၁၉၄၈ ခုနှစ်တွင် မြန်မာနိုင်ငံ လွတ်လပ်ရေး ရရှိလာခဲ့ပြီးနောက် နှစ်ပေါင်း ၃၀ အကြာ ၁၉၇၈ ခုနှစ် ရောက်သည်အထိ မြန်မာနိုင်ငံအတွင်း နယ်ချဲ့ဆန့်ကျင်ရေးနှင့် အမျိုးသား လွတ်လပ်ရေး လှုပ်ရှားမှုများကို ဂုဏ်ပြုလေးစားသော၊ တန်ဖိုးထားသော အမျိုးသားရေး စိတ်ဓာတ်များ (Nationalist Mindsets) နှင့် ပြည် ချစ်စိတ်ဓာတ်များ (Patriotic Mindsets) များ ထွန်းကားရှင်သန်နေခဲ့ ကြဆဲ ဖြစ်ခဲ့သည်။ တစ်ချိန်က ထင် ရှားခဲ့သော ဗကသများအဖွဲ့ချုပ်၏ “ကျောင်းသားသမဂ္ဂ အမှတ် (၂) သီချင်းတွင်ပင်” အမျိုးသားရေးကို ကြိုဆိုလို့ရည်၊ လွတ်လပ်ခိုင်မြဲ အဓွန့် ရှည်ဖို့ အတည်၊ ပြည်ချစ်စိတ်ဓာတ် မွေးစို့ညီ၊ လွတ်လပ်ရေး ထိန်းသိမ်း မည် ... နယ်ချဲ့ရန်ကို တွန်းဖြိုမည်” အစရှိသော တေးသွား စာသားများ ပါဝင်နေခဲ့သည်။ ထိုစကားလုံးများက နယ်ချဲ့ဆန့်ကျင်ရေး၊ အမျိုးသားရေး၊ အမျိုးသားလွတ်လပ်ရေး၊ လွတ်လပ်ရေးကို ကာကွယ်စောင့်ရှောက် ရေးနှင့် “ပြည်ချစ်ဝါဒ” (Patriotism) ခံယူချက်များကို အတိအကျ ဖော်ပြ နေခဲ့သည်။

■ စစ်ကြိုကာလ မြန်မာ့မဟာဗျူဟာများ

ဒုတိယကမ္ဘာစစ် မဖြစ်ခင်က မြန်မာတို့အနက် လူဦးရေ အများစု၏ မင်းလောင်းမျှော်ဝါဒက နာဇီ ဂျာမနီ၏ အဓိပတိ (ဝန်ကြီးချုပ်) အဒေါ့ဖ်ဟစ်တလာကို “ကယ်တင်ရှင်”အဖြစ်လည်းကောင်း၊ “စကြာမင်း“ အဖြစ်လည်းကောင်း၊ အရူးအမူး ကိုးကွယ်စွဲလမ်း၊ အထင်ကြီးလွန်းနေသော အဆင့်သို့ ရောက်ရှိနေခဲ့သည်။

ဟစ်တလာ၏ အာရိယန်မျိုးနွယ်စုသင်္ကေတ ဖြစ်သော၊ နာဇီစကြာတံဆိပ်ကလည်း မြန်မာတို့၏ သမိုင်းဝင် ၀ိုင်အမ်ဘီအေ အသင်း၏ မူလ ဗုဒ္ဓဘာသာ အမှတ်တံဆိပ် (ဓမ္မ စကြာတံဆိပ်) နှင့် ဆင်တူနေသည်။

အရှေ့ဘက်မှ ဖက်ဆစ် ဂျပန် (နိပွန်) အင်ပါယာ၏ တိုကျို ရေဒီယိုကလည်း “မဟာအရှေ့အာရှ သာတူညီမျှ ကောင်းစားရေးဝါဒ”နှင့် အာရှနိုင်ငံများ၏ အမျိုးသားလွတ်မြောက်ရေး လှုပ်ရှားမှုများကို အားပေး ထောက်ခံသော ၀ါဒဖြန့်ချိမှုများကို အလွန် စိတ်လှုပ်ရှားဖွယ်ရာ၊ နိုး ကြားတက်ကြွဖွယ်ရာ ဖြစ်အောင် နေ့စဉ် ထုတ်လွှင့်နေခဲ့သည်။

