ဟာရီကိန်းဆိုတာက တစ်ရာသီ (၂၅)ဂိုးလောက် ပုံမှန်သွင်းနေတဲ့ တိုက်စစ်မှူး။ မကြာခင် အသက် (၃၀) ပြည့်တော့မှာဖြစ်ပေမဲ့ ဒါကို ပြစ်ချက်တစ်ခုအဖြစ် ဘယ်သူမှ မရှုမြင်ကြသေးပါဘူး။ ခေတ်မီတိုးတက်နေတဲ့ခေတ်ကြီးမှာ အနေအထိုင်တတ်တဲ့ ပရော်ဖက်ရှင်နယ်ဘောလုံးသမားတွေရဲ့ ကစားသမားဘဝသက်တမ်းကလည်း ပိုရှည်လျားလာတာကြောင့် ဟာရီကိန်းအတွက် နေဝင်ချိန်ကလည်း ဝေးနေပါသေးတယ်။ ဒါပေမဲ့ စပါးအသင်းနဲ့ သူ့ရဲ့ စာချုပ်သက်တမ်းကုန်ဆုံးမယ့်အချိန်ကတော့ မဝေးတော့ပါဘူး။