ရခိုင်အရေးကိစ္စနှင့်ပတ်သက်၍ ဗြိတိန်လွှတ်တော်အမတ်များ၏ လှုပ်ရှားဆောင်ရွက်မှုနှင့် ဥရောပသမဂ္ဂ နိုင်ငံခြားရေးရာကောင်စီအစည်းအဝေး၌ ဆုံးဖြတ်ခဲ့သည့် မြန်မာနိုင်ငံအပေါ် ဆုံးဖြတ်ချက်နှင့်ပတ်သက်၍ တပ်မတော်က မတ် ၆ ရက် ညပိုင်းတွင် ၎င်းတို့၏ Facebook လူမှုကွန်ရက်စာမျက်နှာမှတစ်ဆင့် သတင်းထုတ်ပြန်ခဲ့သည်။
အဆိုပါသတင်းထုတ်ပြန်ချက်တွင် အချက် ၁၇ ချက်ပါဝင်ပြီး ပြီးခဲ့သည့်ဖေဖော်ဝါရီ ၂၆ ရက်ကပြုလုပ်သည့် ဥရောပသမဂ္ဂ (အီးယူ) အဖွဲ့ဝင် နိုင်ငံခြားရေးဝန်ကြီးများပါဝင်သော ဥရောပသမဂ္ဂနိုင်ငံခြားရေးရာ ကောင်စီအစည်းအဝေးက မြန်မာနိုင်ငံအပေါ်ဆုံးဖြတ်ချက် (Conclusion) အနေဖြင့် ဘင်္ဂါလီဒုက္ခသည်များအား ဆက်လက်အကူအညီပေးရေး၊ မီဒီယာများ၊ ကုလသမဂ္ဂ လူ့အခွင့်အရေးကောင်စီ၏ Fact-Finding Mission အား လွတ်လပ်ခွင့်ပေးရေးနှင့် ပူးပေါင်းဆောင်ရွက်ရေး၊ လူ့အခွင့်အရေး အခြေအနေဆိုင်ရာ အစီရင်ခံစာတင်သွင်းသူနှင့် ဆက်လက်ပူးပေါင်းဆောင်ရွက်ရေး၊ အပြည်ပြည်ဆိုင်ရာ ရာဇဝတ်ခုံရုံး (ICC) ၏အခွင့်အာဏာဖြင့် ဆုံးဖြတ်ဆောင်ရွက်မှုကို လက်ခံနိုင်ရေး၊ မြန်မာနိုင်ငံနှင့် ကာကွယ်ရေး ပူးပေါင်းဆောင်ရွက်မှုကို အနိမ့်ဆုံးသို့လျှော့ချသွားရန်နှင့် လူ့အခွင့်အရေးချိုးဖောက်မှုများတွင် တာဝန်ရှိသော မြန်မာ့တပ်မတော်မှ အဆင့်မြင့်အရာရှိကြီးများအား ဦးတည်၍ ကန့်သတ်ပိတ်ဆို့မှုများပြုလုပ်ရန် အဆိုပြုလွှာ အမြန်ဆုံးတင်သွင်းရေး ဆုံးဖြတ်ခဲ့ကြောင်း၊ ယင်းဆုံးဖြတ်ချက်မျိုး ထွက်လာစေရန်အတွက် ၂၀၁၈ ခုနှစ်၊ ဖေဖော်ဝါရီ ၂၁ ရက်နေ့စွဲဖြင့် ဗြိတိန် အောက်လွှတ်တော်အမတ် Rushanara Ali ဦးဆောင်၍ အောက်လွှတ်တော်အမတ် ၁၀၂ ဦးတို့က မြန်မာ့တပ်မတော်ခေါင်းဆောင်များအား ရခိုင်ပြည်နယ်၊ ဘင်္ဂါလီပဋိပက္ခဖြစ်စဉ်နှင့် ပတ်သက်၍ ထပ်မံဖိအားပေး၊ နိုင်ငံတကာရာဇဝတ်မှုခုံရုံး (ICC) သို့လွှဲပြောင်းပေးရန် တိုက်တွန်းကြောင်း စာတစ်စောင်အား ဗြိတိန်နိုင်ငံခြားရေးဝန်ကြီး Boris Johnson ထံသို့ပေးပို့ခဲ့ပြီး ဖေဖော်ဝါရီ ၂၆ ရက်တွင်ပြုလုပ်မည့် ဥရောပသမဂ္ဂ နိုင်ငံခြားရေးကောင်စီ အစည်းအဝေး၌ ထည့်သွင်းဆွေးနွေးရန် တောင်းဆိုခဲ့ကြောင်း သတင်းထုတ်ပြန်ချက်တွင် ဖော်ပြသည်။
