ပြည်တွင်းစစ်ချုပ်ငြိမ်းရေးနှင့် ဒီမိုကရေစီ အရေးတို့မှာ တိုင်းရင်းသားများ လိုလားသော အမျိုးသားတန်းတူရေးနှင့် ကိုယ်ပိုင်ပြဋ္ဌာန်းခွင့်တို့ အပြည့်အဝရှိသည့် ဖက်ဒရယ်ဒီမိုကရေစီပြည်ထောင်စု တည်ဆောက်ရေးနှင့် ထပ်တူကျနေသည်ဖြစ်ရာ တိုင်းပြည်ဖွဲ့စည်းပုံအခြေခံဥပဒေ ပြုပြင်ပြောင်းလဲရေးကို အင်အားစုအားလုံး၏ ဘုံလုပ်ငန်းစဉ်အဖြစ် အမြန်ဆုံး အကောင်အထည်ဖော်နိုင်ရန် ဦးစားပေးဆောင်ရွက်ကြရန် လိုအပ်ကြောင်း ညီညွတ်သော တိုင်းရင်းသားလူမျိုးများ ဖက်ဒရယ်ကောင်စီ UNFC က သြဂုတ် ၈ ရက်တွင် တိုက်တွန်းခဲ့သည်။

တိုင်းပြည်၏ အခြေခံဥပဒေဆိုင်ရာ ပြဿနာကြောင့် ပြည်တွင်းစစ်မှာလည်း လွတ်လပ်ရေး ရပြီးကတည်းက ယနေ့ထိတိုင် ဆက်လက်ဖြစ်ပွားနေဆဲ ရှိပါကြောင်း၊ ပြည်တွင်းစစ်၏ အနိဋ္ဌာရုံနှင့် ဆိုးကျိုးသံသရာတို့ကြောင့် တိုင်းပြည်နှင့်လူထုမှာ ဆင်းရဲတွင်းနက်နေပြီး ကမ္ဘာ့အလယ်တွင် အောက်ကျနောက်ကျ ဘဝသို့ ရောက်ရှိနေရပါကြောင်း၊ ၁၉၈၈ လူထုအရေးတော်ပုံမှ ပေါ်ပေါက်လာခဲ့သော လူထုခေါင်းဆောင်နှင့် အမျိုးသားဒီမိုကရေစီ အဖွဲ့ချုပ် ပါတီတို့သည်လည်း ယနေ့တွင် တိုင်းပြည်၏ အစိုးရနေရာတွင် ရောက်ရှိ နေရာယူထားနိုင်သော်လည်း ၂၀၀၈ ဖွဲ့စည်းပုံ အခြေခံဥပဒေအောက်တွင် ပြည်သူလူထု လိုလားသည့် ဒီမိုကရေစီစနစ် ရုပ်လုံးဖော်နိုင်ခြင်း မရှိသေးကြောင်း သဝဏ်လွှာတွင် ဖော်ပြထားသည်။

ထို့ပြင် ရှစ်လေးလုံးအရေးတော်ပုံသည် လူမျိုးဘာသာ၊ အသားရောင်၊ မခွဲခြားဘဲ လူတန်းစားပေါင်းစုံ ပါဝင်သော လူထုညီညွတ်မှုအားကို အမြင့်မားဆုံး ပြသနိုင်ခဲ့သည့် သမိုင်းဝင် လူထုလှုပ်ရှားမှုကြီးဖြစ်ကြောင်း၊ ထိုလှုပ်ရှားမှုဖြင့် ၈၈ မျိုးဆက်ဟူ၍ ပေါ်ပေါက်လာခဲ့ပြီး ရှစ်လေးလုံးစိတ်ဓာတ်မှာလည်း မြန်မာ့ဒီမိုကရေစီ တိုက်ပွဲနှင့်အတူ ယနေ့ထိတိုင် ခိုင်မာရှင်သန်နေဆဲဖြစ်ကြောင်း၊ ထို့အတွက် ရှစ်လေးလုံး စိတ်ဓာတ်ဖြင့် မပြီးပြတ်သေးသော ဖက်ဒရယ်ဒီမိုကရေစီပြည်ထောင်စု တည်ဆောက်ရေးသို့ မဆုတ်မနစ်သော ဇွဲလုံ့လတို့ဖြင့် ဆက်လက်ချီတက် တိုက်ပွဲဝင်ကြရန် သဝဏ်လွှာတွင် တိုက်တွန်းထားသည်။

ထို့အတူ ရှမ်းပြည်ပြန်လည်ထူထောင်ရေးကောင်စီ (RCSS/SSA) ကလည်း ဒီမိုကရေစီ အရေးအတွက် တောင်းဆိုတိုက်ပွဲဝင်လာခဲ့သည့် ရဟန်းရှင်လူ ပြည်သူလူထု၊ ကျောင်းသူကျောင်းသားများ၏ တိုက်ပွဲဝင် တောင်းဆိုလာမှုအပေါ် အလေးအနက် ဂုဏ်ယူလေးစားမိကြောင်း၊ ပြည်သူလူထုများအားလုံး လိုလားတောင့်တသည့် တရားမျှတမှု၊ တန်းတူညီမျှမှု ကိုယ်ပိုင်ပြဋ္ဌာန်းခွင့်များအား အခြေခံသော ဖက်ဒရယ်ဒီမိုကရေစီ ပြည်ထောင်စု အမြန်ဆုံး ဖော်ဆောင်နိုင်ပါစေကြောင်း (၂၉) နှစ်မြောက် ရှစ်လေးလုံး လူထုအရေးတော်ပုံနေ့ အခမ်းအနားသို့ သဝဏ်လွှာပေးပို့ ဆုတောင်းခဲ့သည်။

ဆက်လက်၍ သွေးစည်းညီညွတ်ရေး၊ ချစ်ကြည်ရေး၊ ငြိမ်းချမ်းရေး တရားများကို အခြေခံ၍ တရားမျှတမှုနှင့် ကိုယ်ပိုင်ပြဋ္ဌာန်းခွင့် ကိုယ့်ကြမ္မာကိုယ်ဖန်တီးခွင့် ဖက်ဒရယ်ဒီမိုကရေစီပြည်ထောင်စု တည်ထောင်နိုင်ရေးတည်းဟူသော ပြည်ထောင်စုဝင် လူမျိုးစု ပြည်သူလူထုများ အားလုံး၏ အခွင့်အရေးများကို မိမိတို့ ရှမ်းပြည်ပြန်လည်ထူထောင်ရေးကောင်စီ (RCSS/SSA) အနေနှင့် အဘက်ဘက်နှင့် လက်တွဲကာ ဦးတည်ကြိုးပမ်း ဆောင်ရွက်လျက်ရှိကြောင်း ဖော်ပြထားသည်။