(၁)

ခေါင်းစဉ်သည် “လိုငွေနှစ်မျိုး” ဆိုသည်ကို ရည်ညွှန်းထားခြင်းဖြစ်သည်။ အချို့က နှစ်ထပ်လိုငွေဟုခေါ်သည်။ သို့သော်  အင်္ဂလိပ်ဘာသာဖြင့် Twin Deficit ဟု ဖော်ပြထားသောကြောင့် ဝေါဟာရတစ်လုံးချင်း၏မြန်မာဘာသာအဓိပ္ပာယ်အတိုင်း လိုငွေနှစ်မြွှာဟု အမည်ပေးလိုက်ပါသည်။         

အဆိုပါ ဝေါဟာရကို ရုတ်တရက်မြင်ရချိန်တွင် လှပသောစကားလုံးတစ်လုံးဟု ထင်နိုင်သည်။ ဘောဂဗေဒဘာသာရပ် သဘောတရားအရမူ အနုတ်လက္ခဏာ ဆောင်သော၊ နိုင်ငံတစ်နိုင်ငံ၏စီးပွားရေးတွင် ကြီးမားသောအန္တရာယ်ရှိကြောင်းကိုပြသော စကားလုံး ဖြစ်နေသည်။ ထို့ကြောင့် ပညာရှင်များ၊ သုတေသီများသည် အမြင်အမျိုးမျိုး၊ ရှုထောင့်အမျိုးမျိုးဖြင့် ယနေ့တိုင် စိတ်ဝင်တစားလေ့လာနေကြရဆဲဖြစ်၏။   

(၂)

လိုငွေနှစ်မြွှာ(Twin Deficit) တွင် ပထမလိုငွေအမြွှာမှာ ဘတ်ဂျက်လိုငွေ (Budget Deficit-BD) ဖြစ်ပြီး ဒုတိယလိုငွေအမြွှာမှာ ကုန်သွယ်ရေးလိုငွေ (Trade Deficit-TD ) ဖြစ်သည်။ ဘတ်ဂျက်လိုငွေသည် အစိုးရတစ်ရပ်၏ရသုံးမှန်းခြေငွေစာရင်း (ဘတ်ဂျက်) တွင် အသုံးစရိတ်သည် ရငွေထက် ပိုမိုများပြားနေခြင်းဖြစ်သည်။ ကုန်သွယ်ရေးလိုငွေမှာ နိုင်ငံ၏ သွင်းကုန်တန်ဖိုးသည် ပို့ကုန်တန်ဖိုးထက် ပိုမိုများပြားနေသည့်အခါ ဖြစ်ပေါ်လာသည့် အခြေအနေဖြစ်သည်။ သွင်းကုန် အတွက်  နိုင်ငံရပ်ခြားသို့ ပေးရသည့်ငွေကြေးပမာဏသည် ပို့ကုန်အတွက်ရရှိသည့် ငွေကြေးပမာဏထက် များပြားနေခြင်းဖြစ်သည်။ တစ်တည်းဆိုသော် နိုင်ငံတစ် 

နိုင်ငံ၏ ပြည်ပ ငွေပေးယူရှင်းတမ်း (Balance of Payment-BOP) ၏သာမန်စာရင်း (Current Account ) အပိုင်းတွင် လိုငွေဖြစ်ပေါ်နေခြင်းကိုဆိုလိုသည်။

(၃)