■ စစ်နိုင်မည့် ကယ်တင်ရှင်များ

ထိုခေတ်က မြန်မာလူဦးရေ၏ အများစုက အကယ်၍ ဒုတိယကမ္ဘာစစ် ဖြစ်ပွားလာခဲ့လျှင် (၁) နာဇီဂျာ မနီ၊ ဖက်ဆစ်အီတလီ၊ ဖက်ဆစ်ဂျပန်၊ ဖက်ဆစ်စပိန်၊ သြစတြီးယား နှင့် တူရကီနိုင်ငံများက တစ်စုတစ်စည်းတည်း ရပ်တည်စစ်ပြုမည်ဟု လည်းကောင်း၊ (၂) နာဇီဖက်ဆစ် ဝင်ရိုးတန်း နိုင်ငံများက မုချ စစ်နိုင် မည်ဟုလည်းကောင်း၊ (၃) ဗြိတိသျှ အင်ပါယာနှင့် အမေရိကန်အင်ပါယာကို နာဇီဖက်ဆစ် ဝင်ရိုးတန်း တပ်ပေါင်းစုက တက်သိမ်းနိုင်လိမ့်မည်ဟုလည်းကောင်း၊ (၄) နာဇီဖက် ဆစ်ဝင်ရိုးတန်းတပ်ပေါင်းစု၏ ကျေး ဇူးတော်များအားဖြင့် အာရှ၊ အာဖရိကမှ ကိုလိုနီနိုင်ငံများ လွတ်လပ်ရေး ရလာမည်ဟုလည်းကောင်း၊ (၅) ဂျပန်အင်ပါယာက ကတိပေးထားသော “မဟာအရှေ့အာရှ သာတူညီမျှ ကောင်းစားရေးစနစ်”ကို လာမည့် ငါးနှစ်၊ ဆယ်နှစ် နှစ်တိုကာလတစ်ခုအတွင်း ထူထောင်နိုင်တော့မည်ဟု လည်းကောင်း လုံးလုံးလျားလျား မျက်စိမှိတ်၊ မျက်ကန်း၊ ယုံကြည် စွဲလမ်း ထောက်ခံ အားကိုးနေခဲ့ကြသည်။

■ ပုံသွင်းခံထားရသော မြန်မာလူထု

ထိုကဲ့သို့ မြန်မာလူဦးရေ၏ အများစုက နာဇီဖက်ဆစ် ဝင်ရိုးတန်းနိုင်ငံများကို အားကိုးအထင်ကြီးနေရခြင်း၏ အကြောင်းရင်းများစွာအနက်  လူသိနည်းသော အကြောင်းရင်းတစ်ခုမှာ ဗြိတိသျှအုပ်စိုးသူများ ကိုယ်တိုင်က သူတို့၏ လက်အောက်ခံ ကိုလိုနီများမှ ပြည်သူများအနေဖြင့် သူတို့၏ အမျိုးသားလွတ်လပ်ရေးများအတွက် ဆိုဗီယက်ပြည်ထောင်စုနှင့် နိုင်ငံတကာ ကွန်မြူနစ် လှုပ်ရှားမှုကို အထင်ကြီးအားကိုး‌ နေကြခြင်းမျိုး လုံးဝမရှိစေရန်နှင့် ယင်းအစား ဗြိတိသျှ၏ မဟာမိတ်များဖြစ်သော ပြင်သစ်နှင့် အမေရိကန်ပြည်ထောင်စုက အလွန်သတိထား စိုးရိမ်နေကြသော နာဇီဖက်ဆစ်  ဝင်ရိုးတန်း နိုင်ငံများကိုသာ မှားယွင်းလွဲချော်စွာ အားကိုး အထင် ကြီးနေကြစေရန် စနစ်တကျ အကွက်ဆင်၊ ပုံသွင်း ပေးခံထားရခြင်းကလည်း လျှို့ဝှက်ပြီး လူသိနည်း သော အကြောင်းရင်းတစ်ခုပင် ဖြစ်သည်။

ထိုကဲ့သို့ မဟာဗျူဟာမြောက် လှည့်ဖြားပုံသွင်းမှုများကို မြန်မာ ပြည်တွင်သာမက အခြားသော ဗြိတိသျှ ကိုလိုနီနယ်မြေများတွင်ပါ လုပ်ဆောင်ခဲ့သည်။

