ရန်ကုန်မြို့ရှိ အထည်ချုပ်စက်ရုံတစ်ခုကို တွေ့ရစဉ် (ဓာတ်ပုံ-ဇေယျာငြိမ်း)

လက်ရှိအချိန်တွင် အထည်ချုပ်စက်ရုံ ၅၀ နီးပါးက အွန်လိုင်းဖြင့် သွင်းကုန်လိုင်စင် လျှောက်ထားလျက်ရှိပြီး ၂၀၁၈ ခုနှစ် မေလမှစ၍ အထည်ချုပ်စက်ရုံအားလုံးတွင် ဆက်လက်ဆောင်ရွက်မည်ဖြစ်ကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ သိရသည်။

အထည်ချုပ်စက်ရုံများအနေဖြင့် အွန်လိုင်းအသုံးပြုပြီး မိမိတို့ လျှောက်ထားမည့် သွင်းကုန်လိုင်စင်အတွက် ကုန်ပစ္စည်းအသေးစိတ် အချက်အလက် အပါအဝင် လျှောက်ထားရာတွင် လိုအပ်သည့် အချက်အလက်များနှင့် MGMA Application ကို ဝင်ရောက်လျှောက်ထားရမည်ဖြစ်ကြောင်း၊ ယင်းကဲ့သို့ လျှောက်ထားမှုအပေါ် MGMA တာဝန်ရှိသူများက လိုအပ်သည့် စစ်ဆေးမှုများပြုလုပ်ပြီး မှန်ကန်ပြည့်စုံသည့် Application များကို အဆိုပါစနစ်တွင် Submit ပြုလုပ်လိုက်သည်နှင့် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၏ Myanmar Trade Net Website မှတစ်ဆင့် အွန်လိုင်းစနစ်ထဲသို့ အလိုအလျောက် လိုင်စင် လျှောက်ထားပြီးဖြစ်မည်ဖြစ်ကြောင်း သိရသည်။

အွန်လိုင်းစနစ်ဖြင့် ရောက်ရှိလာသည့် လိုင်စင်အချက်အလက်များကို စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ ဝန်ထမ်းများက စစ်ဆေးပြီး ပြင်ဆင်ရန် လိုအပ်သည့် အချက်အလက်များ ရှိပါက အွန်လိုင်းမှတစ်ဆင့် စက်ရုံကို ပြန်လည်ပေးပို့ကြောင်း၊ မှန်ကန်ပါက သက်ဆိုင်ရာစက်ရုံကို Digital Import Licencing တစ်စောင်ကို အွန်လိုင်းပေါ်မှ ထုတ်ပြန်ပေးမည် ဖြစ်ကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ သိရသည်။

လက်ရှိဘဏ္ဍာနှစ် မတ်လဆန်းအထိ ပြည်ပသို့ CMP စနစ်ဖြင့် ချုပ်ပြီးအထည်တင်ပို့မှု တန်ဖိုး ဒေါ်လာ ၂ ဒသမ ၃၃၂ ဘီလျံရရှိထားပြီး ပြည်ပပို့ကုန်တင်ပို့မှု၏ ဒုတိယနေရာတွင် ရပ်တည်လျက်ရှိနေကြောင်း စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ သိရသည်။

စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ မြန်မာနိုင်ငံ၏ ပို့ကုန်ကဏ္ဍတိုးမြှင့်ရေးလုပ်ငန်းများကို ဆောင်ရွက်ရာတွင် အထည်အလိပ်လုပ်ငန်း (အထည်ချုပ်) ကဏ္ဍကို အဓိက ဦးစားပေးအနေဖြင့် ဆောင်ရွက်လျက်ရှိကြောင်း သိရသည်။