Twin Deficit ဝေါဟာရသည် အမရိကန်စီးပွားရေး အဆောက်အအုံထဲတွင် ဘတ်ဂျက်နှင့် ကုန်သွယ်မှုနယ်ပယ်နှစ်ခုစလုံး၌ လိုငွေပြဿနာရင်ဆိုင်ရချိန်၊၁၉၈ဝပြည့်နှစ်ကာလနောက်ပိုင်းမှ လူသိများခဲ့ခြင်းဖြစ်သည်။ ၁၉၃၀ မတိုင်ခင်နှစ်များစွာက အမေရိကန်စီးပွားရေးအဆောက်အအုံထဲ၌ ဘတ်ဂျက်ပိုငွေအခြေအနေများ ဖြစ်ပေါ်ခဲ့သည်။ ထိုကာလများအလွန်တွင် အစိုးရအသုံးစရိတ်သည် အစိုးရ၏ရငွေအခြေအနေကို  ကျော်လွန်လာခဲ့ပြီးနောက်  ဘတ်ဂျက်လိုငွေပေါ်ပေါ်က်လာကာ ယခင်ရရှိထားသော ကုန်သွယ်မှုပိုငွေအခြေအနေသည်လည်း တဖြည်းဖြည်းလျော့ကျသွားခဲ့သည်။ ၂၀၀၁ ခုနှစ်တွင်   အမေရိကန်စီးပွားရေးအဆောက်အအုံထဲ၌ အသုံးစရိတ်ဖြတ်တောက်မှုမရှိဘဲ အခွန်ရရှိမှုကိုလျှော့ချခဲ့သဖြင့် ဘတ်ဂျက်လိုငွေဖြစ်ပေါ်ခဲ့သည်။ ဘတ်ဂျက်လိုငွေအခြေအနေသည် ၂၀၀၄ ခုနှစ်တွင်   ဂျီဒီပီ၏ ၃ ဒသမ ၅ ရခိုင်နှုန်းအထိဖြစ်ခဲ့သည်။ တစ်ချိန်တည်းမှာပင် ကုန်သွယ်မှုလိုငွေသည်လည်း ၂၀၀၁ ခုနှစ်တွင် ဂျီဒီပီ၏ ၃ ဒသမ ၈ ရာခိုင်နှုန်းရှိနေရာမှ ၂၀၀၄ ခုနှစ်တွင် ၇ ဒသမ ၅ ရာခိုင်နှုန်းအထိ မြင့်တက်လာသည့် အခြေအနေဖြစ်ခဲ့သည်။   

(၄)

ပြီးခဲ့သည့်ဇွန်လက https://www.business-standard.com ဝက်ဆိုက်စာမျက်နှာပေါ်တွင် ဖတ်ရှုခဲ့ရသည့် အိန္ဒိယနိုင်ငံ၏စီးပွားရေးသတင်းတစ်ပုဒ်ထဲ၌ ရုရှား-ယူကရိန်းစစ်ပွဲဖြစ်ပွားသည့် ရက်ပေါင်း ၁ဝဝကျော်ချိန်တွင် စစ်ပွဲသက်ရောက်မှုများသည် နိုင်ငံနယ်နိမိတ်များကိုကျော်လွန်ကာ ကမ္ဘာ့နိုင်ငံများအသီးသီး၌ဖြစ်လာခဲ့သည်။ ရေနံဈေးနှုန်းသည် ဒေါ်လာ ၁၀၀ အထက်၊ ရောင်းလိုအားကွင်းဆက်များ ပြတ်တောက်၊ ငွေကြေးဖောင်းပွမှု ကမ္ဘာ့နေရာအနှံ့ စသဖြင့် အနုတ် လက္ခဏာများဖြစ်လာသည်။ အိန္ဒိယနိုင်ငံသည်လည်း သက်ရောက်မှုမလွတ်နိုင်ခဲ့ပေ။ မကြာသေးခင်က အိန္ဒိယနိုင်ငံ၏လစဉ်စီးပွားရေးသုံးသပ်မှုတွင် အိန္ဒိယနိုင်ငံ  

ဘဏ္ဍာရေးဝန်ကြီးထံက Twin Deficit  ပြဿနာနှင့်ပတ်သက်၍ သတိထားရန်လိုကြောင်း စကားသံထွက်လာသည်ဟု ဖော်ပြထားသည်။ 

နှစ်ထပ်လိုငွေ သို့မဟုတ် လိုငွေနှစ်မြွှာဟုခေါ်သည့် ဘတ်ဂျတ်နှင့် ကုန်သွယ်မှုစာရင်း (ပြည်ပငွေပေးငွေယူ ရှင်းတမ်း၏ သာမန်ငွေစာရင်း) တို့တွင် လိုငွေ တစ်ပြိုင်နက်ဖြစ်ပေါ်လာခြင်းသည် နိုင်ငံတစ်နိုင်ငံအတွက် မက်ခရိုစီးပွားရေးအန္တရာယ်ဖြစ်သဖြင့် အိန္ဒိယနိုင်ငံသည် စိုးရိမ်ပုံပေါ်သည့်အခြေအနေဖြစ်သည်။ 

