တရုတ်တစ်ရှူးငှက်ပျောကိစ္စ ကချင်ပြည်နယ်လွှတ်တော်တွင် မေ ၂၉ ရက်က အငြင်းပွားခဲ့ကြောင်း သိရသည်။ တရုတ်တစ်ရှူး ငှက်ပျောခင်းများနှင့် ပတ်သက်၍ ဗန်းမော် မဲဆန္ဒနယ် အမှတ် (၁) မှ ပြည်နယ်လွှတ်တော် ကိုယ်စားလှယ် ဦးဇော်သင်းနှင့် ဝိုင်းမော်မြို့နယ် မဲဆန္ဒနယ်အမှတ် (၂) မှ ပြည်နယ်လွှတ်တော် ကိုယ်စားလှယ် ဦးနော်လီတို့ မေးမြန်းခဲ့ကြသည်။

ဦးနော်လီက “ဝိုင်းမော်မြို့နယ်အတွင်း အစိုးရမှ တရားဝင် ခွင့်ပြုပေးထားသည့် တရုတ်တစ်ရှူးငှက်ပျောစိုက်ကုမ္ပဏီစာရင်း၊ စိုက်ဧကစာရင်းများကို ထုတ်ပြန်ပေးရန်နှင့် ကျန်တရားမဝင် တရုတ်တစ်ရှူးငှက်ပျောစိုက် ကုမ္ပဏီများကို ပြည်နယ်အစိုးရက အရေးယူ ဆောင်ရွက်ပေးရန် အစီအစဉ် ရှိ-မရှိ” မေးမြန်းရာတွင် အစိုးရအဖွဲ့နှင့် လွှတ်တော်ကိုယ်စားလှယ်များ အငြင်းပွားကြခြင်းဖြစ်သည်။

မေးခွန်းမေးမြန်းသူ ဦးနော်လီက “တရုတ်တစ်ရှူးငှက်ပျောခင်းတွေဟာ လက်ရှိမှာ တိုးချဲ့စိုက်ပျိုးနေကြဆဲ ဖြစ်ပါတယ်။ လက်ရှိတွင် အောက်ခြေအတွင်း ပြဿနာဖြစ်ပွားကာ တရားမဝင်ကုမ္ပဏီများက ဒေသခံတောင်သူများကို တရားစွဲဆိုနေသည့် အခြေအနေများကိုလည်း တွေ့မြင်နေရပါတယ်။ ကြိုးဝိုင်း၊ ကြိုပြင်ကာကွယ်တောများတွင်လည်း စိုက်ပျိုးနေပါတယ်။ အရင်လွှတ်တော်များတွင်လည်း မေးခွန်းနှင့်အဆိုများလည်း ကိုယ်တိုင်မေးခွန်း မေးမြန်းခဲ့ပြီး ပြည်နယ်လွှတ်တော်က အတည်ပြုပြီး ဖြစ်ပါတယ်။ အစိုးရအဖွဲ့ တစ်ရှူးငှက်ပျောကိစ္စမှာ စိစစ်ကိုင်တွယ်မှုတွေ အားအလွန်နည်းနေတာကို တွေ့နေရပါတယ်။ အခွန်ကိစ္စ၊ ကျန်းမာရေးထိခိုက်စေတဲ့ ပိုးသတ်ဆေးကိစ္စတွေကို မကိုင်တွယ်နိုင်တာကို တွေ့နေရပါတယ်။ အလုံပိတ်ကားတွေနဲ့ နေ့ညထွက်နေကြတာလည်း တန်ဖိုးကြီးတဲ့ ကျောက်စိမ်းတွေလိုဟာမျိုးတွေလည်း ဖြစ်နိုင်ပါတယ်။ ဝင်လာတဲ့ကားတွေဟာ နံပါတ်ပြားလည်း မပါကြပါဘူး။ ဒါကြောင့် ဝိုင်းမော်မြို့နယ်အတွင်း အစိုးရမှ တရားဝင် ခွင့်ပြုပေးထားသည့် တစ်ရှူးငှက်ပျောစိုက်ကုမ္ပဏီစာရင်း၊ စိုက်ဧကစာရင်း ထုတ်ပြန်ပေးရန်နှင့် တရားမဝင် တစ်ရှူးကုမ္ပဏီများကို ပြည်နယ်အစိုးရမှ အရေးယူ ဆောင်ရွက်ပေးဖို့ မေးမြန်းရခြင်း ဖြစ်ပါတယ်” ဟု လွှတ်တော်သို့ တင်ပြခဲ့သည်။