ဗြိတိသျှကိုလိုနီ တောင်အာဖရိကတွင် ဒတ်ခ်ျလူမျိုးနွယ်ဖွား လူဖြူဘိုးဝါးလူမျိုး၏ အများစုက နာဇီ ဂျာမနီကို အားကိုးအထင်ကြီးနေခဲ့ရသည်။ ဗြိတိသျှလက်အောက်ခံ အီဂျစ်နိုင်ငံတွင် အာရပ် မွတ်စလင်များက နာဇီဂျာမနီနှင့် ဖက်ဆစ် အီတလီကို အားကိုးနေခဲ့ရသည်။

ယခင်ကတည်းက အင်္ဂလန်မှ ဗြိတိသျှ “မှူးးမတ်လူတန်းစား” (Aristocrats) မှ ကိုလိုနီနယ်မြေများတွင် ကျင့်သုံးရန် ချမှတ်ပေးထားသော “အဂ္ဂမဟာဗျူဟာ” (Grand Strategy) အောက်တွင် သက်ဆိုင်ရာ ကိုလိုနီဒေသကြီးများအလိုက်  ဗြိတိသျှ ကိုလိုနီ ဗျူရိုကရက် လူတန်းစားက လက်တွေ့ဆင့်ပွား ကျင့်သုံး နေသော “ဒေသဆိုင်ရာ မဟာဗျူဟာများ” (Regional Strategies) နှင့်အညီ၊ အင်္ဂလိပ်အစိုးရ၏ လျှို့ဝှက်အေးဂျင့်များက ကိုလိုနီဒေသများအလိုက်၊ ပုဂ္ဂလိကသတင်းစာ တိုက်ပိုင်ရှင်များ၊ ပုဂ္ဂလိကဂျာနယ် တိုက်ပိုင်ရှင်များ နှင့် ပုဂ္ဂလိက စာအုပ်တိုက်ပိုင်ရှင်များအဖြစ်၊ အသွင်ယူ ဟန်ဆောင်ကာ အဆင့်မြင့် ပုံဖျက်ဝါဒဖြန့်ချိရေး လှည့်ဖျားမှုလုပ်ငန်းများကို စနစ်တကျ အမှုတော်ထမ်းကာ လုပ်ငန်းလုပ်ဆောင်ခဲ့ကြရ သည်။

လူမျိုး အလိုက်၊ နိုင်ငံအလိုက် ကြီးမားသော လူဦးရေထုတစ်ရပ်လုံးကို လှည့်ဖြားပုံသွင်းရာတွင် ဗြိတိသျှမှူးမတ်များနှင့် ဗျူရိုကရက်များက အဆင့်မြင့် မဟာဗျူဟာများကို အသုံးပြုခဲ့ကြသည်။

(၁) ဗြိတိသျှ အင်ပါယာ အတွက် ရေရှည်တွင် ပိုမို အန္တရာယ် ကြီးမားပြီး၊ စစ်ရေးအစစ် (Real Military) နှင့် နိုင်ငံရေးအစစ် (Real Politics) တွင် ရေရှည်အတွက် ပိုမို အင်အားကြီးမားလာဖွယ် ရှိနေသော အင်အားစု (ဥပမာ - ဆိုဗီယက် ပြည် ထောင်စု) ကဲ့သို့သော နိုင်ငံများကို လက်အောက်ခံ ကိုလိုနီ ပြည်သူများ က အထင်ကြီးမိခြင်း၊ အားကိုးမိခြင်း မရှိစေရန် ဖြစ်နိုင်သမျှ ပုံဖျက် လှည့် ဖျားထားသည်။

(၂) ဗြိတိသျှ အင်ပါယာ၏ လတ်တလော ရန်သူများအဖြစ် ဥရောပတိုက်၏ အရပ်ဘက် လူ့ အဖွဲ့အစည်းအတွင်း ရေပန်းစားနေသော၊ လူအများ စိတ်ဝင်စားခံနေရသော၊ စက်မှုအင်အားကြီးနိုင်ငံများ အနက် နယ်မြေကျဉ်းမြောင်းပြီး သယံဇာတ မလုံလောက်သော၊ “ရေရှည်စစ်ပွဲ (Protracted War)” အတွင်း မိမိက အနိုင်ရနိုင်ဖွယ်ရာ ရှိနေသော၊ လတ်တလော ရေပန်းစား ရန်သူများ (ဥပမာ - ဂျာမနီ၊ အီ တလီ၊ ဂျပန်နိုင်ငံများ) ကိုသာ လက်အောက်ခံ ကိုလိုနီပြည်သူများက မှားယွင်းစွာ အထင်ကြီးအားကိုးနေစေရန်၊ စနစ်တကျ အကွက်ဆင်၊ လှည့်ဖြားပေးထားခဲ့သည်။