နောက်ဆက်တွဲ ကြုံတွေ့လာရမည့် ပြဿနာများကလည်း နိုင်ငံ့စီးပွားရေးတွင် အခက်အခဲများဖြစ်လာစေနိုင်သည်။ အကန်း တစ္ဆေမကြောက်ဆိုသကဲ့သို့ လိုငွေနှစ်မြွှာ၏ဆိုးကျိုးများကိုမသိသော နိုင်ငံအစိုးရများအနေဖြင့် စိတ်လှုပ်ရှားစိုးရိမ်စရာမဖြစ်နိုင်သော်လည်း သက်ရောက်နိုင်ခြေဆိုးကျိုးများကြိုတင်မှန်းဆထားနိုင်သည့် အစိုးရများမူ စိုးရိမ်ထိတ်လန့်လျက်ရှိနေတတ်ကြသည်။ 

အိန္ဒိယစီးပွားရေးအပေါ် မည်သို့သက်ရောက်နိုင်သနည်း။ ရုရှား-ယူကရိန်းစစ်ပွဲ၏ ဆက်စပ်သက်ရောက်မှုများကြောင့် ဈေးကွက်ထဲတွင် ၎င်း၏ ကုန်ပစ္စည်းများရောင်းလိုအား အခြေအနေ အားနည်းသွားမည်။ ကုန်ပစ္စည်းပြတ်လတ်မှုများဖြစ်ပေါ်လာနိုင်သည်။ ထိုအခြေအနေသည် ကုန်ဈေးနှုန်းများမြင့်တက်မှု ဆီသို့ဦးတည်သွားခဲ့လျှင် အင်ဖလေးရှင်းဒဏ် ပြည်သူလူထုခံရမည်။ ထိုအခါ ပြည်သူလူထု ဈေးနှုန်းကြီးမြင့်မှုဒဏ်သက်သာရာရစေရန်အတွက် အစိုးရအနေဖြင့် ဈေးနှုန်း ကူညီထောက်ပံ့မှုများပြုလုပ်လာခဲ့ပါက အသုံးစရိတ် ဝန်ထုပ်ဝန်ပိုးကြီးမားလာတော့မည်။ လောင်စာဆီအပေါ် အစိုးရအခွန်လျှော့ချပေးခြင်း၊ ဖြတ်တောက်ပေးခြင်း

တို့ပြုလုပ်ခဲ့မှုကြောင့် အိန္ဒိယအစိုးရသည် ရူပီးငွေကုဋေပေါင်း  ၈၅၀၀၀ ကုန်ကျသွားနိုင်ဖွယ်ရှိနေသည်ဟု ဆိုသည်။  

ရုရှား-ယူကရိန်းစစ်ပွဲအချိန်ကြာမြင့်လေအိန္ဒိယစီးပွားရေးအဆောက်အအုံအတွင်းဖြစ်လာနိုင်သည့် တစ်နွယ်ငင်တစ်စင်ပါ သက်ရောက်မှုများကို ကုစားရန်အတွက် အစိုးရအသုံးစရိတ်ပိုများလေဖြစ်မည်။ ဘတ်ဂျတ်လိုငွေပမာဏမြင့်မားလာမည်။ ကုန်သွယ်မှုလို ငွေပမာဏသည်လည်း ပိုမိုကြီးမားလာနိုင်သည်။ လိုငွေအခြေအနေနှစ်ရပ်သည် သွင်းကုန်များဈေးနှုန်းကြီးမြင့်လာခြင်း၊ ရူပီးငွေကြေးတန်ဖိုးအားနည်းလာခြင်း၊ ကုန်သွယ်ရေးမညီမျှမှုများ ကြုံတွေ့လာရခြင်း စသဖြင့် အနုတ်လက္ခဏာသက်ရောက်မှုများဖြစ်ပေါ်လာမည်။ ထိုအခြေအနေသည် လိုငွေပမာဏကြီးမားလာခြင်းနှင့် ပြည်တွင်းသုံးရူပီးငွေကြေး တန်ဖိုးအားနည်းလာခြင်း 

