၂၀၁၈-၂၀၁၉ ဘဏ္ဍာနှစ်မှ ၂၀၂၂- ၂၀၂၃ ဘဏ္ဍာနှစ်အထိ ငါးနှစ်အတွင်း စားနပ်ရိက္ခာဖူလုံမှု၊ လုပ်ကွက်ငယ် တောင်သူများ ဝင်ငွေပိုမိုမြင့်လာခြင်းနှင့် စိုက်ပျိုးရေးကဏ္ဍတွင် တောင်သူများ၏ ရပိုင်ခွင့်များ ပိုမိုခိုင်မာစေရန် ဆောင်ရွက်မည်ဖြစ်ကြောင်း စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနမှ သိရသည်။

စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန အနေဖြင့် စိုက်ပျိုးရေး ဖွံ့ဖြိုးတိုးတက်မှု မဟာဗျူဟာနှင့် ရင်းနှီးမြှုပ်နှံမှု အစီအစဉ်ကို ၂၀၁၈-၂၀၁၉ မှ ၂၀၂၂-၂၀၂၃ ခုနှစ်အထိ ရေးဆွဲဆောင်ရွက်မည် ဖြစ်ကြောင်း သိရသည်။

မြန်မာနိုင်ငံ၏ စီးပွားရေး ဖွံ့ဖြိုးတိုးတက်ရေးနှင့် ဆင်းရဲနွမ်းပါးမှုလျှော့ချရေး လုပ်ငန်းစဉ်များ ဆောင်ရွက်ရာတွင် လယ်ယာကဏ္ဍ အသွင်ကူးပြောင်းရေးနှင့် ဖွံ့ဖြိုးတိုးတက်ရေးသည် အဓိက အရေးပါသည့်အတွက် စိုက်ပျိုးရေး ဖွံ့ဖြိုးတိုးတက်မှု မဟာဗျူဟာ (ADS) ကို ရေးဆွဲရခြင်းဖြစ်ကြောင်း စိုက်ပျိုးရေး၊ မွေးမြူရေးနှင့် ဆည်မြောင်း ဝန်ကြီးဌာနမှ ပြည်ထောင်စုဝန်ကြီး ဒေါက်တာအောင်သူက ပြောကြားသည်။

စိုက်ပျိုးရေး ဖွံ့ဖြိုးတိုးတက်မှု မဟာဗျူဟာကို အစိုးရ-တောင်သူလယ်သမား-ပုဂ္ဂလိက လုပ်ငန်းရှင်များအကြား ပူးပေါင်းဆောင်ရွက်မှု အခြေခံအုတ်မြစ်အပေါ် တည်ဆောက်ထားကြောင်း၊ စိုက်ပျိုးရေး ဖွံ့ဖြိုးတိုးတက်မှု မဟာဗျူဟာ၏ မဏ္ဍိုင်ကြီး သုံးရပ်တို့ကို အခြေခံ၍ စီမံကိန်းများ၊ လုပ်ငန်းစဉ်များကို ထိထိရောက်ရောက် အကောင်အထည်ဖော် ဆောင်ရွက်မည်ဖြစ်ကြောင်း ပြည်ထောင်စုဝန်ကြီး ဒေါက်တာအောင်သူက ပြောကြားသည်။

စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန အနေဖြင့် စိုက်ပျိုးရေး ဖွံ့ဖြိုးတိုးတက်မှု မဟာဗျူဟာနှင့် ရင်းနှီးမြှုပ်နှံမှု အစီအစဉ်ကို (၂၀၁၈-၂၀၁၉ ခုနှစ်မှ ၂၀၂၂-၂၀၂၃ ခုနှစ်အထိ) အာရှဖွံ့ဖြိုးရေးဘဏ်၊ ကုလသမဂ္ဂ စားနပ်ရိက္ခာနှင့် စိုက်ပျိုးရေးအဖွဲ့၊ သက်မွေးဝမ်းကျောင်း လုပ်ငန်းများ ဖွံ့ဖြိုးရေးနှင့် စားနပ်ရိက္ခာ ဖူလုံရေး မ,တည်ရန်ပုံငွေအဖွဲ့တို့ ပူးပေါင်းအကောင်အထည်ဖော် ရေးဆွဲဆောင်ရွက်ခြင်းဖြစ်ကြောင်း သိရသည်။

ရင်းနှီးမြှုပ်နှံမှု အစီအစဉ်အောက်ရှိ စီမံကိန်း လုပ်ငန်းစဉ်များကို ပုံသေသတ်မှတ်ထားခြင်း မရှိဘဲ လာမည့် အနာဂတ် ကာလတွင် ဖြစ်ပေါ်လာနိုင်သော စီမံကိန်း လိုအပ်ချက်များအရ ပြောင်းလဲဆောင်ရွက် သွားမည်ဖြစ်ကြောင်း သိရသည်။

စိုက်ပျိုးရေး ဖွံ့ဖြိုးတိုးတက်မှု မဟာဗျူဟာနှင့် ရင်းနှီးမြှုပ်နှံမှု အစီအစဉ်ကို အကောင်အထည်ဖော်ခြင်းဖြင့် စားနပ်ရိက္ခာနှင့် အာဟာရ ဖူလုံမှု တိုးတက်ခြင်း၊ ဆင်းရဲနွမ်းပါးမှု လျော့ကျခြင်း၊ လုပ်ကွက်ငယ် တောင်သူလယ်သမားများနှင့် ကျေးလက်နေ ပြည်သူများ ဝင်ငွေပိုမို မြင့်မားလာခြင်းနှင့် သာတူညီမျှမှု ရှိလာခြင်း၊ စိုက်ပျိုးရေး ကဏ္ဍတွင် ယှဉ်ပြိုင်နိုင်စွမ်း တိုးတက်လာမှုနှင့် လယ်သမားများ၏ ရပိုင်ခွင့်များ ပိုမိုခိုင်မာလာမှုစသည့် အကျိုးကျေးဇူးများ ရရှိမည်ဖြစ်ပြီး စိုက်ပျိုးရေး ဖွံ့ဖြိုးတိုးတက်မှု မဟာဗျူဟာသည် အဓိက ထပ်ဆင့်ရလဒ်သုံးခု၊ ချက်ချင်းရလဒ် ၂၇ ခု၊ လုပ်ဆောင်ချက် ၂၇၀ တို့ကို စိုက်ပျိုးရေး၊ မွေးမြူရေးနှင့် ဆည်မြောင်း ဝန်ကြီးဌာနအောက်ရှိ တက္ကသိုလ်နှစ်ခု အပါအဝင် ဦးစီးဌာန ၁၂ ခု မှ အကောင်အထည်ဖော် ဆောင်ရွက်မည်ဟု သိရသည်။