စီမံကိန်းနှင့် ဘဏ္ဍာရေးဝန်ကြီးဌာန ဒုတိယဝန်ကြီး ဦးမောင်မောင်ဝင်း ၂၀၁၈-၂၀၁၉ ဘဏ္ဍာနှစ် ပြည်ထောင်စု၏ အခွန်အကောက်ဥပဒေကြမ်းကို ပြည်ထောင်စုလွှတ်တော်သို့ တင်သွင်းနေစဉ်
၂၀၁၈-၂၀၁၉ ဘဏ္ဍာနှစ် ပြည်ထောင်စု၏ အခွန်အကောက်ဥပဒေကြမ်းတွင် ကျပ် ၇၅၇၅ ဘီလျံကျော်ရရှိရန် လျာထားပြီး ယခင်နှစ်ထက် ကျပ်ဘီလျံ ၁၀၀၀ ကျော်ရရှိရန် ပိုမိုလျာထားကြောင်း သိရသည်။
၂၀၁၇-၂၀၁၈ ဘဏ္ဍာနှစ်တွင် ပြည်ထောင်စု၏ အခွန်အကောက်အဖြစ် ကျပ်သန်းပေါင်း ၆၄၈၁၀၀၈ ဒသမ ၈၉၀ (ကျပ် ဘီလျံ ၆၄၈၁ ကျော်) ကောက်ခံရရှိရန် လျာထားခဲ့ပြီး ၂၀၁၈-၂၀၁၉ ဘဏ္ဍာနှစ်တွင်အခွန် အကောက်အား ကျပ်သန်းပေါင်း ၇၅၇၅၉၃၄ ဒသမ ၂၁၄ (ကျပ် ၇၅၇၅ ဘီလျံကျော်) ရရှိရန် လျာထားသည့်အတွက် ကျပ်သန်းပေါင်း ၁၀၉၄၉၂၅ ဒသမ ၃၂၅ (ကျပ်ဘီလျံ တစ်ထောင်ကျော်) ရရှိရန် ပိုမိုလျာထားကြောင်း သိရသည်။ ၂၀၁၈ ဘဏ္ဍာနှစ်ကာလတို (ဧပြီ မှ စက်တင်ဘာလအထိ) အခွန်အကောက် အဖြစ် ကျပ်သန်းပေါင်း ၂၇၉၁၈၉၆ ဒသမ ၇၆၃ (ကျပ်ဘီလျံ ၂၇၀၀ ကျော်) ရရှိရန် လျာထားသည်။
နေပြည်တော်၌ သြဂုတ် ၂၄ ရက်က ပြုလုပ်သည့် ပြည်ထောင်စုလွှတ်တော် အစည်းအဝေးတွင် စီမံကိန်းနှင့်ဘဏ္ဍာရေးဝန်ကြီးဌာန ဒုတိယဝန်ကြီး ဦးမောင်မောင်ဝင်းက ၂၀၁၈-၂၀၁၉ ဘဏ္ဍာနှစ် ပြည်ထောင်စု၏ အခွန်အကောက်ဥပဒေကြမ်းကို တင်သွင်းခဲ့ခြင်း ဖြစ်သည်။
အဆိုပါဥပဒေကြမ်းအရ အခွန်အကောက်များကောက်ခံရန် လျာထားရာတွင် ပြည်တွင်းထုတ်ကုန်နှင့် ပြည်သူပြည်သားများ သုံးစွဲမှုအပေါ်ကောက်ခံသည့် အခွန်အကောက်များမှ ကျပ်သန်းပေါင်း ၃၈၆၂၇၈၅ ဒသမ ၉၄၄ ဖြစ်ပြီး ၎င်းတို့တွင် ပြည်ထဲရေး ဝန်ကြီးဌာန ယစ်မျိုးခွန်မှ ကျပ်သန်းပေါင်း ၁၀၈၄ ဒသမ ၂၇၅၊ စီမံကိန်းနှင့်ဘဏ္ဍာရေးဝန်ကြီးဌာန ကုန်သွယ်လုပ်ငန်းခွန်မှ ကျပ်သန်းပေါင်း ၂၁၂၂၈၃၈ ဒသမ ၅၄၇၊ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန သွင်းကုန်အတွက်လိုင်စင်ကြေး၊ ပါမစ်ကြေးများမှ ကျပ်သန်းပေါင်း ၇၀၀၀ ပါဝင်ကြောင်း သိရသည်။