ထိုသို့ ဗြိတိန်အောက်လွှတ်တော်အမတ်များက ပေးပို့ခဲ့သောစာတွင် မြန်မာစစ်ဘက်မှ ထိုးစစ်ဆင်မှုများကြောင့် ဘင်္ဂါလီဒုက္ခသည်များ (မူရင်းတွင်ရိုဟင်ဂျာဟုဖော်ပြ) ဖိနှိပ်ခံနေရမှုများ၊ ဘင်္ဂလားဒေ့ရှ်နိုင်ငံဘက်သို့ ထွက်ပြေးရမှုများ၊ သတ်ဖြတ်ခံရမှုများ၊ စစ်ဘက်နှင့်လုံခြုံရေးတပ်ဖွဲ့များ၊ စစ်ဘက်က ထောက်ကူပေးသော လူအုပ်များနှင့် ပြည်သူ့စစ်များက ဘင်္ဂါလီများ (မူရင်းတွင်ရိုဟင်ဂျာဟုဖော်ပြ) အမျိုးသမီး ထောင်ပေါင်းများစွာအား အဓမ္မပြုကျင့်ခံရမှုများရှိသော်လည်း တပ်မတော်ကို ထိန်းချုပ်နိုင်ခြင်းမရှိသောကြောင့် မြန်မာအစိုးရသည် ဘင်္ဂါလီဒုက္ခသည်များ (မူရင်းတွင်ရိုဟင်ဂျာဟုဖော်ပြ) ဘေးကင်းစွာ ပြန်လာရေးအတွက် အာမခံချက်ပေးရန် နည်းလမ်းမရှိနိုင်ကြောင်း၊ အစိုးရသက်တမ်း နှစ်နှစ်နီးပါး ကြာမြင့်ပြီဖြစ်သော်လည်း ကော်မတီများစွာ ဖွဲ့စည်းနေခြင်းမှတစ်ပါး မြန်မာနိုင်ငံရှိ ရိုဟင်ဂျာများ၏ အရပ်ဘက်လူ့အခွင့်အရေးနှင့် လူသားချင်းစာနာထောက်ထားမှု တိုးတက်အောင် လက်တွေ့ဆောင်ရွက်ပေးနိုင်ခြင်းမရှိဟုလည်း စွပ်စွဲထားသည့်အပြင် တပ်မတော်ကာကွယ်ရေးဦးစီးချုပ်အနေဖြင့် နိုင်ငံအတွင်း တိုင်းရင်းသားအုပ်စုများနှင့် ပဋိပက္ခကို ကြီးထွားအောင်သာ စိတ်လိုက်မာန်ပါ ဆောင်ရွက်နေပြီး ငြိမ်းချမ်းရေးလုပ်ငန်းစဉ်ကို ခြိမ်းခြောက်နှောင့်ယှက်နေကြောင်း၊ ယင်းပဋိပက္ခများတွင် အရပ်သားများ သေကျေဒဏ်ရာရစေအောင် နှစ်များစွာအတွင်း ပထမဆုံးအကြိမ်အဖြစ် ဂျက်တိုက်လေယာဉ်များ အသုံးပြုမှုကို တိုးမြှင့်လုပ်ဆောင်နေကြောင်း၊ ဒီမိုကရေစီနည်းကျ ရွေးကောက်တင်မြှောက်ထားသော အစိုးရ၏ ပြုပြင်ပြောင်းလဲရေး အဆိုပြုချက်များကို စစ်ဘက်က ခန့်အပ်သောဝန်ကြီးဌာနများက ဆိုးရွားစွာနှောင့်ယှက်ဖျက်ဆီးနေကြောင်းဟုလည်း ရေးသားစွပ်စွဲချက်များပါကြောင်း တပ်မတော်၏ သတင်းထုတ်ပြန်မှုတွင်ပါရှိသည်။
ထိုသို့ ဗြိတိန်အောက်လွှတ်တော်အမတ်များက ပေးပို့ခဲ့သောစာနှင့်ပတ်သက်ပြီး ရိုဟင်ဂျာ (Rohingya) ဆိုသော မြန်မာပြည်သူလူထုအားလုံးက လက်မခံသည့်အသုံးအနှုန်းအား တောက်လျှောက်သုံးနှုန်းထားကြောင်း၊ ယင်းကဲ့သို့ စွပ်စွဲချက်များသည် ရခိုင်ပဋိပက္ခ စတင်ချိန်ကပင် အစဉ်တစ်စိုက် စွပ်စွဲလာသည့် စွပ်စွဲချက်များဖြစ်ကြောင်း စွပ်စွဲချက်တစ်ခုချင်းအလိုက် မဟုတ်မမှန်ကြောင်းကို နိုင်ငံတော်အစိုးရ၏ ရခိုင်ပဋိပက္ခနှင့်သက်ဆိုင်သော သတင်းစာရှင်းလင်းပွဲ၊ ထုတ်ပြန်ချက်တို့၌ ဖော်ပြထားပြီးဖြစ်သည့်အပြင် ရခိုင်ပဋိပက္ခနှင့်ပတ်သက်၍ ဖြစ်စဉ်မှန်များအား တပ်မတော် သတင်းမှန်ပြန်ကြားရေးအဖွဲ့က ၁၀ ကြိမ်ထုတ်ပြန်ခဲ့ကြောင်း အဆိုပါသတင်းနှင့်ပတ်သက်ပြီး တပ်မတော်၏ မတ် ၆ ရက် ညပိုင်းသတင်းထုတ်ပြန်မှု အမှတ်စဉ် ၅ တွင်ပါရှိသည်။
ထို့အပြင် ဗြိတိန်အောက်လွှတ်တော်အမတ်များ ပေးပို့ခဲ့သော စာနှင့်ပတ်သက်ပြီး တပ်မတော်က ၎င်းတို့၏ထုတ်ပြန်ချက် အမှတ်စဉ် ၆ မှ အမှတ်စဉ် ၁၇ အထိ အချက်အလက်များဖြင့် ဖြေရှင်းထားသည်ကို တွေ့ရသည်။
