ရခိုင်ပြည်နယ်တွင် စစ်​အင်အားတိုးချဲ့ခြင်းမျိုးမရှိဘဲ ရပ်ရွာ​အေးချမ်းသာယာ​ရေးနှင့် လမ်းပန်းဆက်သွယ်မှု လုံခြုံချော​မွေ့​စေ​ရေးအတွက် လိုအပ်သည့် လုံခြုံရေးအင်အားကိုသာ အသုံးပြုထား​ကြောင်း နိုင်ငံတော်စီမံအုပ်ချုပ်​ရေး​ကောင်စီ ​ပြော​​ရေးဆိုခွင့်ရှိသူ​ ဗိုလ်ချုပ်​ဇော်မင်းထွန်းက ပြောကြားသည်။

“ရခိုင်ပြည်နယ်နဲ့ပတ်သက်ပြီး​တော့ ကျွန်​တော်တို့စစ်အင်အား​တွေ တိုးချဲ့​နေတယ်ဆိုတဲ့ ​ပြောဆိုချက်မျိုး​တွေနဲ့ ဒါရခိုင်ပြည်သူလူထုကို ထင်​ယောင်ထင်မှားဖြစ်​အောင် ​ဆောင်ရွက်​နေတာမျိုးရှိပါတယ်။ တပ်မတော်အနေနဲ့ကတော့ ရခိုင်ပြည်နယ်မှာ ယခင်ကတည်းက ရှိပြီးဖြစ်တဲ့ လုံခြုံရေးနဲ့ပတ်သက်ပြီး​တော့ ရှိနေတဲ့ အင်အား​တွေအတိုင်းပဲရှိပါတယ်။ ပြည်သူလူထု ရပ်ရွာအေးချမ်းသာယာ​ရေး၊ ပြီးရင် လမ်းပန်းဆက်သွယ်မှု လုံခြုံ​​​ချော​မွေ့​စေ​ရေးအတွက် လိုအပ်တဲ့ လုံခြုံ​ရေးအင်အားကိုပဲ အသုံးပြုထားတာရှိတယ်လို့ပဲ ကျွန်​တော်တို့ ​ပြောချင်ပါတယ်” ဟု ဗိုလ်ချုပ်​ဇော်မင်းထွန်းက ​ပြောကြားသည်။

ULA/AA အဖွဲ့ဝင်များအား နိုင်ငံတော်စီမံအုပ်ချုပ်ရေးကောင်စီက ပြန်လည်စေလွှတ်ပေးမှုနှင့်ပတ်သက်၍ မေးမြန်းရာတွင် ဗိုလ်ချုပ်ဇော်မင်းထွန်းက အထက်ပါအတိုင်း ထည့်သွင်း​ပြောကြားခဲ့ခြင်းဖြစ်သည်။

ဗိုလ်ချုပ်​ဇော်မင်းထွန်းက “ULA/AA အ​နေနဲ့ သူတို့ဆီက​နေ ဖမ်းဆီးထားတဲ့လူ​တွေ​ပေါ့။ သူတို့နဲ့ပတ်သက်လို့ ဖမ်းဆီးထားတဲ့ လူ​တွေကို ကျွန်​တော်တို့အ​နေနဲ့ လွှတ်မ​​ပေးဆိုတဲ့ဟာမျိုး​တွေ တစ်ဖက်သက် စွပ်စွဲထားတာ​ကို တွေ့ရတယ်။ ကျွန်​တော်တို့ အစိုးရအ​နေနဲ့က ULA/AA နဲ့ပတ်သက်ပြီး ကျွန်တော်တို့ အစိုးရလက်ထက်မှာပဲ  NCA ခြောက်နှစ်ပြည့်မှာ ၆၁ ဦးကို ပြစ်ဒဏ်လွတ်ငြိမ်းခွင်​ပေးခဲ့တယ်။ ပြီးရင် စိန်ရတုပြည်​ထောင်စု​နေ့မှာ ၄၆ ဦး တစ်သုတ် ကျွန်​တော်တို့ ပြစ်ဒဏ်လွတ်ငြိမ်းခွင့်​ပေးခဲ့တယ်။ ပြီးရင်အမျိုးသား​​နေ့မှာ ကျွန်​​​တော်တို့ ၁၇ ဦး တစ်သုတ်၊ တစ်ဦး တစ်သုတ်၊ ၁၂၅ ဦး ပြစ်ဒဏ်လွတ်ငြိမ်းခွင့် ​ပေးခဲ့ပြီးဖြစ်တယ်” ဟု ​ပြောကြားသည်။

ထို့ပြင် KIA၊ KNU၊ MNDAA၊ RCSS၊ SSPP၊ TNLA စသည့်အဖွဲ့များနှင့်ပတ်သက်၍ တရားစွဲဆိုခံထားရသည့် လူပုဂ္ဂိုလ်၂၀၅ ဦးကိုလည်း ငြိမ်းချမ်း​ရေးကို ​ရှေးရှုပြီး ပြစ်ဒဏ်လွတ်ငြိမ်းခွင့်​များပေးခဲ့​ကြောင်း ဗိုလ်ချုပ်ဇော်မင်းထွန်းက ​ပြောကြားသည်။