စက်တင်ဘာ ၇ ရက်တွင် ကမ္ဘာ့ဒေါ်လာဈေး အညွှန်းကိန်း ၉၅ ဒသမ ၃၈ ပွိုင့်ဖြင့် တစ်ပတ်တာဈေးပိတ်ခဲ့ပြီး ပြည်တွင်းဈေးကွက်တွင် စက်တင်ဘာ ၈ ရက်၌ နိုင်ငံခြား ငွေလဲနှုန်း တစ်ဒေါ်လာ ၁၅၄၉ ကျပ်အထိ ပြန်လည်မြင့်တက်ခဲ့ကြောင်း နိုင်ငံခြားငွေကြေး ရောင်းဝယ်သူများထံမှ သိရသည်။
မြန်မာကျပ်ငွေတန်ဖိုးသည် ဒေါ်လာဈေး မြင့်တက်မှုနှင့်အတူ ထိုင်းဘတ်၊ တရုတ် ယွမ်နှင့် စင်ကာပူဒေါ်လာ စသည့်ငွေကြေးများနှင့်နှိုင်းယှဉ်ပါက ဆက်လက်အားပျော့နေဆဲဖြစ်သည်။
ပြည်တွင်းဈေးကွက်တွင် နိုင်ငံခြားငွေလဲနှုန်း ဇွန်လမှစတင်ကာ သိသိသာသာမြင့်တက်ခဲ့ရာ၂၀၁၆ ခုနှစ် ဒီဇင်ဘာ ၁၆ ရက်တွင် ဖြစ်ပေါ်ခဲ့သည့် တစ်ဒေါ်လာ ၁၄၃၈ ကျပ်စံချိန်ကို ဇူလိုင် ၃၀ ရက်တွင် ကျပ် ၁၄၄၀ ဖြင့် ချိုးခဲ့ပြီး စံချိန်တင်ဈေးနှုန်းများဆက်တိုက် ဖြစ်ပေါ်ခဲ့ကာ သြဂုတ် ၁၆ ရက်တွင် ကျပ် ၁၅၇၀ ဖြင့် အမြင့်ဆုံးစံချိန်တင်ထားသည်။ ဒေါ်လာဈေးသည် သြဂုတ် ၂၀ ရက်တွင် ကျပ် ၁၄၈၀ အထိကျဆင်းခဲ့သော်လည်း သြဂုတ် ၂၈ ရက်တွင် ကျပ် ၁၅၆၀ အထိ ပြန်တက်ခဲ့ကာ စက်တင်ဘာ ၈ ရက်တွင် ၁၅၄၉ ကျပ်ဝန်းကျင် ဖြစ်ပေါ်ခဲ့သည်။ ၂၀၁၈ ခုနှစ် ဇွန် ၁၁ ရက်တွင် ဖြစ်ပေါ်သော တစ်ဒေါ်လာ ၁၃၄၆ ကျပ်နှင့် သြဂုတ် ၁၆ ရက်တွင်ဖြစ်ပေါ်သော တစ်ဒေါ်လာ ၁၅၇၀ ကျပ်နှင့်နှိုင်းယှဉ်ပါက နှစ်လကျော်အတွင်း ၂၂၄ ကျပ်၊ ၁၆ ရာခိုင် နှုန်းကျော်အထိ ကျပ်ငွေတန်ဖိုး ကျဆင်းခဲ့သည်။
၂၀၁၈ ခုနှစ် မေလမှစတင်ကာ ကမ္ဘာ့ ဒေါ်လာဈေး အညွှန်းကိန်း သိသိသာသာပြန်လည်မြင့်တက်ခဲ့ခြင်းဖြစ်ပြီး ပြည်တွင်းဈေးကွက်၌ ငါးလအတွင်း လအလိုက်ဖြစ်ပေါ်သော နိုင်ငံခြားငွေလဲနှုန်းအနိမ့်ဆုံးနှင့် အမြင့်ဆုံးနှုန်းများမှာ ဧပြီတွင် ၁၃၂၄-၁၃၃၂ ကျပ်၊ မေတွင် ၁၃၃၂-၁၃၅၁ ကျပ်၊ ဇွန်တွင် ၁၃၄၅-၁၄၀၇၊ ဇူလိုင်တွင် ၁၃၈၄-၁၄၄၃၊ သြဂုတ်တွင် ၁၄၄၂-၁၅၇၀ တို့ဖြစ်ပြီး သြဂုတ်လတွင် ကွာဟချက်အများဆုံးဖြစ်ခဲ့ကြောင်း သိရသည်။
ပြည်တွင်းဈေးကွက်အတွင်း စက်တင်ဘာ ၈ ရက်တွင်ဖြစ်ပေါ်သော အခြားနိုင်ငံခြား ငွေကြေးများ၏ လဲလှယ်မှုနှုန်းထားများမှာ ယူရို ၁၇၉၀ ကျပ်၊ စင်ကာပူဒေါ်လာ ၁၁၁၉ ကျပ်၊ မလေးရှားရင်းဂစ် ၃၇၁ ကျပ်၊ ထိုင်းဘတ် ၄၇ ဒသမ ၃၀ ကျပ်၊ တရုတ်ယွမ် ၂၂၆ ကျပ်၊ ဂျပန်ယန်း ၁၃ ဒသမ ၈၅ ကျပ်၊ တောင်ကိုရီးယားဝမ် ၁ ဒသမ ၄၂ ကျပ်ဖြစ်သည်။