မြန်မာနိုင်ငံ၏ စီးပွားရေးသည် မကြာသေးမီကမှ အမှန်တကယ် ပိုမိုပွင့်လင်းလာခြင်းဖြစ်ပြီး မြန်မာနိုင်ငံရင်းနှီးမြှုပ်နှံမှု ဥပဒေအသစ်နှင့်အတူ ပိုမိုခိုင်မာသော စီးပွားရေးလုပ်ငန်းများအတွက် လုပ်သာကိုင်သာရှိလာအောင် အဆက်မပြတ် ဆောင်ရွက်နေကြောင်း မတ် ၂၉ ရက်မှ ၃၁ ရက်အထိ ဗီယက်နမ်နိုင်ငံ ဟနွိုင်းမြို့၌ပြုလုပ်သည့် ဆဋ္ဌမအကြိမ်မြောက် Greater Mekong Subregion (GMS) ထိပ်သီးအစည်းအဝေးတွင် ဒုတိယသမ္မတ ဦးဟင်နရီဗန်ထီးယူက ပြောကြားခဲ့ကြောင်း ပြန်ကြားရေးဝန်ကြီးဌာနမှ သိရသည်။
မြန်မာနိုင်ငံ၏စီးပွားရေးသည် မကြာသေးမီကမှ အမှန်တကယ် ပိုမိုပွင့်လင်းလာပါကြောင်း၊ မြန်မာရင်းနှီးမြှုပ်နှံမှု ဥပဒေသစ်ကို ပြဋ္ဌာန်းနိုင်ခြင်းနှင့်အတူ ပိုမိုခိုင်မာပြီး စီးပွားရေးလုပ်ငန်းများအတွက် လုပ်သာကိုင်သာရှိသည့် ဝန်းကျင်တစ်ရပ်ဖြစ်အောင်လည်း ပြုပြင်ပြောင်းလဲမှုများကို အဆက်မပြတ် လုပ်ဆောင်နေပါကြောင်း၊ ပြည်တွင်းထောက်ပံ့မှု ကွင်းဆက်ကို ဒေသတွင်းတန်ဖိုးကွင်းဆက်နှင့် ကမ္ဘာ့တန်ဖိုးကွင်းဆက်ထဲသို့ ဝင်ရောက်နိုင်အောင် ပိုမိုချိတ်ဆက် ဆောင်ရွက်နိုင်လာသည်ကို မြင်တွေ့ရမည်ဖြစ်ပါကြောင်း ဒုတိယသမ္မတ ဦးဟင်နရီဗန်ထီးယူက ပြောကြားသည်။
အစည်းအဝေးသို့ တက်ရောက်လာသော နိုင်ငံ့ခေါင်းဆောင်များ ဆွေးနွေးသည့် Panel Session တွင် Moderator က “GMS နိုင်ငံများအနေနှင့် သက်ဆိုင်ရာနိုင်ငံအလိုက် စီမံကိန်းများ၊ မဟာဗျူဟာများ၊ လုပ်ငန်းဆောင်ရွက်ချက် ရေးဆွဲအကောင်အထည်ဖော်ရာတွင် စီးပွားရေးဖွံ့ဖြိုးတိုးတက်မှု၏ မောင်းနှင်အားများကို မည်သို့အကောင်းဆုံးပေါင်းစည်း ဆောင်ရွက်နိုင်မည်၊ မြန်မာနိုင်ငံအနေဖြင့် မည်သို့ဆောင်ရွက်နေသည်ကို သိရှိလိုကြောင်း” မေးမြန်းချက်နှင့်စပ်လျဉ်း၍ ဒုတိယသမ္မတက ပြန်လည်ရှင်းလင်းဖြေကြားခဲ့ခြင်း ဖြစ်ကြောင်း သိရသည်။
ဂျီအမ်အက်စ်နိုင်ငံများ အောင်မြင်ရန် မိမိတို့၏ သက်ဆိုင်ရာနိုင်ငံအဆင့် စီမံကိန်းနှင့် မဟာဗျူဟာများသည် ကမ္ဘာ့အဆင့်နှင့် ဒေသတွင်းအဆင့် ကတိကဝတ်များဖြင့် ကြိုးပမ်းဆောင်ရွက်မှုများကို ပံ့ပိုးပေးနိုင်ရန် အဓိကလိုအပ်ပါကြောင်းကိုလည်း ဒုတိယသမ္မတက ပြန်လည်ဖြေကြားခဲ့သည်။
ဘဏ္ဍာနှစ် ကြားကာလဖြစ်သည့် လာမည့်ခြောက်လအတွင်း မြန်မာနိုင်ငံ၏ ကုန်ထုတ်လုပ်မှုလုပ်ငန်း၊ အိမ်ခြံမြေလုပ်ငန်းနှင့် ဝန်ဆောင်မှုလုပ်ငန်းများ၌ နိုင်ငံခြားရင်းနှီးမြှုပ်နှံမှုများ အဓိကဝင်ရောက်လာမည်ဖြစ်ကြောင်း မြန်မာနိုင်ငံ ရင်းနှီးမြှုပ်နှံမှုကော်မရှင် (MIC) အတွင်းရေးမှူး ဦးအောင်နိုင်ဦးက ပြောကြားသည်။
“လက်ရှိ အများဆုံးဝင်တာက ကုန်ထုတ်လုပ်မှုလုပ်ငန်း၊ အိမ်ခြံမြေလုပ်ငန်းနဲ့ ဝန်ဆောင်မှုလုပ်ငန်းတွေက ဒီခြောက်လအတွင်းမှာ ဒီကဏ္ဍသုံးခုက အဓိကဝင်ရောက်မယ်” ဟု ဦးအောင်နိုင်ဦးက သုံးသပ်ပြောကြားခဲ့သည်။
မြန်မာနိုင်ငံသည် ၁၉၉၂ ခုနှစ်ကတည်းက ဂျီအမ်အက်စ်စီးပွားရေး ပူးပေါင်းဆောင်ရွက်မှုအစီအစဉ်တွင် ပါဝင်ဆောင်ရွက်ခဲ့သော်လည်း ဒေသတွင်းရင်းနှီးမြှုပ်နှံမှု မူဘောင် ၂၀၂၂ ကဲ့သို့အရေးကြီးသည့် ဆောင်ရွက်မှုများကို မိမိတို့နိုင်ငံ၏ ကာလရှည်ဖွံ့ဖြိုးမှုစီမံကိန်းများ၊ ဆောင်ရွက်ချက်များတွင် အပြည့်အ၀ ပေါင်းစည်းဆောင်ရွက်ရန် မကြာသေးမီကမှ စတင်နိုင်ခဲ့ပါကြောင်း ထည့်သွင်းပြောကြားခဲ့သည်။
