<

မဟာရန်ကုန်၏ စီးပွားရေးကို ဦးဆောင်မည့် မြို့ပြတစ်ခု ဖြစ်လာရေး ရန်ကုန်မြို့သစ်၏ လိုအပ်ချက်များ ထည့်သွင်း စဉ်းစားထားပြီး စီမံကိန်းအဆင့် (၁) တွင် စက်မှုဇုန် ဧရိယာကို ဦးစားပေး တည်ဆောက်မည်

မဟာရန်ကုန်၏ စီးပွားရေးကို ဦးဆောင်မည့် မြို့ပြတစ်ခု ဖြစ်လာရေးအတွက် ရန်ကုန်မြို့သစ်တွင် ဖြစ်ပေါ်လာမည့် လိုအပ်ချက်များကို ထည့်သွင်း စဉ်းစားထားပြီး စီမံကိန်း အဆင့် (၁) တွင် စက်မှုဇုန် ဧရိယာကို ဦးစားပေး တည်ဆောက်မည် ဖြစ်ကြောင်း NYDC ၏ CEO ဦးသိမ်းဝေက ပြောကြားသည်။

“ရန်ကုန်မြို့သစ်နဲ့ ပတ်သက်ပြီး ဒီစီမံကိန်းက အလဟဿ မလိုအပ်တဲ့ ငွေဖြုန်းတီးတဲ့ စီမံကိန်းကြီး။ မြို့သစ်မှာ တောက်ပနေတဲ့ မိုးမျှော်တိုက်တွေနဲ့ တန်ဖိုးမြင့်အိမ်ရာတွေကို လိုချင်တယ်ဆိုတဲ့ ထောက်ပြဝေဖန်မှုတွေနဲ့ ပြောဆိုမှုတွေကို အများပြည်သူတွေဆီကနေ ကျွန်တော်တို့ ကြားသိရပါတယ်။ မြို့သစ်ကို တည်ထောင်ဖို့ စီမံတဲ့နေရာမှာ ဒီမြို့သစ်က လာမယ့် နှစ်ပေါင်း ၂၅-၃၀ နှစ် ကြာရင် ဖြစ်သင့်တဲ့ပုံစံကို ကြိုစဉ်းစားပြီး အစီအစဉ် ဆွဲရပါတယ်။ အချိန်ကြာလာတာနဲ့အမျှ ရန်ကုန်မြို့သစ်ဟာ မဟာရန်ကုန် (Greater Yangon) ရဲ့ စီးပွားရေးအရ ဦးဆောင်ထားနိုင်တဲ့ မြို့ပြတစ်ခု ဖြစ်လာမှာဖြစ်လို့ နောင်လာမယ့်နှစ်တွေမှာ တိုးတက် ဖြစ်ပေါ်လာမယ့် လိုအပ်ချက်တွေကို ထည့်သွင်းစဉ်းစားပြီး စီစဉ်သွားဖို့ လိုအပ်ပါတယ်” ဟု ဦးသိမ်းဝေက ပြောကြားသည်။

ရန်ကုန်မြို့သစ် အဆင့် (၁) ဖွံ့ဖြိုး တည်ဆောက်ရေးတွင် အလုပ်အကိုင် အခွင့်အလမ်းအသစ် ဖော်ထုတ်နိုင်ရေးဆိုသည့် ရည်မှန်းချက်နှင့်အညီ စက်မှုဇုန် ဧရိယာကို ဦးစားပေး တည်ဆောက်မည် ဖြစ်သည်။ ထို့ကြောင့် စက်မှုဇုန် ဧရိယာတွင် လိုအပ်မည့် မြို့ပြဖွံ့ဖြိုးရေး လုပ်ငန်းများ တည်ဆောက်ရေးကို အလေးထား ဆောင်ရွက်မည် ဖြစ်ကြောင်းနှင့် မိုးမျှော်တိုက်များနှင့် တန်ဖိုးမြင့်အိမ်ရာများမှာ အနာဂတ်တွင် ပေါ်ထွက်ကောင်း ပေါ်ထွက်လာမည် ဖြစ်သော်လည်း လက်ရှိတွင် ဦးစားပေး တည်ဆောက်ရမည့် အရာများ မဟုတ်ကြောင်း ဦးသိမ်းဝေက ဆိုသည်။

