<

ကျောင်းနေအရွယ်ကလေးများအားလုံး ကျောင်းအပ်နှံရေးအတွက် လိုအပ်သော မွေးစာရင်းနှင့် သန်းခေါင်စာရင်းများ ရရှိထားရေး ဆောင်ရွက်နိုင်ရန် ပညာရေးဝန်ကြီးဌာနမှ ညွှန်ကြား

ကျောင်းနေအရွယ်ကလေးများအားလုံး ကျောင်းအပ်နှံရေးအတွက် လိုအပ်သော မွေးစာရင်းနှင့် သန်းခေါင်စာရင်းများ ရရှိထားနိုင်ရေး ဆောင်ရွက်နိုင်ရန် ပညာရေးဝန်ကြီးဌာန အခြေခံပညာဦးစီးဌာန ရန်ကုန်တိုင်းဒေသကြီး ပညာရေးမှူးရုံးမှ ညွှန်ကြားချက် ထုတ်ပြန်ထားကြောင်း သိရသည်။

ကျောင်းအပ်နှံရေးရက်သတ္တပတ်တွင် ရန်ကုန်တိုင်းဒေသကြီးအတွင်းရှိ ကျောင်းနေအရွယ် ကလေးများအားလုံး အဆင်ပြေချောမွေ့စွာ ကျောင်းအပ်နှံနိုင်ရန် မွေးစာရင်း၊ သန်းခေါင်စာရင်းများ ကြိုတင်ရရှိနိုင်ရေးအတွက် မိမိတို့မြို့နယ်ရှိ အလုပ်သမားလူဝင်မှု ကြီးကြပ်ရေးနှင့် ပြည်သူ့အင်အားဝန်ကြီးဌာန၊ ကျန်းမာရေးနှင့် အားကစားဝန်ကြီးဌာနနှင့် လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာနတို့နှင့် ပူးပေါင်းဆောင်ရွက်ရန် ကျောင်းအပ်နှံရေး သီတင်းပတ်လုပ်ငန်းစဉ်များ၊ ကျောင်းဖွင့်အမီ ကြိုတင်ဆောင်ရွက်ရမည့် လုပ်ငန်းများအား အလေးထား ဆောင်ရွက်နိုင်ရေးကို ကြိုတင် စီမံဆောင်ရွက်ရန် ညွှန်ကြားထားကြောင်း သိရသည်။

“ကျောင်းအပ်နှံရေး ရက်သတ္တပတ်ကလည်း နှစ်စဉ် မေ ၂၅ ရက်ကနေ ၃၁ ရက်နေ့ အထိဆိုတော့ ကျောင်းအပ်နှံရေး ရက်သတ္တပတ်အတွင်းမှာ ကလေးတွေ အခက်အခဲမရှိ ကျောင်းအပ်နှံနိုင်ဖို့အတွက် သက်ဆိုင်ရာဌာနတွေ ပူးပေါင်းဆောင်ရွက်ဖို့ကို အခုလို ညွှန်ကြားချက်ထုတ်ပြီး အကြောင်းကြားတာတွေ ဆောင်ရွက်တာ ဖြစ်ပါတယ်” ဟု ပညာရေးဝန်ကြီးဌာန အခြေခံပညာဦးစီးဌာနမှ တာဝန်ရှိသူတစ်ဦးက ပြောကြားသည်။

၂၀၁၇-၂၀၁၈ ပညာသင်နှစ်၌ ကျောင်းအပ်နှံရာတွင် အသက်ခြောက်နှစ်ပြည့်ပြီးသူများ ပထမတန်းသို့ တိုက်ရိုက်တက်ရောက် ခွင့်ပြုခဲ့ခြင်းဖြစ်ရာ ကျောင်းအပ်လက်ခံရန် အသက်ထောက်ခံချက် အပြည့်အစုံပါရှိရန် လိုအပ်ကြောင်း ပညာရေးဝန်ကြီးဌာနက ညွှန်ကြားချက် ထုတ်ပြန်ခဲ့သည်။

သို့ဖြစ်ရာ ပထမတန်းသို့ တိုက်ရိုက် တက်ရောက်မည့် ကျောင်းသား၊ ကျောင်းသူများအနက် အသက်ခြောက်နှစ်မပြည့်သည့် ကလေးများကို ကိုယ်ကာယနှင့် ဥာဏ်ရည်ဖွံ့ဖြိုးမှုကိုကြည့်၍ ခရိုင်ပညာရေးမှူး၏ ခွင့်ပြုချက်ဖြင့် လက်ခံပေးရန် အခြေခံပညာကျောင်းများသို့ အကြောင်းကြားမှုများ ပညာရေးဝန်ကြီးဌာနက ပြုလုပ်ခဲ့ကြောင်း သိရသည်။

အလားတူ ငါးနှစ်အရွယ် ကလေးများကို သူငယ်တန်း (KG) သို့ အပ်နှံရန်၊ ခြောက်နှစ်အရွယ်ကလေးများကို ပထမတန်း (Grade-1) သို့ အပ်နှံရန် အသိပေး ကြေညာချက်ကိုလည်း ယခုနှစ်အတွင်း အခြေခံပညာကျောင်းများ၌ ထုတ်ပြန်ခဲ့ကြောင်း ပညာရေးဝန်ကြီးဌာနမှ သိရသည်။

April 26, 2018














Copy Protected by Chetan's WP-Copyprotect.