မိမိသဘောဆန္ဒဖြင့် ပြန်လည်ဝင်ရောက်လာသော ဘင်္ဂါလီ ၆၂ ဦးအား ပြစ်ဒဏ်လွတ်ငြိမ်းခွင့်နှင့် တရားစွဲဆိုမှု ရုပ်သိမ်းပေးခဲ့ကြောင်း နိုင်ငံတော်အတိုင်ပင်ခံရုံးဝန်ကြီးဌာနက မေ ၂၇ ရက် သတင်းထုတ်ပြန်ချက်အရ သိရသည်။
အကြမ်းဖက်မှုဖြစ်စဉ်နောက်ပိုင်း နေရပ်စွန့်ခွာခဲ့ပြီး မိမိသဘောဆန္ဒဖြင့် ပြန်လည်ဝင်ရောက်လာသော နေရပ်စွန့်ခွာသူများအား အကြမ်းဖက်မှုများတွင် ပါဝင်ခဲ့ခြင်း ရှိ မရှိ စိစစ်ပြီးနောက် ပြစ်ဒဏ်လွတ်ငြိမ်းခွင့်ပြုခဲ့သူ ၅၈ ဦးနှင့် တရားစွဲဆိုမှု ရုပ်သိမ်းသူ လေးဦး (စုစုပေါင်း ၆၂ ဦး) ကို မေ ၂၆ ရက်တွင် ဘူးသီးတောင်မှ ငါးခူရ ပြန်လည်လက်ခံရေး စခန်းသို့ ပို့ဆောင်ပေးခဲ့ပြီး နှစ်နိုင်ငံ သဘောတူညီချက်များနှင့်အညီ လိုအပ်သည့်ပုံစံများ ဖြည့်စွက်ခြင်း၊ စိစစ်ခြင်းတို့ကို ပြုလုပ်ပြီးနောက် မကြာမီ လှဖိုးခေါင်ကြားစခန်းတွင် ခေတ္တနေရာချထားမှုများ ဆက်လက်ဆောင်ရွက်သွားမည်ဖြစ်ကြောင်း သိရသည်။
မိမိသဘောဆန္ဒဖြင့် ပြန်လည်ဝင်ရောက်လာကြသည့် နေရပ်စွန့်ခွာသူများသည် လိုအပ်သည့်စစ်ဆေးမှုများ ပြုလုပ်ပြီး နှစ်နိုင်ငံ သဘောတူညီချက်အတိုင်း သတ်မှတ်ထားသည့် ပြန်လည်လက်ခံရေးစခန်းတွင် စနစ်တကျ စိစစ်မှုများပြုလုပ်ကာ ကြားစခန်းတွင် ထားရှိနိုင်ရေးအတွက် ကျခံရသော ပြစ်ဒဏ်များကို နိုင်ငံတော် သမ္မတက လွတ်ငြိမ်းသက်သာခွင့်ပြုခဲ့ခြင်းဖြစ်ကြောင်း သတင်းထုတ်ပြန်ခဲ့သည်။
