နေပြည်တော်ရှိအလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနတွင် စက်တင်ဘာ ၁၁ ရက်က ပြုလုပ်သော ဆွေးနွေးပွဲကို တွေ့ရစဉ်

ထိုင်းနိုင်ငံရှိ ရေလုပ်ငန်းများသို့ MoU စနစ်ဖြင့် မြန်မာရေလုပ်သားများ တရားဝင် စေလွှတ်နိုင်ရေး အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန ပြည်ထောင်စုဝန်ကြီး၊ ဝန်ကြီးဌာနမှ တာဝန်ရှိသူများနှင့် မြန်မာပြည်ပ အလုပ်အကိုင် ဝန်ဆောင်မှုလုပ်ငန်းရှင်များအဖွဲ့ချုပ်တို့ ဆွေးနွေးခဲ့ကြောင်း သိရသည်။

နေပြည်တော်ရှိ အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနတွင် စက်တင်ဘာ ၁၁ ရက်က အထက်ပါ ဆွေးနွေးပွဲပြုလုပ်ခဲ့ခြင်း ဖြစ်သည်။

“ရေလုပ်သားများရဲ့ အခွင့်အရေးနဲ့ ကာကွယ်စောင့်ရှောက်မှုများ အပြည့်အဝရရှိနိုင်ဖို့ ထိုင်းနိုင်ငံမှ အာမခံချက်များပေးမှုအပေါ် မိမိနိုင်ငံရှိ ရေလုပ်သားများရဲ့ အလုပ်အကိုင် အခွင့်အလမ်းများ ရှေးရှုပြီး MoU စနစ်နဲ့ ရေလုပ်သားစေလွှတ်ခြင်းကို အကောင်အထည်ဖော်ဆောင်ရွက်သွားမှာ ဖြစ်ပါတယ်။  ဒီလုပ်ငန်းအတွက် မြန်မာရေလုပ်သား အများဆုံးရှိတဲ့ ကော့သောင်းမြို့မှာ ရွှေ့ပြောင်းအလုပ်သမားရုံး ဖွင့်လှစ်ပေးပြီး One Stop Service အနေနဲ့ ဆောင်ရွက်သွားမှာ ဖြစ်ပါတယ်။ MoU လုပ်ငန်းစဉ်ဖြစ်ရန် မြန်မာဘက်မှ အေဂျင်စီများနဲ့ ဆက်သွယ်ဆောင်ရွက်ရမှာဖြစ်လို့ အခုလိုခေါ်ယူတွေ့ဆုံရခြင်း ဖြစ်ပါတယ်” ဟု အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန ပြည်ထောင်စုဝန်ကြီး ဦးသိန်းဆွေက ပြောကြားသည်။

လက်ရှိတွင် တနင်္သာရီတိုင်းဒေသကြီး၊ ဧရာဝတီတိုင်းဒေသကြီး၊ မွန်ပြည်နယ်နှင့် ရခိုင်ပြည်နယ်တို့မှ ထိုင်းနိုင်ငံသို့ရေလုပ်သားအဖြစ် သွားရောက်လုပ်ကိုင်သည့် မြန်မာရေလုပ်သား ၄၁၁၂၅ ဦး၊ ရေလုပ်ငန်းနှင့် ဆက်စပ်သည့်လုပ်ငန်းများတွင် အလုပ်သမား ၄၅၄၀၀၊ ရေထွက်ပစ္စည်းများ ထုတ်လုပ်သည့် စက်ရုံများတွင် အလုပ်သမား ၅၁၇၄၁ ဦး ရှိကြောင်း ပြည်ထောင်စုဝန်ကြီးက ဆိုသည်။

ထို့ပြင် ရေလုပ်သားများ၏ အခွင့်အရေးနှင့် ကာကွယ်စောင့်ရှောက်မှုများ အပြည့်အဝရရှိနိုင်ရန် ထိုင်းနိုင်ငံမှ အာမခံချက်များ ပေးမှုအပေါ်မူတည်၍ MoU စနစ်ဖြင့် ရေလုပ်သားများ စေလွှတ်ခြင်းကို အကောင်အထည်ဖော်ဆောင်ရွက်မည်ဖြစ်ကြောင်း သိရသည်။

ပြည်ထောင်စုဝန်ကြီးက “ရေလုပ်ငန်းနဲ့ ရေလုပ်သားတွေဟာ ထိခိုက်လွယ်တဲ့ အလုပ်အမျိုးအစားမှာ ပါဝင်လို့ အထူးဂရုပြုဆောင်ရွက်ရမှာဖြစ်ပြီး အလုပ်ခေါ်စာ စတင်လက်ခံ ရရှိကတည်းကတိကျသေချာတဲ့ အလုပ်ရှင်၊ စက်လှေပိုင်ရှင်၊ မှတ်ပုံတင်ထားတဲ့ စက်လှေများဖြစ်ဖို့ သတ်မှတ်ထားတဲ့ စာရွက်စာတမ်းတွေ ပြည့်စုံစွာတင်ပြဖို့လိုပါတယ်။ အလုပ်ခေါ်စာမှာပါတဲ့ အချက်တွေနဲ့ အလုပ်ရှင်၊ အလုပ်သမား အလုပ်ခန့်ထားမှုဆိုင်ရာ သဘောတူစာချုပ်မှာပါတဲ့ အချက်တွေ ကိုက်ညီရမှာ ဖြစ်ပါတယ်” ဟု ပြောကြားသည်။

ဆက်လက်၍ “ဝန်ကြီးဌာနအနေဖြင့် အလုပ်သမားများ၏ မိသားစုလွှဲပို့ငွေဟာ နိုင်ငံတော်ရဲ့ အသားတင် ထုတ်လုပ်မှုတန်ဖိုး ကို တစ်စိတ်တစ်ဒေသ အထောက်အကူပြုနေတာကြောင့် အေဂျင်စီများအနေနဲ့ မိမိစေလွှတ်လိုက်တဲ့ အလုပ်သမားတိုင်း မိသားစုလွှဲ ပို့ငွေများ လွယ်ကူလျင်မြန်စွာ လွှဲပို့နိုင်ဖို့နဲ့ လွှဲပို့မှု အခြေအနေသိရှိနိုင်ဖို့ မိမိတို့အလုပ်သမားများနဲ့ အမြဲအပြတ် အဆက်အသွယ်ရှိဖို့ လိုအပ်ပါတယ်။ မလေးရှားနိုင်ငံသို့ အလုပ်သမားများစေလွှတ်နေတဲ့ အေဂျင်စီတွေကလည်း အလုပ်သမားအပေါ်မှာ တာဝန်ယူဖို့၊ ကာကွယ်စောင့်ရှောက်ပေးဖို့၊ မိသားစုလွှဲပို့ငွေတွေ တရားဝင် ပို့ဖို့ကိစ္စကို ကျွန်တော်တို့ ညှိနှိုင်းဆွေးနွေးထားတာ ရှိပါတယ်” ဟု ပြည်ထောင်စုဝန်ကြီးက ပြောကြားသည်။