ပဲခူးတိုင်းဒေသကြီးအစိုးရအဖွဲ့မှ မောင်တောမြို့နယ် ကိုင်းကြီး (မြို) တိုင်းရင်းသားများအတွက် ဆောက်လုပ်လှူဒါန်းသော နေအိမ် ၆၄ လုံးအား မေ ၁၉ ရက်က လွှဲအပ်ခဲ့ကြောင်း သိရသည်။
ကိုင်းကြီး (မြို) တိုင်းရင်းသားများအတွက် ပဲခူးတိုင်းဒေသကြီးအစိုးရအဖွဲ့မှ လှူဒါန်းသော အိမ်ရာ ၆၄ လုံးအား ၂၀၁၇ ခုနှစ် ဒီဇင်ဘာ ၂၀ ရက်မှစတင်ကာ BLUE & GREEN ကုမ္ပဏီမှ တာဝန်ယူတည်ဆောက်ခဲ့ခြင်းဖြစ်ပြီး နေအိမ်အမျိုးအစားမှာ RC သွပ်မိုး ၃၀×၁၈ အရွယ်အစားဖြစ်ကြောင်းနှင့် နေအိမ်တစ်လုံးတန်ဖိုးမှာ ငွေကျပ် ၉၅ သိန်းဖြစ်ပြီး နေအိမ် ၆၄ လုံးအတွက် စုစုပေါင်းကုန်ကျငွေမှာ ငွေကျပ်သန်းပေါင်း ၆၀၈၀ ဖြစ်ကြောင်း သိရသည်။
အဆိုပါ ကိုင်းကြီးကျေးရွာမှ မြိုတိုင်းရင်းသားများအတွက် နေအိမ်များမှာ ပြီးစီးခဲ့ပြီဖြစ်သဖြင့် လွှဲအပ်ပွဲအခမ်းအနားကို မေ ၁၉ ရက် မွန်းလွဲ ၁၂ နာရီ မိနစ် ၅၀ က ကျင်းပခဲ့ရာ အခမ်းအနားသို့ ပဲခူးတိုင်းဒေသကြီး ဝန်ကြီးချုပ် ဦးဝင်းသိန်းနှင့် ရခိုင်ပြည်နယ် ဝန်ကြီးချုပ် ဦးညီပုတို့ တက်ရောက်ဖွင့်လှစ် လွှဲပြောင်းပေးအပ်ခဲ့ကြောင်း သိရသည်။
ကျေးရွာသား ရှစ်ဦးသတ်ဖြတ်ခံခဲ့ရသည့် ကိုင်းကြီး မြိုတိုင်းရင်းသားကျေးရွာအား ရန်ကုန်တိုင်းဒေသကြီးအစိုးရအဖွဲ့နှင့် ပဲခူးတိုင်းဒေသကြီးအစိုးရအဖွဲ့မှ နေအိမ်များ ဆောက်လုပ်လှူဒါန်းခဲ့ခြင်းဖြစ်ပြီး ရန်ကုန်တိုင်းဒေသကြီးအစိုးရအဖွဲ့မှ အိမ်ရာ ၅၆ လုံးနှင့် ပဲခူးတိုင်းဒေသကြီးအစိုးရအဖွဲ့မှ အိမ်ရာ ၆၄ လုံးကို လှူဒါန်းခဲ့ခြင်းဖြစ်ကြောင်းလည်း သိရသည်။
သြဂုတ် ၃ ရက်က မောင်တောမြို့နယ်တောင်ပိုင်း မေယုတောင်ပေါ်ရှိ ကိုင်းကြီးမြိုတိုင်းရင်းသားကျေးရွာမှ ကျေးရွာသားရှစ်ဦးသည် တောင်ယာသွားရင်း ဘင်္ဂါလီအကြမ်းဖက်သမားများ လက်ချက်ဖြင့် သေဆုံးခဲ့ရသည်။
ရွာသားရှစ်ဦး သတ်ဖြတ်ခံခဲ့ရသည့် ကိုင်းကြီး (မြို) ရွာသားများသည် မူလနေရာဖြစ်သော မေယုတောင်ပေါ်တွင် မနေရဲတော့သဖြင့် ပြောင်းရွှေ့နေရာချထားရန် တောင်းဆိုခဲ့သောကြောင့် မောင်တော-အငူမော်ကားလမ်း အရှေ့ဘက် မေယုတောင်ခြေတွင် ရွာသစ်တည်ပေးခဲ့ခြင်းဖြစ်ကြောင်းလည်း သိရသည်။
အဆိုပါ ကိုင်းကြီး (မြို) ကျေးရွာအား မောင်တောမြို့နယ်တောင်ပိုင်း၊ ဝေသာလီ-ဥဒေါင်း ကွန်ကရစ်လမ်းဘေး အရှေ့ဘက် မေယုကြိုးဝိုင်း၊ သံဒါကျေးရွာအုပ်စု၊ သံဒါကွင်း၊ ကွင်းအမှတ် ၁၃၆ တွင် ပြန်လည်နေရာချထားခြင်းဖြစ်ပြီး ၂၀၁၇ ခုနှစ် အောက်တိုဘာ ၂၀ ရက်က ပန္နက်ရိုက်အခမ်းအနား ပြုလုပ်ခဲ့ပြီး အိမ်ရာကွက်အရွယ် ပေ ၄၀×၆၀၊ အိမ်ရာကွက်များတွင် နေအိမ်များ တည်ဆောက်ခြင်းဖြစ်ကြောင်း သိရသည်။
ကိုင်းကြီး(မြို)တိုင်းရင်းသားကျေးရွာတွင် အိမ်ထောင်စု ၄၈ စုရှိခဲ့ရာမှ လက်ရှိတွင် အိမ်ထောင်စု ၄၆ စု လူဦးရေ ၂၅၀ ရှိနေကြောင်း သိရသည်။
