ဂျူဗင်တပ်စ်အသင်းနည်းပြ ပီယာလိုက အာဂျင်တီးနားတိုက်စစ်ကစားသမား ဒီဘားလားမှာ အသင်းအတွက် အလွန်အရေးပါသည့်ကစားသမားဖြစ်သည်ဟု ပြောကြားခဲ့သည်။
အသက် (၂၆)နှစ်အရွယ်ရှိ ဒီဘားလားသည် ၂၀၁၉-၂၀ ရာသီ စီးရီးအေပြိုင်ပွဲ၌ ဂျူဗင်တပ်စ်အသင်းအတွက် (၃၃)ပွဲတွင် (၁၁)ဂိုး သွင်းယူပေးခဲ့ပြီး ပြိုင်ပွဲ၏အကောင်းဆုံးကစားသမားဆုကို ရရှိခဲ့သူဖြစ်သည်။
သို့သော် ဂျူဗင်တပ်စ်အသင်းအနေဖြင့် ဒီဘားလားကို ယခုနွေရာသီအပြောင်းအရွှေ့ကာလတွင် ရောင်းချဖွယ်ရှိနေသည်ဟု သတင်းများထွက်ပေါ်ခဲ့ပြီး ၎င်းကို ခေါ်ယူရန် ရီးယဲလ်နှင့် မန်ယူအသင်းတို့က စိတ်ဝင်စားနေသည်ဟု သတင်းများထွက်ပေါ်ခဲ့သည်။
ဂျူဗင်တပ်စ်နည်းပြ ပီယာလိုကမူ ယင်းသတင်းများမှာ ကောလာဟလများသာဖြစ်ကြောင်းနှင့် ဒီဘားလားမှာ အသင်းအတွက် အလွန်အရေးပါသူဖြစ်ကြောင်း ပြောကြားခဲ့သည်။
ပီယာလိုက "ဒီဘားလားကို ဘယ်တုန်းကမှ ကျွန်တော်တို့ အရောင်းစာရင်း မတင်ခဲ့ပါဘူး။ မီဒီယာတွေက ဒီလိုသတင်းအမှားတွေကို ဖန်တီးခဲ့ကြတာပါ။ ကျွန်တော့်အတွက် ဒီဘားလားက အခြားကစားသမားတွေလိုပဲ အသင်းအတွက် အလွန်အရေးပါတဲ့သူပါ။ သူဟာ အသင်းရဲ့ အနာဂတ်အစီအစဉ်မှာ ပါဝင်သူဖြစ်ပါတယ်"ဟု ပြောကြားခဲ့သည်။
ဂျူဗင်တပ်စ်အသင်းနှင့် ချုပ်ဆိုထားသည့် ဒီဘားလား၏ လက်ရှိစာချုပ်မှာ ၂၀၂၂ ခုနှစ်၊ ဇွန်လ (၃၀)ရက်တွင် သက်တမ်းကုန်ဆုံးမည်ဖြစ်ပြီး ဂျူဗင်တပ်စ်အသင်းသည် ၎င်းကို စာချုပ်သစ်ချုပ်ဆိုရန် စီစဉ်နေကြောင်းလည်း သိရသည်။
