အာဆင်နယ်အသင်း၏ တိုက်စစ်ကစားသမား ဆာကာက ယခုရာသီတွင် မိမိတို့အနေဖြင့် ပရီးမီးယားလိဂ်နှင့် ချန်ပီယံလိဂ်ဖလားနှစ်လုံးစလုံး ရရှိနိုင်သည်ဟု သုံးသပ်ပြောကြားခဲ့သည်။
အာဆင်နယ်အသင်းသည် ပရီးမီးယားလိဂ်ပြိုင်ပွဲ၌ အမှတ်ပေးဇယားကို ဦးဆောင်နေပြီး ချန်ပီယံလိဂ်ပြိုင်ပွဲ၌ ကွာတားဖိုင်နယ်အဆင့်သို့ ရောက်ရှိနေသည်။
"ကျွန်တော်တို့ နှစ်ခုစလုံး ရရှိနိုင်ပါတယ်။ နိုင်ငံတကာရက်သတ္တပတ် ရပ်နားမှုက ကျွန်တော်တို့ကို အရှိန်မြှင့်ပေးမှာပါ။ ကျွန်တော်တို့ အီတီဟတ်ကွင်း (မန်စီးတီးနှင့် ယှဉ်ပြိုင်ရမည့်ပွဲ)မှာ ရလဒ်ကောင်း ရရှိနိုင်ပါတယ်"ဟု ဆာကာက ပြောကြားခဲ့သည်။
အာဆင်နယ်အသင်းသည် ယခုရာသီ ပရီးမီးယားလိဂ်ပွဲစဉ် (၂၈) အပြီးတွင် လီဗာပူးလ်အသင်းနှင့်အတူ (၆၄) မှတ်စီ ရရှိထားသော်လည်း ဂိုးကွာခြားချက်အသာဖြင့် အမှတ်ပေးဇယားထိပ်ဆုံး၌ ဦးဆောင်နေသည်။
အာဆင်နယ်အသင်းသည် ပရီးမီးယားလိဂ်အမှတ်ပေးဇယားထိပ်ဆုံးမှ ဦးဆောင်နေသော်လည်း ဗိုလ်စွဲရန် ရေပန်းစားမှုတွင် မန်စီးတီးနှင့် လီဗာပူးလ်အသင်းတို့၏ နောက်တွင် ရှိနေသည်။