ကချင်ပြည်နယ်အစိုးရအဖွဲ့ စိုက်ပျိုး၊ မွေးမြူရေးနှင့် ဆည်မြောင်းဝန်ကြီးဦးမြသိန်းက “ဗန်းမော်ခရိုင်နှင့် မြစ်ကြီးနားခရိုင်အတွင်း ၂၀၁၃-၂၀၁၄ ဘဏ္ဍာနှစ်မှ ၂၀၁၇-၂၀၁၈ ဘဏ္ဍာနှစ်အထိ ပြည်တွင်းအခွန်ကနေ ကုမ္ပဏီစုစုပေါင်း ၂၈ ခုတို့မှ ကြိုတင်ဝင်ငွေခွန် ကျပ်သန်း ၃၇၀၄ ဒသမ ၂၈၂ သန်း ကောက်ခံရရှိထားပါတယ်။ ၂၀၁၇ ခုနှစ် ကောက်ထားတဲ့စာရင်းအရ စိုက်ဧက ၄၆၉၈၃ ဧကအနက်မှာ မြစ်ကြီးနားမြို့နယ် ကျေးရွာနှစ်ရွာတွင် ကုမ္ပဏီခြောက်ခု ဧကပေါင်း ၆၁၈၀ ဧက၊ ဝိုင်းမော်မြို့နယ် ကျေးရွာ ၁၁ ရွာတွင် ကုမ္ပဏီလုပ်ငန်းရှင်အဖွဲ့ ၂၅ ခု မြေဧရိယာ ၂၇၆၃၅ ဧက စုစုပေါင်း ကုမ္ပဏီလုပ်ငန်းရှင် ၃၁ ခုက မြေဧရိယာ ၃၃၈၁၅ ဧကတွင် တစ်ရှူးငှက်ပျော စိုက်နေပါတယ်။ ဒေသခံ၊ လုပ်ငန်းရှင်၊ ကုမ္ပဏီများ၊ အဖွဲ့အစည်းများနှင့် တရုတ်ပြည်သူ့သမ္မတနိုင်ငံ စိုက်ပျိုးရေးကုမ္ပဏီက လယ်ယာမြေများအား ငှားရမ်းစိုက်ပျိုးခြင်း၊ မြေလွတ်၊ မြေလပ်နှင့် မြေရိုင်းများကို ဥပဒေအရလုပ်ပိုင်ခွင့်ပြုမိန့် ရရှိထားသည့် နေရာတွင် စိုက်ပျိုးခြင်း၊ မြေလွတ်၊ မြေလပ်၊ မြေရိုင်းများတွင် ကျူးလွန်စိုက်ပျိုးခြင်း၊ ကြိုးဝိုင်း၊ ကြိုးပြင်တောများကို ကျူးလွန်စိုက်ပျိုးခြင်းများကို ဥပဒေနဲ့အညီ လိုက်နာစိုက်ပျိုးစေခြင်းဖြင့် စနစ်တကျ စိုက်ပျိုးအကောင်အထည်ဖော်နိုင်မှာ ဖြစ်ပါတယ်။ နည်းလမ်းတကျ ဆောင်ရွက်နိုင်ရေးအတွက် ကချင်ပြည်နယ်အစိုးရအဖွဲ့ ဖေဖော်ဝါရီ ၇ ရက်မှာ စီမံကိန်းနှင့် ဘဏ္ဍာရေးဌာန စီးပွားရေးကော်မတီသို့ လမ်းညွှန်မှုခံယူထားပါတယ်” ဟု ပြောကြားသည်။

