မော်လမြိုင်မြို့အပါအဝင် အာဆီယံရှစ်နိုင်ငံရှိ မြို့ကြီး ၅၀ တွင် ဆောင်ရွက်နေသည့် G2Z စီမံချက်အား ဘားအံမြို့နှင့် မြဝတီမြို့များတွင် တိုးချဲ့ဆောင်ရွက်သွားမည်ဖြစ်ကြောင်း ကျန်းမာရေးနှင့် အားကစားဝန်ကြီးဌာန ပြည်ထောင်စုဝန်ကြီး ဒေါက်တာမြင့်ထွေးက ပြောကြားသည်။

အဆိုပါကိစ္စအား မြန်မာနိုင်ငံက အိမ်ရှင်နိုင်ငံအဖြစ် ကျင်းပသည့် အာဆီယံမြို့ကြီးများ၌ HIV ကင်းစင်ရေး ဒေသဆိုင်ရာ အစည်းအဝေး (ASEAN Cities Getting to Zero, Regional Consultation Meeting) ကို မွန်ပြည်နယ် မော်လမြိုင်မြို့ရှိ ရွိုင်ရယ်ဟင်္သာဟိုတယ်တွင် ဧပြီ ၂၀ ရက် နံနက် ၈ နာရီခွဲတွင် ကျင်းပရာ ကျန်းမာရေးနှင့် အားကစားဝန်ကြီးဌာန၊ ပြည်ထောင်စုဝန်ကြီး ဒေါက်တာမြင့်ထွေးက အမှာစကားပြောကြားရာတွင် ထည့်သွင်းပြောကြားကြောင်း သိရသည်။

ပြည်ထောင်စုဝန်ကြီး ဒေါက်တာမြင့်ထွေးက HIV/AIDS ရောဂါသည် နိုင်ငံများအားလုံး လက်တွဲပူးပေါင်း ကြိုးပမ်းအားထုတ်မှုကြောင့် အောင်မြင်မှုများ သိသာစွာရရှိနေသော်လည်း မိမိတို့အနေဖြင့် ကျေနပ်နှစ်သိမ့် ရောင့်ရဲမနေသင့်ဘဲ ရောဂါ၏သဘာဝနှင့် ရောဂါဖြစ်ပွားမှုအခြေအနေကို ရှုထောင့်ပေါင်းစုံမှ သတိမပြတ် ဆက်လက်စောင့်ကြည့်ရန် လိုအပ်ကြောင်း၊ စုံစမ်းထောက်လှမ်းသော်လည်း မတွေ့ရှိသည့် ပုန်းကွယ်နေသည့် လူနာများရှိနေနိုင်ကြောင်း၊ အာဆီယံနိုင်ငံများ၏ မြို့တော်များတွင် HIV/AIDS ကင်းစင်ရေးစီမံချက်ကို HIV ပိုးကူးစက်ခံရသူ အသစ်မရှိရေး HIV/AIDS နှင့်ပတ်သက်၍ ခွဲခြားဆက်ဆံမှု လုံးဝမရှိရေးနှင့် AIDS ရောဂါဖြင့် သေဆုံးသူမရှိရေး စသည့်ရည်ရွယ်ချက်များဖြင့် ၂၀၁၁ ခုနှစ်မှစတင်၍ ကာကွယ်ရေးနှင့် ကုသရေးလုပ်ငန်းများကို အကျိုးရှိထိရောက်စွာဖြင့် အာဆီယံမြို့တော်များ၌ အရှိန်အဟုန်မြှင့် ပူးပေါင်းဆောင်ရွက်ခဲ့သည်ကို တွေ့ရှိရကြောင်း ပြောကြားသည်။

ထို့ပြင် HIV/AIDS ရောဂါသည် ပြည်သူကျန်းမာရေးအန္တရာယ်အဖြစ်မှ အဆုံးသတ်ရပ်တန့်နိုင်ရေးအတွက် လက်တွေ့ကျသော လုပ်ငန်းစဉ်များ၊ စီမံချက်များ ချမှတ်ဆောင်ရွက်နေကြောင်း။

ယခု G2Z စီမံချက် အောင်မြင်ရေးအတွက် ထောက်ပံ့ကူညီပေးသော မူဝါဒနှင့် ဥပဒေများရှိရေး၊ သတင်းအချက်အလက်များ အချိန်နှင့်တစ်ပြေးညီရရှိရေး၊ သက်ဆိုင်ရာအဖွဲ့အစည်းများ၊ ပညာရပ်လုပ်ငန်းများ၊ ဝန်ကြီးဌာနများအကြားတွင် ပူးပေါင်းညှိနှိုင်း ဆောင်ရွက်မှုကောင်းခြင်း၊ ပြည်သူများ တက်ကြွစွာပူးပေါင်းပါဝင် ဆောင်ရွက်ခြင်းများသည် မရှိမဖြစ်လိုအပ်ပါကြောင်း၊ ယခုအချိန်ထိ မြန်မာနိုင်ငံရှိ မော်လမြိုင်မြို့အပါအဝင် ASEAN နိုင်ငံရှစ်နိုင်ငံရှိ မြို့ကြီး ၅၀ ၌ G2Z စီမံချက်ကို အကောင်အထည်ဖော် ဆောင်ရွက်နေပြီး ဘားအံမြို့နှင့် မြဝတီမြို့များ၌လည်း တိုးချဲ့ဆောင်ရွက်သွားမည်ဖြစ်ကြောင်း ပြည်ထောင်စုဝန်ကြီးက ပြောကြားသည်။

ထို့ပြင် ဤဒေသဆိုင်ရာ အစည်းအဝေးသည် တက်ရောက်လာသော နိုင်ငံများအကြား အဖိုးတန်အတွေ့အကြုံများ၊ သင်ခန်းစာများ၊ ချဉ်းကပ်ဆောင်ရွက်ပုံ နည်းလမ်းသစ်များကို အပြန်အလှန်မျှဝေနိုင်မည်ဟု မျှော်လင့်ပါကြောင်း၊ ဤအစည်းအဝေးမှတစ်ဆင့် HIV/AIDS ရောဂါတိုက်ဖျက်ရေးနှင့် ပတ်သက်၍ တည်တံ့ခိုင်မြဲသော အောင်မြင်မှုများရရှိနိုင်မည့် လက်တွေ့ကျသော နည်းလမ်းနှင့် အဖြေများကိုဆွေးနွေး ထုတ်ဖော်သွားနိုင်မည်ဟု ယုံကြည်ပါကြောင်း၊ အမြစ်တွယ်နေသော ဤ HIV/AIDS ရောဂါအန္တရာယ်ကြီးကို ပြန်လည်ခေါင်းထောင် ဦးမော့မလာနိုင်သည်အထိ ကင်းစင်အဆုံးသတ်သွားစေရန် မိမိတို့ အားလုံးစုပေါင်းပြီး နည်းလမ်းပေါင်းစုံ၊ ဘက်ပေါင်းစုံမှ ချဉ်းကပ် ကြိုးပမ်းဆောင်ရွက်သွားရန် ကျန်းမာရေးနှင့် အားကစားဝန်ကြီးဌာန ပြည်ထောင်စုဝန်ကြီး ဒေါက်တာမြင့်ထွေးက ပြောကြားသည်။