 (၃)ယင်းကဲ့သို့သော အခြေအနေမျိုးတွင် အိုင်ယာလန် လွတ်လပ်ရေး စစ်ပွဲအတွင်း အမေရိကန်များနှင့် ပြင်သစ်များက အိုင်းရစ် လူမျိုးများကို လျှို့ဝှက်စွာ အကူအညီ ပေးမိခဲ့သော လုပ်ရပ်မျိုးကို အမေရိကန်များနှင့် ပြင်သစ်များက ဗြိတိသျှ လက်အောက်ခံကိုလိုနီ ပြည်သူများအတွက် နောက်တစ်ကြိမ် ထပ်မံ မလုပ်ဆောင်မစေရန်လည်း၊ စနစ်တကျ အကွက်ဆင် ဗျူဟာခင်းထားခဲ့သည်။

ပြင်သစ် ကိုယ်တိုင်က ဂျာမနီ နှင့် ကုန်းမြေနယ်စပ်ခြင်း ထိစပ်နေပြီး သမိုင်းတစ်လျှောက် ဂျာမန်တပ်များ၏ စစ်ရေးထိုးစစ်များကို အကြိမ်ကြိမ်ခံစားခဲ့ရသော နိုင်ငံဖြစ်နေသည်။

အမေရိကန်ပြည်ထောင်စု ကိုယ်တိုင်ကလည်း အမေရိကန် လွတ်လပ်ရေး စစ်ပွဲ အတွင်း ဗြိတိသျှ လက်အောက်မှ လွတ်မြောက်ရန် ပြင်သစ်၏ စစ်ရေးအကူအညီများကို ရယူထားခဲ့ရသော ပြင်သစ်၏သမိုင်း ဝင် မဟာမိတ် နိုင်ငံတစ်ခု ဖြစ်နေ သည်။

ယင်းကဲ့သို့သော ၀ါဒဖြန့်ချိရေး မဟာဗျူဟာ အခင်းအကျင်းအောက်တွင် ပုဂ္ဂလိက စာနယ်ဇင်း ပိုင်ရှင်များနှင့် ပုဂ္ဂလိက စာအုပ်တိုက်ပိုင် ရှင်များအဖြစ် အသွင်ယူထားကြသော အင်္ဂလိပ်အစိုးရ၏ လျှို့ဝှက် အေးဂျင့်များက ဆိုဗီယက် ပြည်ထောင်စုကို ဆင်းရဲမွဲတေနေသော၊ ခေတ်နောက်ကျနေသော၊ ပေါင်မုန့် ရဖို့ လူတန်းရှည်ကြီးများဖြင့် တန်းစီနေရသော တိုင်းပြည်၊ ဥရောပ တိုက်အတွင်း အဆင်းရဲဆုံးနှင့် ခေတ်အနောက်ကျဆုံး စိတ်ပျက်ဖွယ်ရာ နိုင်ငံကြီးတစ်ခုအဖြစ် ပုံဖျက် ၀ါဒဖြန့်ချိပေးထားရသည်။

ဆိုဗီယက်ပြည်ထောင်စုကို ရစရာ မရှိအောင် နှိမ်ချိုး၊ ကဲ့ရဲ့ ရေးသားထားသော စာအုပ်စာတမ်းပေါင်းစုံကို “ဖေဘီယန် ဆိုရှယ်လစ် များ” (Fabian Socialists) အဖြစ် အသွင်ယူထားကြသော စာရေးဆရာများနှင့် စာအုပ်တိုက်များ၏ စာအုပ်စာတမ်းများကို လက်အောက်ခံ ကိုလိုနီနယ်မြေများအတွင်း အလုံးအရင်း၊ အမြောက်အမြားဖြင့် စျေးနှုန်းသက်သာစွာ ဖြန့်ချိတင်သွင်း ပေးခဲ့ကြသည်။