အန္တရာယ်တို့ကို အဆက်မပြတ်ဖန်တီးလာနိုင်သည်ဟုလည်းကြိုတင်သုံးသပ်နေကြသည်။

 

(၅)

စီးပွားရေးသုတေသီအချို့က လိုငွေအခြေအနေနှစ်ရပ်သည် အတူတကွပေါ်ပေါက်လာသည်ဟု ယုံကြည်ကြသော်လည်း အချို့ကမူ ထိုအခြေအနေမျိုးအမြဲတမ်းမဖြစ်နိုင်။ ဆက်စပ်မှုရှိနိုင်သော်လည်း သီးခြားစီဖြစ်ပေါ်နိုင်သည်ဟုဆိုသည်။ လိုငွေနှစ်မြွှာကိုဖော်ညွှန်းသော သာမန်စာရင်းလိုငွေနှင့် ဘတ်ဂျက်လိုငွေတို့ကြား ဆက်စပ်မှုနှင့်ပတ်သက်၍ ထင်ရှားသော သီအိုရီနှစ်ခုမှာ ဂျွန်မေနပ်ကိန်းစ်၏အစဉ်အလာချဉ်းကပ်မှု Absorption Theory နှင့် ကနေဒီယန် စီးပွားရေးပညာရှင် ရော့ဘတ်မန်းဒဲလ် (Robert Mundell) နှင့် ဗြိတိသျှစီးပွားရေးပညာရှင် ဂျေမာကပ်စ်ဖလန်းမင်း (J. Marcus Fleming) တို့၏ မန်းဒဲလ်-ဖလန်းမင်း မော်ဒယ်လ်  

(Mundell-Fleming model)ဖြစ်သည်။   

Absorption Theory အရ ဘတ်ဂျက်လိုငွေနှင့် သာမန်စာရင်းလိုငွေတို့သည် အပေါင်းဆက်စပ်မှုရှိသည်။ ဘတ်ဂျက်လိုငွေမြင့်မားမှုသည် ပြည်တွင်းဝင်ငွေတိုးစေပြီး ပြည်တွင်းစားသုံးမှုကိုမြင့်တက်လာစေသည်။ ထိုအခြေအနေသည်  သွင်းကုန်ပမာဏကိုမြင့်မားလာစေကာ သာမန်စာရင်းလိုငွေကြီးထွားလာမည်။ 

ထို့ကြောင့် ဘတ်ဂျက်လိုငွေသည် သာမန်စာရင်းလိုငွေ (ကုန်သွယ်မှုလိုငွေ) ကို ဦးတည်သွားသည်ဟုဆိုသည်။  

မန်ဒဲလ်-ဖလန်းမင်းမော်ဒယ်လ်အရ ဘတ်ဂျက်လိုငွေမြင့်မားမှုသည် အတိုးနှုန်းနှင့် ငွေလဲနှုန်းကို မြင့်တက်စေသည်။ အတိုးနှုန်းမြင့်တက်လာမှုသည်  ပြည်တွင်းဈေးကွက်ထဲ၌ လာရောက်ရင်းနှီးမြှုပ်လာစေရန် နိုင်ငံခြားရင်းနှီးမြှုပ်နှံမှုများကို ဆွဲဆောင်စေသည်ဟုဆိုသည်။ ထိုအခြေအနေသည် ပြည်တွင်းသုံးငွေကြေးကို တန်ဖိုးမြင့်လာစေပြီး အကျိုးဆက်အားဖြင့် သွင်းကုန်များကိုဈေးသက်သာလာစေသည်။ ပို့ကုန်များဈေးနှုန်းကြီးမြင့်လာစေမည်။ ထိုအခါ သွင်းကုန်ပမာဏ မြင့်မားလာနိုင်ပြီး သာမန် စာရင်းလိုငွေ (ကုန်သွယ်မှုလိုငွေ) ဆီသို့ဦးတည်သွားနိုင်သည်ဟု ဆိုထားသည်။

