လီဗာပူးလ်အသင်းနှင့် ဘိုင်ယန်မြူးနစ်အသင်းတို့သည် လေဗာကူဆင်အသင်းမှ စပိန်နည်းပြ ရှာဘီအလွန်ဆိုကို ခေါ်ယူရန် အပြိုင်ပစ်မှတ်ထားနေရာ လျော်ကြေးအဖြစ် ယူရို(၁၅)သန်းမှ (၂၅)သန်းကြား ပေးချေရမည်ဖြစ်ကြောင်း Sky Germany က ဖော်ပြခဲ့သည်။
အလွန်ဆိုသည် လေဗာကူဆင်အသင်းနှင့် ၂၀၂၆ ခုနှစ် စာချုပ်ချုပ်ဆိုထားသူဖြစ်ပြီး လျော်ကြေးစာချုပ် ထည့်သွင်းမထားသော်လည်း လက်ရှိအနေအထားအရ လေဗာကူဆင်အသင်းက အနည်းဆုံးလျော် ကြေးယူရို(၁၅)သန်း တောင်းဆိုလိမ့်မည်ဟု Sky Germany က သုံးသပ်ခဲ့သည်။
လီဗာပူူးလ်နှင့် ဘိုင်ယန်မြူးနစ်တို့က လျော်ကြေးမည်မျှ ပေးရမည်နည်းဆိုသည်ကို လေဗာကူဆင်အသင်းထံ မေးမြန်းထားကြောင်းလည်း သိရသည်။
လီဗာပူးလ်နည်းပြ ယာဂန်ကလော့ပ်သည် ယခုရာသီကုန်တွင် အသင်းမှထွက်ခွာမည်ဖြစ်သလို၊ ဘိုင်ယန်မြူးနစ်အသင်းကလည်း ယခုရာသီကုန်တွင် လက်ရှိနည်းပြ တူဟယ်လ်နှင့် လမ်းခွဲမည်ဟု ကြေညာထားသည်။
ထို့ကြောင့် အဆိုပါဥရောပထိပ်သီး (၂) သင်းစလုံးသည် ၎င်းတို့၏နည်းပြသစ်အဖြစ် လေဗာကူဆင်အသင်းတွင် စွမ်းဆောင်ရည်ကောင်းများ ပြသနေသည့် အလွန်ဆိုကို ခေါ်ယူရန် ပစ်မှတ်ထားနေခြင်းဖြစ်သည်။