ထိုဖေဘီယန် ဆိုရှယ်လစ်အမည်ခံ ဆိုဗီယက် အထင်သေးရေး ပုံသွင်းဝါဒဖြန့်စာအုပ်များကို မြန်မာပြည်အတွင်း (၁) ဗမာပြည် ဆိုရှယ်လစ်ပါတီ ခေါင်းဆောင် ဖြစ်လာမည့် ဦးကျော်ငြိမ်းနှင့် သူ၏ ပါတီဝင်များ ဖြစ်လာမည့် ပညာတတ်များ၊ (၂) ဆင်းရဲသားပါတီခေါင်းဆောင် ဒေါက်တာဘမော်နှင့် သူ့ပါတီဝင် ပညာတတ်များ၊ (၃) လယ်သမားမျိုး ချစ်ပါတီဖြစ်သော ဂဠုန်ပါတီ ခေါင်းဆောင် ဂဠုန်ဦးစောနှင့် သူ၏အပေါင်းပါ ပညာတတ်များ အစရှိသူ များကိုယ်တိုင်ကပင်” စစ်မှန်သော အလယ်အလတ်ဝါဒီ ဆိုရှယ်လစ်များ” (Genuine Moderate Socia -lists) နှင့်” အလယ်အလတ် လက်ဝဲဝါဒီများ” (Moderate Leftists) ၏ စာပေအစစ်များအဖြစ် ထင်မြင်ယူဆ ယုံကြည်ခဲ့ကြပြီး နှစ်သက်စိတ်ဝင်စားစွာ ဖတ်ရှုလေ့လာခဲ့ကြသည်။

အခြားတစ်ဖက်တွင်မူ ဗြိတိသျှ အုပ်စိုးသူလူတန်းစား၏ လျှို့ဝှက် အေးဂျင့်များက ထိန်းချုပ်ထားသော စာနယ်ဇင်းများနှင့် ကြေးနန်းသတင်းဌာနများမှတစ်ဆင့် နာဇီဂျာမနီ၊ ဖက်ဆစ် အီတလီ၊ ဖက်ဆစ်ဂျပန်၊ ဖက်ဆစ်စပိန် နှင့် တူရကီ စစ်အာဏာရှင်အစိုးရများ၏ အင်အား ကြီးထွားလာမှုများ၊ ဖွံ့ဖြိုးတိုးတက်လာမှုများ၊ စစ်ရေးအောင်မြင်မှုများ၊ စက်မှုလုပ်ငန်း အောင်မြင်မှုများ၊ စစ်အင်အား တိုးချဲ့မှုများနှင့် ပိုင်နက်နယ်မြေတိုးချဲ့မှု လတ်တလော သတင်းများကို လက်အောက်ခံ ကိုလိုနီပြည်သူများအတွက် စိတ်လှုပ်ရှားဖွယ်ရာ၊ အထင်ကြီးဖွယ်ရာ ဖြစ်အောင် စနစ်တကျ အကွက်ဆင် ရေးသားဖော်ပြပေးကြသည်။

ယင်းကဲ့သို့ နာဇီ ဖက်ဆစ် ဝင်ရိုးတန်းနှင့် ဆက်စပ်နိုင်ငံများ၏ ဖွံ့ဖြိုးမှုများနှင့် အားသာချက်များကို သတင်းဖြန့်ချိပေးနေသည့်အတွက် ဗြိတိသျှစာနယ်ဇင်းများ၊ ကြေးနန်း သတင်း‌ဌာနများနှင့် စာအုပ်တိုက် များသည် ဗြိတိသျှ၏ ရန်သူများပင် ဖြစ်လင့်ကစား၊ မိမိရန်သူ၏ အကြောင်းကို မှန်ကန်စွာ၊ ဂုဏ်သိက္ခာ ရှိစွာ သတင်းဖြန့်ချိပေးနေသည်ဟု လက်အောက်ခံ ကိုလိုနီများမှ လူ‌ညံ့များ၏ အသားလွတ်အထင်ကြီးမှု၊ ရိုသေမှုနှင့် ကြည်ညိုမှုများကိုပင် ဗြိတိသျှတို့က အဆစ်ထပ်မံရယူ လိုက်ကြသေးသည်။

