ဇွန် ၁၁ ရက်မှ ဇူလိုင် ၁၈ ရက်အထိ ရက်ပေါင်း တစ်လကျော်အတွင်း မြန်မာကျပ်ငွေတန်ဖိုး ခြောက်ရာခိုင်နှုန်းခန့် ကျဆင်းခဲ့ပြီး နိုင်ငံခြားငွေလဲနှုန်း တစ်ဒေါ်လာ ၁၄၂၆ ကျပ်အထိ မြင့်တက်ခဲ့ကာ သမိုင်းတစ်လျှောက် စံချိန်တင်ဈေးနှုန်းကို မီရန် ၁၂ ကျပ်သာ လိုကြောင်း နိုင်ငံခြားငွေကြေး ရောင်းဝယ်သူများထံမှ သိရသည်။

နိုင်ငံခြားငွေလဲနှုန်းသည် အမေရိကန် ဒေါ်လာဈေး မာလာခြင်းကြောင့် ဇွန်လလယ်မှစ၍ ဆက်တိုက် မြင့်တက်ခဲ့ကာ ဇူလိုင် ၁၈ ရက်တွင် ပို့ကုန်ရငွေ တစ်ဒေါ်လာ ၁၄၄၆ ကျပ်၊ စင်ကာပူ ဘဏ်စာရင်းဈေး (Away) ၁၄၄၈ ကျပ်အထိ ရောက်ရှိခဲ့ခြင်း ဖြစ်သည်။

ဇူလိုင် ၁၈ ရက်တွင် ကမ္ဘာ့ဒေါ်လာဈေး ၉၅ ပွိုင့်အထက်အထိ ပြန်လည် မြင့်တက်ခဲ့ပြီး ပြည်တွင်းဈေးကွက်တွင် ဒေါ်လာဈေး နှစ်ရက်အတွင်း ကျပ် ၁၀ ကျော် ဆက်လက် မြင့်တက်ခဲ့ခြင်းဖြစ်ပြီး အခြားနိုင်ငံခြား ငွေကြေးများဖြစ်သော ယူရို၊ စင်ကာပူဒေါ်လာ၊ မလေးရှား ရင်းဂစ်နှင့် ထိုင်းဘတ်ဈေးများပါ ရက်ပိုင်းအတွင်း သိသိသာသာ မြင့်တက်ခဲ့သည်။

၂၀၁၆ ခုနှစ် ဒီဇင်ဘာ ၁၆ ရက်တွင် သမိုင်းတစ်လျှောက် အမြင့်ဆုံး ငွေလဲနှုန်းထားအဖြစ် ၁၄၃၈ ကျပ်အထိ ရောက်ရှိခဲ့သည်။ ၂၀၁၈ ခုနှစ် ဇွန်၂၈ ရက်တွင် တစ်ဒေါ်လာ ၁၄၀၇ ကျပ်၊ ဇူလိုင် ၁၂ ရက်တွင် ကျပ် ၁၄၁၀၊ ဇူလိုင် ၁၆ ရက်တွင် ၁၄၁၁ ကျပ်၊ ဇူလိုင် ၁၇ ရက်တွင် ၁၄၁၅ ကျပ်၊ ဇူလိုင် ၁၈ ရက်တွင် ၁၄၂၆ ကျပ်အထိ မြင့်တက်ခဲ့ပြီး စံချိန်တင်ဈေးနှုန်းကို မီရန် ၁၂ ကျပ်သာ လိုတော့ခြင်း ဖြစ်သည်။

ပြီးခဲ့သည့် ငါးလအတွင်း အမြင့်ဆုံး ဖြစ်ပေါ်ခဲ့သော ကမ္ဘာ့ဒေါ်လာဈေး အညွှန်းကိန်းများမှာ ဖေဖော်ဝါရီတွင် ၉၀ ဒသမ ၄၃ ပွိုင့်၊ မတ်တွင် ၉၀ ဒသမ ၃၇ ပွိုင့်၊ ဧပြီတွင် ၉၁ ဒသမ ၇၁ ပွိုင့်၊ မေတွင် ၉၄ ဒသမ ၈၃ ပွိုင့်၊ ဇွန်တွင် ၉၅ ဒသမ ၂၁ ပွိုင့်ဖြစ်ပြီး ဇူလိုင် ၁၃ ရက်တွင် ၉၄ ဒသမ ၉၈ ပွိုင့်အထိ အမြင့်ဆုံး ဖြစ်ပေါ်ခဲ့သည်။

