အုပ်စုပထမရမယ်လို့ ယူဆထားတဲ့ အသင်းတွေ အုပ်စုဒုတိယ၊ တတိယဖြစ်သွားတတ်တာမျိုးကတော့ ယူရိုမှာ အံ့ဖွယ်လို့တောင် ပြောလို့ မရတော့ပါဘူး။ ဒါကြောင့် လက်ရှိကျင်းပနေတဲ့ ယူ ရို-၂၀၂၄ ပြိုင်ပွဲမှာ ဗိုလ်စွဲဖို့ ရေပန်းအစားဆုံးတွေထဲက တစ်သင်းဖြစ်တဲ့ ပြင်သစ် အုပ်စုဒုတိယနေရာသာ ရရှိခဲ့တာကိုလည်း ထူးခြားဖြစ်စဉ်လို့ သတ်မှတ်နိုင်မှာ  မဟုတ်ပါဘူး။ ဒါပေမဲ့ ပြင်သစ်ကြောင့် ရှေ့ဆက်ရမယ့် ရှုံးထွက်ပွဲစဉ်လမ်းကြောင်းကတော့ တစ်ခြမ်းစောင်းသလို ဖြစ်သွားခဲ့ရပါတယ်။ ရေးဆွဲထားတဲ့ ပွဲစဉ်လမ်းကြောင်းက ပြင်သစ်သာ အုပ်စုဗိုလ်ဖြစ်ခဲ့ရင် အင်္ဂလန်အသင်းရှိနေတဲ့ လမ်းကြောင်းကနေ ဗိုလ်လုပွဲဆီ ချီတက်ရမှာပါ။