နျူကလီးယားလက်နက် တားဆီးပိတ်ပင်ရေးစာချုပ် (Treaty on the Prohibition of Nuclear Weapons – TPNW) သို့  မြန်မာနိုင်ငံမှ ပါဝင်လက်မှတ်ရေးထိုးရေးကိစ္စအတွက် ပြည်ထောင်စုလွှတ်တော်က သဘောတူကြောင်း အတည်ပြုခဲ့သည်။

နိုင်ငံတော်သမ္မတထံမှ ပေးပို့သော နျူကလီးယားလက်နက် တားဆီးပိတ်ပင်ရေး စာချုပ်သို့ မြန်မာနိုင်ငံမှ ပါဝင်လက်မှတ်ရေး ထိုးရေးကိစ္စအတွက် နေပြည်တော်၌ စက်တင် ဘာ ၁၄ ရက်ကပြုလုပ်သော ဒုတိယအကြိမ် ပြည်ထောင်စု လွှတ်တော်အစည်းအဝေးတွင် လွှတ်တော်ကိုယ်စားလှယ် ၁၀ ဦးက ဆွေးနွေးပြီး အပြည်ပြည်ဆိုင်ရာ ပူးပေါင်းဆောင်ရွက်ရေး ဝန်ကြီးဌာနက  ပြန်လည်ရှင်းလင်းပြောကြားကာ လွှတ်တော်အဆုံးအဖြတ်ဖြင့် အတည်ပြုခဲ့ခြင်း ဖြစ်သည်။

“မြန်မာနိုင်ငံအနေနဲ့ ကုလသမဂ္ဂသို့ နျူကလီးယားလက်နက် အလုံးစုံဖျက်သိမ်းရေး အဆိုမူကြမ်းကို ၁၉၉၅ ခုနှစ်က စတင်ပြီးတော့ တက်ကြွစွာ ဦးဆောင်တင်သွင်းခဲ့တဲ့ နိုင်ငံဖြစ်တဲ့အလျောက် နျူကလီးယားလက်နက် တားဆီးပိတ်ပင်ရေးစာချုပ်သို့ ပါဝင်လက်မှတ်ရေးထိုးခြင်းအားဖြင့် မိမိတို့နိုင်ငံဟာ နျူကလီးယားလက်နက် ဖျက်သိမ်းရေးကို အစဉ်တစိုက်  တက်ကြွစွာ ပါဝင်ဆောင်ရွက်လာတဲ့ ရပ်တည်ချက်ကို ပိုမိုခိုင်မာလာစေမှာလည်း ဖြစ်ပါတယ်။ အခုအခါ ဒီစာချုပ်ကို ပါဝင်လက်မှတ်ရေးထိုးခြင်းဟာ နျူကလီးယားလက်နက် ဖျက်သိမ်းရေးကဏ္ဍမှာ မြန်မာနိုင်ငံရဲ့ နောက်ထပ်ဆောင်ရွက်ချက်တစ်ခုအဖြစ် မှတ်တမ်းတင်နိုင်မှာဖြစ်သလို နိုင်ငံတကာမှာလည်း နျူကလီးယားလက်နက် ဖျက်သိမ်းရေးအတွက် တက်ကြွစွာ ကြိုးပမ်းဆောင်ရွက်နေတဲ့ နိုင်ငံတစ်နိုင်ငံအဖြစ် ပုံရိပ်ကောင်းကို ရရှိစေမှာ ဖြစ်ပါတယ်” ဟု အပြည်ပြည်ဆိုင်ရာ ပူးပေါင်းဆောင်ရွက်ရေးဝန်ကြီးဌာန ပြည်ထောင်စုဝန်ကြီး ဦးကျော်တင်က ပြောကြားသည်။

မြန်မာနိုင်ငံက လက်မှတ်ရေးထိုးမည့် TPNW စာချုပ်သည် နျူကလီးယားလက်နက် အလုံးစုံ ဖျက်သိမ်းရေးကို ဦးတည်စေမည်ဖြစ်ပြီး ယနေ့အချိန်ထိ ယင်းစာချုပ်ကို လက်မှတ်ရေးထိုးသည့် နိုင်ငံ ၆၀ နှင့် အတည်ပြု  ပါဝင်သည့် နိုင်ငံ ၁၅ နိုင်ငံ ရှိပြီဖြစ်ကာ အာဆီယံနိုင်ငံများအနက် အင်ဒိုနီးရှားနိုင်ငံ၊ လာအိုနိုင်ငံ၊ မလေးရှားနိုင်ငံ၊ ဖိလစ်ပိုင်နိုင်ငံတို့က စာချုပ်ကို လက်မှတ်ရေးထိုးထား၍ ထိုင်းနိုင်ငံနှင့် ဗီယက်နမ်နိုင်ငံတို့က စာချုပ်ကို အတည်ပြုပါဝင်ထားကြောင်းနှင့် စာချုပ်၏ အာတီကယ် ၁၅ အရ စာချုပ်ကို အတည်ပြုပါဝင်သည့် နိုင်ငံ ၅၀ ပြည့်မီမှသာ စာချုပ်အာဏာ အသက်ဝင်မည်ဖြစ်ကြောင်း သိရသည်။

မြန်မာနိုင်ငံအနေဖြင့် နျူကလီးယားလက်နက် မပြန့်ပွားရေးစာချုပ်သို့ ၁၉၉၂ ခုနှစ်တွင်လည်းကောင်း၊ ဇီဝလက်နက် တားဆီးပိတ်ပင်ရေးစာချုပ်သို့ ၂၀၁၄ ခုနှစ်တွင် လည်းကောင်း၊ ဓာတုလက်နက် တားဆီးပိတ်ပင်ရေးစာချုပ်သို့ ၂၀၁၅ ခုနှစ်တွင်လည်းကောင်း၊ နျူကလီးယားလက်နက် စမ်းသပ်ဖောက်ခွဲမှု အလုံးစုံတားဆီးပိတ်ပင်ရေးစာချုပ်သို့ ၂၀၁၆ ခုနှစ်တွင်လည်းကောင်း အသီးသီး အတည်ပြုပါဝင်ခဲ့ပြီး ကုလသမဂ္ဂအထွေထွေညီလာခံ၊ ပထမကော်မတီတွင် နျူကလီးယားလက်နက် ဖျက်သိမ်းရေးဆိုင်ရာ အဆိုမူကြမ်းကို ၁၉၉၅ ခုနှစ်မှစ၍ မြန်မာနိုင်ငံက ဦးဆောင်လျက် နှစ်စဉ်အောင်မြင်စွာ တင်သွင်းလျက်ရှိကြောင်း သိရသည်။