ထိုသို့ ဖြေကြားမှုနှင့်ပတ်သက်၍ ဦးနော်လီက ယခုစိုက်ပျိုးထားမှုသည် ဝိုင်းမော်မြို့နယ်တွင် ဧကပေါင်း ၂၇၀၀၀ ထက် အများကြီး ကျော်လွန်နေကြောင်း၊ အစိုးရက တရားဝင်ခွင့်ပြုကုမ္ပဏီကို သိလိုပါကြောင်း၊ ခွင့်ပြုမြေကိုသိလိုပါကြောင်း၊ သစ်တောမြေတွင် စိုက်ပျိုးနေခြင်းကို မည်ကဲ့သို့ ခွင့်ပြုခဲ့ကြောင်း၊ တရားမဝင်ပါက သစ်တောဦးစီးဌာနက တရားစွဲဖို့ အစီအစဉ် ရှိ မရှိ ထပ်မံသိလိုပါကြောင်း လွှတ်တော်တွင် တင်ပြခဲ့သည်။

စိုက်ပျိုး၊ မွေးမြူရေးနှင့် ဆည်မြောင်းဝန်ကြီးက စိုက်ဧကအရေအတွက်မှာ တိကျစွာ ကောက်ယူရန် ခက်ခဲနေပါကြောင်း၊ စီမံဘဏ္ဍာရေးဝန်ကြီးဌာနမှ စီးပွားရေးရာကော်မတီသို့ အချက်အလက်များဖြင့် လမ်းညွှန်မှုပေးရန် တင်ပြရာတွင် မည်ကဲ့သို့ ဆက်လက်ဆောင်ရွက်မည်ကို မသိရပါကြောင်း၊ တစ်ရှူးငှက်ပျောစိုက်ပျိုးမှုနှင့် ပတ်သက်ပြီး မြေနှင့်ပတ်သက်သည့် ကိစ္စရပ်များကို ဆိုင်းငံ့ထားပါသည်ဆိုသည့် အကြောင်းပြန်ကြားချက် ရရှိပါကြောင်း၊ တစ်ရှူးငှက်ပျောစိုက်ပျိုးမှုသည် ဝိဝါဒကွဲပြားနေပါကြောင်း၊ ရှင်းရှင်းလင်းလင်းဖြစ်ရန် ခဲယဉ်းနေကြောင်း ဖြေကြားသည်။

မေးခွန်းရှင်ဦးနော်လီက လက်ရှိတွင် အောက်ခြေ၌ တစ်ရှူးငှက်ပျောစိုက်ပျိုးမှုနှင့် ပတ်သက်၍ တရားစွဲဆိုခံရခြင်းများ ရှိနေပါကြောင်း၊ အစိုးရ၏ တရားဝင်ခွင့်ပြုသည့် ကုမ္ပဏီစာရင်းကို ရလိုခြင်းဖြစ်ပါကြောင်း၊ တရားမဝင် ကုမ္ပဏီများက ဒေသခံများ၏ မြေယာများကို လုယက်စိုက်ပျိုးနေသည့် အခြေအနေဖြစ်ပါကြောင်း၊ ယင်းတရားမဝင် ကုမ္ပဏီများက တရားစွဲနေသည်ဟု သိရပါကြောင်း မေးမြန်းခဲ့သည်။

စိုက်ပျိုး၊ မွေးမြူရေးနှင့် ဆည်မြောင်းဝန်ကြီး ဦးမြသိန်းက လွန်ခဲ့သောနှစ်ပေါင်းရှစ်နှစ်ကျော်က စိုက်ပျိုးလာခဲ့သော်လည်း ခွင့်ပြုထားသည့် တရားဝင် အထောက်အထား တစ်စုံတစ်ရာ မရှိပါကြောင်း၊ တရားစွဲဆိုပါက တရားဝင် ဖြစ် မဖြစ်ကို စစ်ဆေးသင့်ပါကြောင်း ဖြေကြားသည်။

ကချင်ပြည်နယ် ဝန်ကြီးချုပ်ဟောင်းဖြစ်သူ လွှတ်တော်ကိုယ်စားလှယ် ဦးလဂျွန်ငန်ဆိုင်းက ၎င်း၏လက်ထက်တွင် အကြိမ်ကြိမ် ခွင့်တောင်းခဲ့သော်လည်း ခွင့်ပြုပေးထားခြင်း မရှိကြောင်း၊ တရားဝင်စိုက်ပျိုးမှု မရှိကြောင်း တင်ပြခဲ့သည်။

ဘဏ္ဍာ၊ အခွန်၊ စီမံကိန်းနှင့်စီးပွားရေးဝန်ကြီး ဦးဝေလင်းက တစ်ရှူးငှက်ပျောနှင့် ပတ်သက်၍ ကုမ္ပဏီများက ရင်းနှီးမြှုပ်နှံမှုတွင် မှတ်ပုံတင်ထားကြောင်း၊ တစ်ရှူးငှက်ပျော စိုက်ပျိုးခွင့်ပြုရန် မှတ်ပုံတင်ခြင်း မဟုတ်ကြောင်း၊ တစ်ရှူးငှက်ပျောစိုက်ပျိုးမှုနှင့် ပတ်သက်ပြီး တရားဝင်တစ်ဦးမျှ မရှိသေးပါကြောင်း၊ စိုက်ဧကအားဖြင့် အစိုးရတက်လာပြီးနောက်ပိုင်းတွင် ဧကပေါင်းလေးသောင်းကျော် စာရင်းရသော်လည်း တစ်ဧကမျှ ခွင့်ပြုထားခြင်း မရှိကြောင်း၊ တရားဝင်ခွင့်ပြုချက်မရှိ တရားမဝင် စိုက်ပျိုးနေခြင်းသာဖြစ်ကြောင်း ရှင်းလင်းဖြေကြားသည်။

သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီး ဦးHလအောင်က ကြိုးဝိုင်းသစ်တောမြေတွင် စိုက်ပျိုးမှုနှင့်ပတ်သက်၍ အောက်ခြေသို့ ကွင်းဆင်းစိစစ်ခိုင်းရာတွင် နယ်မြေမလုံခြုံသည့်နေရာဖြစ်သည့်အတွက် ကွင်းဆင်းစစ်ဆေးရန် ခက်ခဲနေကြောင်း၊ ကချင်ပြည်နယ် အစိုးရအဖွဲ့နှင့် ပြည်ထောင်စုအစိုးရအဖွဲ့တို့ ညှိနှိုင်းဆောင်ရွက်ရန် ဆွေးနွေးတင်ပြထားဆဲဖြစ်ကြောင်း ဖြေကြားသည်။

မေးခွန်းရှင်ဖြစ်သူ ဦးနော်လီက စိုက်ပျိုးမှုများ တရားမဝင်ပါက မည်သည့်အတွက်ကြောင့် ယခုကဲ့သို့ ခွင့်ပြုထားသလဲ။ မည်ကဲ့သို့ ဆက်လက်ဆောင်ရွက်မည်ဆိုသည့် မေးခွန်းကို ထပ်ဆင့်မေးမြန်းခဲ့သည်။

ထို့နောက် လွှတ်တော်ဥက္ကဋ္ဌ ဦးထွန်းတင်က လွှတ်တော်ကိုယ်စားလှယ်များ မေးမြန်းသည့်မေးခွန်းကို တိကျရှင်းလင်းစွာ ဖြေကြားရန် လိုအပ်ပါကြောင်း၊ တရုတ်တစ်ရှူး ငှက်ပျောခင်းကိစ္စမှာ ကချင်ပြည်နယ်အနှံ့တွင် စိုက်ပျိုးနေပြီဖြစ်ကြောင်း၊ ပြဿနာ အမျိုးမျိုး ဖြစ်ပွားလာနိုင်ကြောင်း၊ တခြားသော တိုင်းနှင့် ပြည်နယ်များကိုပါ ပျံ့နှံ့မှုဖြစ်နေကြောင်း၊ တစ်ရှူးငှက်ပျောပြဿနာသည် ရေရှည်တွင် ပလတ်စတစ်ပြဿနာကဲ့သို့ ဖြေရှင်း၍ မရနိုင်လောက်အောင် ဖြစ်လာနိုင်သောကြောင့် ဖြေရှင်းရန် နည်းလမ်းရှာသင့်နေပြီဖြစ်ကြောင်း သတိပေးခဲ့သည်။