တစ်ချိန်တည်းမှာပင် ဗဟိုအာရှဒေသ၊ ကက်စပီယန်ပင်လယ်နှင့် ပင်လယ်နက်ကမ်းခြေဒေသများအတွင်း ဆိုဗီယက်ပြည်ထောင်စုက ပိုင်နက် နယ်မြေတိုးချဲ့လာခြင်းများ၊ ဆိုဗီယက်၏ စစ်ရေး အောင်မြင်မှုများနှင့် စက်မှုလုပ်ငန်း အောင်မြင်မှုများ၊ ဆိုဗီယက် စစ်အင်အားနှင့် စစ်ရေးစက်မှုလုပ်ငန်း အင်အားကြီး ထွားလာခြင်း သတင်းများ၊  နိုင်ငံတကာ စစ်လက်နက်ပြပွဲများအတွင်း သို့ လာရောက်ပြသပေးသော ဆိုဗီယက်ထုတ် စစ်လက်နက်များနှင့် စစ်လေယာဉ်များအကြောင်း သတင်းများကို ဗြိတိသျှတို့က ကိုလိုနီ နယ်မြေများတွင် လုံးဝ သတင်းမှောင်ချ၊ သတင်း ပိတ်ဆို့ထားခဲ့သည်။

ဆိုဗီယက်ပြည်ထောင်စုကို လတ်တလော ခေါင်းဆောင်နေ‌သော “စတာလင်၏ လက်ရွေးစင်ကျမ်းများ” (Stalin’s Selected Works) နှင့်  တတိယအင်တာနေရှင်နယ် နိုင်ငံတကာ ကွန်မြူနစ် အဖွဲ့ချုပ်က နောက်ဆုံး ဖြန့်ချိလိုက်သော စာအုပ်စာတမ်းအမျိုးမျိုးကို ကိုလိုနီနိုင်ငံများအတွင်း တမင် မဖြန့်ချိပေးဘဲ စနစ်တကျ ချန်လှပ်ထားလိုက်သည်။

ကွယ်လွန်သွားပြီဖြစ်သော ကွန်မြူနစ် ခေါင်းဆောင်များ ဖြစ်သည့် ကားလ်မာ့က္ခစ်၊ ဖရက်ဒရစ် အိန်ဂျယ်လ် နှင့် လီနင်တို့၏ စာအုပ် အဟောင်းများ၊ ၁၉ ရာစု အတွင်း စတင်ဖွဲ့စည်းခဲ့ပြီး ခေတ်နှင့် မဆီလျော်တော့သော၊ ခေတ်ပြိုင် လိုအပ်ချက်များအတွက် မလုံလောက်တော့သော၊ ပထမ အင်တာနေရှင်နယ် အဖွဲ့ချုပ်ဟောင်းနှင့် ဒုတိယ အင်တာနေရှင်နယ် အဖွဲ့ချုပ်ဟောင်း နှစ်ခုမှ စာအုပ်စာတမ်းအဟောင်းများကိုသာ ရည်ရွယ်ချက်ဖြင့် ဗြိတိသျှအေးဂျင့်များက လက်အောက်ခံ ကိုလိုနီနိုင်ငံများ အတွင်း စနစ်တကျ ဖြန့်ချိ၊ တင်သွင်း၊ ရောင်းချပေးခဲ့ကြသည်။

ထို့ကဲ့သို့ မဟာဗျူဟာမြောက် လှည့်ဖြား ပုံသွင်း ၀ါဒဖြန့်ချိမှုများအောက်တွင် မြန်မာ၊ အိန္ဒိယ၊ အီဂျစ်နှင့် တောင်အာဖရိက ဒတ်ခ်ျဘိုးဝါးများအပါအဝင် ဗြိတိသျှလက် အောက်ခံ ကိုလိုနီပြည်သူများ၏ ကြီးမားလှသော လူဦးရေအတွင်း နာဇီဖက်ဆစ်ဝင်ရိုးတန်းအပေါ် ဖြစ်ပေါ်လာတော့မည့် ဒုတိယကမ္ဘာစစ်အတွက် ကမ္ဘာကြီးကို ကယ်တင်ပေးမည့် အင်အားစုအဖြစ် မှားယွင်းစွာ အထင်ကြီးအားကိုးနေမိသည့် အဖြစ်သို့ အကြီးအကျယ် လွဲချော်စွာ ရောက်ရှိသွားခဲ့ကြသည်။