ထို့ပြင် မြန်မာနိုင်ငံအောင်ဘာလေသိန်းဆုမှ ကျပ်သန်းပေါင်း ၁၄၂၇၈၁ ဒသမ ၆၁၂၊ ပို့ဆောင်ရေးနှင့် ဆက်သွယ်ရေးဝန်ကြီးဌာန မော်တော်ယာဉ်၊ ယာဉ်မောင်းလိုင်စင်၊ လုပ်ငန်းလိုင်စင်ဆိုင်ရာ အခွန်ငွေများမှ ကျပ်သန်းပေါင်း ၁၂၁၄၀၀၊ စီမံကိန်းနှင့်ဘဏ္ဍာရေး ဝန်ကြီးဌာန ရုံးခွန်နှင့် တံဆိပ်ခေါင်းခွန်မှ ကျပ်သန်းပေါင်း ၇၄၆၃၆ ဒသမ ၇၁၉၊ သယံ ဇာတနှင့် သဘာဝပတ်ဝန်းကျင် ထိန်းသိမ်းရေး ဝန်ကြီးဌာန မုတ်ကောင်ဝတ်ဆံသွင်း အခွန်မှ ကျပ်သန်းပေါင်း ၇၂၀ ၊ ဟိုတယ်နှင့် ခရီးသွားလာရေးဝန်ကြီးဌာန ခရီးလှည့်လည် ရေးလိုင်စင်၊ ဟိုတယ်နှင့် တည်းခိုရိပ်သာလိုင်စင် အစရှိသည့်တို့မှ ကျပ်သန်းပေါင်း ၈၆၅ ဒသမ ၄၇၅၊ စီမံကိန်းနှင့် ဘဏ္ဍာရေးဝန်ကြီးဌာန အထူးကုန်စည်ခွန်မှ ကျပ်သန်းပေါင်း ၁၃၉၁၄၅၉ ဒသမ ၃၁၆ ကောက်ခံရန်လျာထားကြောင်း သိရသည်။
ထို့အတူ ဝင်ငွေနှင့်ပိုင်ဆိုင်မှုအပေါ် ကောက်ခံမည့် အခွန်အကောက်တွင် စီမံကိန်း နှင့် ဘဏ္ဍာရေးဝန်ကြီးဌာန ဝင်ငွေခွန်ကျပ် သန်းပေါင်း ၂၃၂၄၈၁၆ ဒသမ ၃၂၀၊ အကောက်ခွန် ကျပ်သန်းပေါင်း ၅၃၀၀၀၀ ပါဝင်သည်။
နိုင်ငံပိုင်သယံဇာတများ ထုတ်ယူသုံးစွဲမှု အပေါ် ကောက်ခံသည့် အခွန်အကောက်မှ ကျပ်သန်းပေါင်း ၈၅၈၃၃၁ ဒသမ ၉၅၀ ရရှိရန်လျာထားပြီး ပြည်ထဲရေးဝန်ကြီးဌာန မြေယာပေါ်တွင် ကောက်ခံသည့်အခွန် ကျပ် သန်းပေါင်း ၁၀ ဒသမ ၃၉၂၊ နေပြည်တော် ကောင်စီရေခွန်မှ ကျပ်သန်းပေါင်း ၇၆ ဒသမ ၀၀၃၊ ပြည်ထဲရေးဝန်ကြီးဌာန တာတမံခွန်မှ ကျပ်သန်းပေါင်း ၀ ဒသမ ၀၂၅၊ သစ်တောများမှ ပစ္စည်းများထုတ်ယူသည့်အတွက် ကောက်ခံသည့် သစ်တောခွန်မှ ကျပ်သန်းပေါင်း ၅၁၀၀၊ ပြည်ထဲရေးဝန်ကြီးဌာန ဓာတ်သတ္တုပစ္စည်းများ ထုတ်ယူသည့်အတွက် ကောက်ခံသည့်အခွန် (စက်မှုကုန်ကြမ်း၊ တွင်းထွက်နှင့် အလှဆင်ကျောက်များမပါ) ကျပ်သန်းပေါင်း ၄၅ ဒသမ ၀၄၈ ပါဝင်ကြောင်း ဒုတိယဝန်ကြီး၏ ရှင်းလင်းချက်အရ သိရသည်။
ယင်းအပြင် စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ငါးလုပ်ငန်းဆိုင်ရာ အခွန်အခ ကျပ်သန်းပေါင်း ၂၆၀၇၊ လျှပ်စစ် နှင့် စွမ်းအင်ဝန်ကြီးဌာန ရေနံနှင့် သဘာဝဓာတ်ငွေ့ထုတ်ယူသည့်အတွက် ကောက်ခံ သည့်အခွန်မှ ကျပ်သန်းပေါင်း ၄၁၀၃၁၃ ဒသမ၂၁၂၊ သယံဇာတနှင့် သဘာဝပတ်ဝန်း ကျင်ထိန်းသိမ်းရေးဝန်ကြီးဌာန ဓာတ်သတ္တုခွန်နှင့် ရတနာခွန်မှ ကျပ်သန်းပေါင်း ၃၀၃၆၈၊ ပို့ဆောင်ရေးနှင့် ဆက်သွယ်ရေးဝန်ကြီးဌာန ဆက်သွယ်ရေးဝန်ဆောင်မှုလုပ်ငန်း လုပ်ကိုင်ခြင်းကြောင့် ကောက်ခံသည့် အခွန်အခမှ ကျပ်သန်းပေါင်း ၃၉၆၉၆၃ ဒသမ ၈၀၀၊ လျှပ်စစ်နှင့် စွမ်းအင်ဝန်ကြီးဌာန ရေအားအရင်း အမြစ်မှ လျှပ်စစ်ဓာတ်အား ထုတ်ယူသည့်အတွက် အခမဲ့ရရှိသည့် ဓာတ်အားခမှ ကျပ်သန်းပေါင်း ၁၂၁၉၇ ဒသမ ၉၂၀၊ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန မြေလွတ်၊ မြေလပ်၊ မြေရိုင်းလုပ်ပိုင်ခွင့်၊ အသုံးပြုခွင့်ရရှိသူများထံမှ ကောက်ခံရရှိသည့် အခွန်ကျပ်သန်းပေါင်း ၆၅၀ ဒသမ ၅၅၀ ကောက်ခံရရှိရန် လျာထားခြင်း ဖြစ်သည်။
၂၀၁၈-၂၀၁၉ ခုနှစ် ပြည်ထောင်စု၏ အခွန်အကောက်ဥပဒေကြမ်းသည် ပြည်ထောင်စုလွှတ်တော်က အတည်ပြုပြဋ္ဌာန်းပေးရမည့် ခြောက်ကြိမ်မြောက် အခွန်အကောက် ဥပဒေဖြစ်ကြောင်း၊ အဆိုပါ အခွန်အကောက် ဥပဒေမူကြမ်းကို ရေးဆွဲပြုစုရာတွင် ၂၀၁၈ ခုနှစ် ပြည်ထောင်စု၏ အခွန်အကောက် ဥပဒေကိုမှီငြမ်းကာ ဖြည့်စွက်ရေးသားထားခြင်းဖြစ်ကြောင်း ဒုတိယဝန်ကြီးက ပြောကြားသည်။
