မြန်မာနိုင်ငံဆိုင်ရာ ဗြိတိန်သံရုံးယာယီတာဝန်ခံ Pete Vowels သည် မြန်မာနိုင်ငံ၌ ၎င်း၏လုပ်ငန်းတာဝန်များကို ရုတ်တရက် ယနေ့(ဇူလိုင် ၁၃ ရက်)တွင် ရပ်ဆိုင်းလိုက်ရကြောင်း ၎င်း၏တွစ်တာစာမျက်နှာ၌ ရေးသားထားသည်။
၎င်းကို နစကက မြန်မာနိုင်ငံမှ ထွက်ခွာရန် ဖိအားပေးညွှန်ကြားခဲ့မှုအတွက် စိတ်မကောင်းဖြစ်ရကြောင်း၊ သို့သော်တရားဝင်အသိအမှတ်ပြုရန် ဖိအားပေးခံခဲ့ရမှုအပေါ် ၎င်းအနေဖြင့် ငြင်းဆန်နိုင်ခဲ့သည့်အတွက် ဝမ်းသာမိကြောင်း Pete Vowels က ၎င်း၏တွစ်တာစာမျက်နှာ၌ ရေးသားထားသည်။
ထို့ပြင် ၎င်းအနေဖြင့် မြန်မာနိုင်ငံမှ ထွက်ခွာခဲ့ရသော်လည်း မြန်မာပြည်၌ ကျန်ခဲ့သည့်အဖွဲ့သားများက တရားမျှတမှု၊ လွတ်လပ်မှုနှင့် ငြိမ်းချမ်းမှုကလွဲလျှင် မည်သည့်အရာကိုမျှ လိုလားခြင်းမရှိသည့် မြန်မာပြည်သူများအတွက် တတ်နိုင်သည့်ဘက်က ဆက်လက်ဆောင်ရွက်သွားမည်ဖြစ်ကြောင်း ၎င်း၏ တွစ်တာစာမျက်နှာ၌ ရေးသားထားသည်။
အဆိုပါကိစ္စနှင့်ပတ်သက်၍ နိုင်ငံခြားရေးဝန်ကြီးဌာနက ဇူလိုင် ၁၃ ရက် ည ၁၁ နာရီခွဲအထိ တစ်စုံတစ်ရာ ထုတ်ပြန်ထားခြင်း မရှိသေးပေ။
မြန်မာနိုင်ငံဆိုင်ရာ ဗြိတိန်သံရုံးအကြီးအကဲ Pete Vowels သည် ၂ဝ၂၁ ခုနှစ် သြဂုတ်လက စတင်ပြီး မြန်မာနိုင်ငံမှာ တာဝန်ထမ်းဆောင်ခဲ့ခြင်းဖြစ်သည်။
