၂၀၂၃ ခုနှစ်၊ သြဂုတ်လဟာ ချယ်လ်ဆီးအသင်းအတွက် အပြောင်းအလဲတွေများပြားလွန်းသောကာလပါပဲ။ ပြီးခဲ့တဲ့နှစ်အပိုင်းအခြားကတည်းက ချယ်လ်ဆီးအသင်းဟာ မယုံနိုင်လောက်စရာကောင်းတဲ့ ကိစ္စများစွာကို ဖန်တီးခဲ့ပြီး၊ ကြုံတွေ့ခဲ့ပြီးဆိုပေမယ့် လက်ရှိသြဂုတ်လကတော့ ချယ်လ်ဆီးအသင်းနဲ့ သက်ဆိုင်သူအားလုံး မီဒီယာစာမျက်နှာတွေကို မျက်ခြေပြတ်မခံရဲတဲ့အထိ ဗျာများခဲ့ရတာပါ။ ချယ်လ်ဆီးအသင်းရဲ့ ကစားသမားသစ် ခေါ်ယူခြင်း၊ ရောင်းချခြင်း၊ ပစ်မှတ်ထားခြင်းနဲ့ စာချုပ်သစ်ချုပ်ဆိုခြင်းသတင်းတွေက သြဂုတ်လအစမှာပဲ ပလူပျံခဲ့သလို၊ ကစားသမားဒဏ်ရာသတင်းတွေ၊ အသင်းခေါင်းဆောင်အပြောင်းအလဲတွေနဲ့ ၂၀၂၃-၂၄ ပရီးမီးယားလိဂ်ရာသီအဖွင့်ပွဲစဉ် (၂)ပွဲ ဆက်နိုင်ပွဲပျောက်ခဲ့ရမှုတွေဟာလည်း ချယ်လ်ဆီးအသင်းရဲ့ မရိုးနိုင်သောသြဂုတ်ဇာတ်လမ်းတွေပါပဲ။