၂၀၁၈ ခုနှစ် မေလမှ စတင်ကာ ကမ္ဘာ့ဒေါ်လာဈေး အညွှန်းကိန်း သိသိသာသာ ပြန်လည် မြင့်တက်ခဲ့ခြင်းဖြစ်ပြီး ပြည်တွင်းဈေးကွက်၌ ငါးလအတွင်း လအလိုက် ဖြစ်ပေါ်သော နိုင်ငံခြားငွေလဲနှုန်း အနိမ့်ဆုံးနှင့် အမြင့်ဆုံးနှုန်းများမှာ ဇန်နဝါရီတွင် ၁၃၂၃-၁၃၅၄ ကျပ်၊ ဖေဖော်ဝါရီတွင် ၁၃၂၃-၁၃၃၁ ကျပ်၊ မတ်တွင် ၁၃၂၆-၁၃၃၄ ကျပ်၊ ဧပြီတွင် ၁၃၂၄-၁၃၃၂ ကျပ်၊ မေတွင် ၁၃၃၂-၁၃၅၁ ကျပ်၊ ဇွန်တွင် ၁၃၄၅-၁၄၀၇ တို့ဖြစ်ပြီး ဇွန်လတွင် ကွာဟချက် အများဆုံး ဖြစ်ပေါ်ခဲ့သည်။

အမေရိကန် ဗဟိုဘဏ်ဥက္ကဋ္ဌ၏ စီးပွားရေးအားကောင်းသည့် ရှုမြင်သုံးသပ်မှုများကြောင့် အတိုးနှုန်း ဆက်လက်တိုးမြှင့်မည့် အလားအလာ ကောင်းမွန်နေပြီး ဒေါ်လာဈေး အညွှန်းကိန်းမှာ အမြင့်ပိုင်း ပြန်ရောက်လာခြင်း ဖြစ်သည်။

ပြည်တွင်းဈေးကွက်တွင် ဇွန်လလယ်မှစ၍ ဒေါ်လာဈေးသိသိသာသာ စတင်လှုပ်ခတ်ခဲ့ခြင်း ဖြစ်သည်။ ဇွန် ၁၁ ရက်တွင် ၁၃၄၆ ကျပ်ဝန်းကျင် ဖြစ်ပေါ်နေသော ဒေါ်လာဈေးသည် ဇွန် ၂၀ ရက်တွင် ၁၃၆၈ ကျပ်၊ ဇွန်၂၈ ရက်တွင် ၁၄၀၇ ကျပ်ဝန်းကျင် ဖြစ်ပေါ်ခဲ့သည်။ ဇူလိုင် ၁ ရက်တွင် ၁၃၈၄ ကျပ်အထိ ကျဆင်းခဲ့ပြီး ဇူလိုင် ၁၀ ရက်တွင် ကျပ် ၁၄၀၀ ၊ ဇူလိုင် ၁၁ ရက်တွင် ၁၄၀၆ ကျပ်၊ ဇူလိုင် ၁၂ ရက်တွင် ကျပ် ၁၄၁၀၊ ဇူလိုင် ၁၆ ရက်တွင် ၁၄၁၁ ကျပ်၊ ဇူလိုင် ၁၇ ရက်တွင် ၁၄၁၅ ကျပ်အထိ မြင့်တက်ခဲ့သည်။ ဇူလိုင် ၁၈ ရက်တွင် သတ်မှတ်ထားသော ဗဟိုဘဏ် ရည်ညွှန်း ငွေလဲနှုန်းမှာ ကျပ် ၁၄၁၅ ဖြစ်ကြောင်း သိရသည်။

ပြည်တွင်းဈေးကွက်အတွင်း ဇူလိုင် ၁၈ ရက်တွင် ဖြစ်ပေါ်သော အခြားနိုင်ငံခြား ငွေကြေးများ၏ လဲလှယ်မှု နှုန်းထားများမှာ ယူရို ၁၆၆၀ ကျပ်၊ စင်ကာပူ ဒေါ်လာ ၁၀၄၉ ကျပ်၊ မလေးရှား ရင်းဂစ် ၃၄၉ ကျပ်၊ ထိုင်းဘတ် ၄၃ ဒသမ ၃၀ ကျပ်၊ တရုတ်ယွမ် ၂၁၁ ကျပ်၊ ဂျပန်ယန်း ၁၂ ဒသမ ၆၀ ကျပ်၊ တောင်ကိုရီးယားဝမ် ၁ ဒသမ ၄၀ ကျပ် ဖြစ်သည်။