“ရန်ကုန်မြို့သစ်ရဲ့ အဆင့် (၁) တည်ဆောက်မှုမှာ ချက်ချင်းလုပ်ဖို့ မလိုအပ်တဲ့ နေရာတွေမှာ ငွေမသုံးရေးကလည်း ကျွန်တော်တို့ရဲ့ လက်ရှိ လုပ်ကိုင်နေတဲ့ စီမံရေးမှာ ထည့်သွင်း စဉ်းစားထားတဲ့ အရေးကြီးတဲ့ အခြေခံ အကြောင်းရင်းတစ်ခု ဖြစ်ပါတယ်။ ဥပမာအားဖြင့် လက်ရှိအချိန်မှာ လိုအပ်တဲ့ လေးလမ်းသွား လမ်းမကြီးကို တည်ဆောက်သွားမှာ ဖြစ်ပေမဲ့ နောင်အနာဂတ်မှာ ခြောက်လမ်းသွားအထိ တိုးချဲ့နိုင်အောင် စီမံရေးဆွဲပြီး ဖော်ဆောင်သွားမှာပါ။ ရှေ့ဆက်သွားရာမှာလည်း ယခုလိုမျိုး ကိစ္စတွေမှာ အခြေအနေ အချိန်အခါပေါ် မူတည်ပြီး ထိရောက်တဲ့ ဆုံးဖြတ်ချက်နဲ့ စီမံအုပ်ချုပ်မှုတွေကို လုပ်ဆောင်သွားမှာပါ။ လက်ရှိအချိန်မှာ ကျွန်တော်တို့ အနေနဲ့ ရန်ကုန်မြို့သစ်ရဲ့ ၁၀ ရာခိုင်နှုန်းခန့် အကျယ်ရှိတဲ့ ဧရိယာဖြစ်တဲ့ အပိုင်း (၁) ကို အဓိကထားပြီး ဖော်ထုတ်သွားမှာပါ။ လိုအပ်တဲ့ အခြေခံ အဆောက်အအုံတွေ ရေရှည်စီမံ လုပ်ကိုင်နိုင်အောင် ဖော်ထုတ်ရေးသည် NYDC ရဲ့ အဓိက အရေးအကြီးဆုံး တာဝန်ဖြစ်ပါတယ်။ လျှပ်စစ်မီး၊ သောက်သုံးရေ၊ ရေဆိုးသန့်စင်ရေး၊ လမ်းမများ၊ အများပြည်သူသုံး သယ်ယူပို့ဆောင်ရေး၊ ကုန်ပစ္စည်းများ သယ်ယူပို့ဆောင်ရေး၊ တံတားများနှင့် ရေလမ်းကြောင်း၊ ဆက်သွယ်ရေးကွန်ရက်များနှင့် အများပြည်သူများအတွက် ၀န်ဆောင်မှု လုပ်ငန်းတွေဖြစ်တဲ့ ဆေးရုံများ၊ ကျောင်းများ၊ ပန်းခြံများ အစရှိသည်တို့ကို ဦးစားပေး တည်ဆောက်သွားမှာပါ။ အခုပြောပြသွားတဲ့ တည်ဆောက်ရေး လုပ်ငန်းတွေ အကုန်လုံးကို ပုဂ္ဂလိက ကဏ္ဍက မတူညီတဲ့ ရင်းနှီးမြှုပ်နှံသူတွေက တစ်ပြိုင်တည်း ပူပေါင်း၍ ဆောက်လုပ်သွားမှာ ဖြစ်တဲ့အတွက် ထိရောက်စွာ ကွပ်ကဲနိုင်ဖို့ အရမ်းအရေးကြီးပါတယ်” ဟု ဦးသိမ်းဝေက ပြောကြားသည်။

July 12, 2018














Copy Protected by Chetan's WP-Copyprotect.