(၆)

စီးပွားရေးအဆောက်အအုံတစ်ခုတွင် “လိုငွေ” သည် စီးပွားရေးအားနည်းမှုနှင့်ပတ်သက်၍ အကြောင်းတရား သို့မဟုတ် လက္ခဏာတစ်ရပ်ဖြစ်သည်ဟုဆိုကြသည်။ ပြည်တွင်းဈေးကွက်နှင့် နိုင်ငံတကာဈေးကွက် နှစ်ခုတို့တွင် အိမ်ထောင်စုများ၊ စီးပွားရေးလုပ်ငန်းများနှင့် အစိုးရတို့ ၏ဆုံးဖြတ်ချက်များ၊ အပြန်အလှန်တုံ့ပြန်ပြုမူမှုများကြောင့် ဖြစ်ပေါ်လာသော မက်ခရိုစီးပွားရေးအခြေအနေဖြစ်သည်။ ပြည်တွင်းဈေးကွက်နှင့် နိုင်ငံတကာဈေးကွက်များကြားရှိ ဆက်စပ်မှုဖြစ်သော   လိုငွေနှစ်မြွှာသည် အတွင်းလိုငွေ (internal deficit) နှင့် အပြင်လိုငွေ (external deficit ) လည်းဖြစ်ပေသည်။ 

(၇)

နိုင်ငံတစ်နိုင်ငံအနေဖြင့် အတွင်း၊ အပြင် အခြေအနေနှစ်ရပ်စလုံးကို ဆက်စပ်စဉ်းစားလုပ်ဆောင်ဖို့လိုသည်။ စီးပွားရေးပညာရှင်များနှင့်သုတေသီများသည် မက်ခရိုစီးပွားရေးအခြေအနေနှင့် ရေရှည်ဖွံဖြိုးတိုးတက်မှုတို့ကို ထိန်းသိမ်းနိုင်ရန်အတွက် သာမန်စာရင်းလိုငွေပြမှုနှင့် ဘတ်ဂျက်လိုငွေပြမှုကို ထိန်းချုပ်ထားနိုင်ရမည်။ ဖွံ့ဖြိုးဆဲနိုင်ငံများတွင် ဘတ်ဂျတ်လိုငွေ (အတွင်းလိုငွေ) နှင့် ကုန်သွယ်မှုလိုငွေ (အပြင်လိုငွေ) နှစ်ခု၏ ဆက်စပ်ဖြစ်ပေါ်မှုသည် ပိုမိုပြင်းထန်သည်ဟု ကောက်ချက်ချထားကြသည်။ 

  အချေအတင်ဆွေးနွေးစရာများရှိနေသည့်   “လိုငွေနှစ်မြွှာ” ဖြစ်စဉ်ကို ပညာရှင်၊ သုတေသီများက ရှုထောင့်အမျိုးမျိုးဖြင့် ဆက်လက်လေ့လာ နေကြဆဲဖြစ်သည်။   အနီးစပ်ဆုံးအကြောင်းရင်းမှန်ကို သိရှိဖော်ထုတ်နိုင်ခဲ့ပါလျှင် စီးပွားရေးမူဝါဒရေးဆွဲသူအနေဖြင့် ဘဏ္ဍာရေးအခြေအနေမှတစ်ဆင့် ပြည်ပငွေပေးငွေယူရှင်းတမ်း နှင့် ငွေကြေးပမာဏ နှစ်ခုစလုံးကို ကျွမ်းကျင်စွာကိုင်တွယ်နိုင်မည်ဖြစ်ပြီး “လိုငွေနှစ်မြွှာ” ကြောင့် ဖြစ်ပေါ်လာနိုင်သည့် မက်ခရိုစီးပွားရေးအန္တရာယ်များကို ကြိုတင်ရှောင်ရှားနိုင်မည်ဖြစ်သည်။   

www.business-standard.com 

 

စောနိုင် (အသုံးချဘောဂဗေဒ)